ဇူလိုင် ၆ ရက်၊ ၂၀၁၃ ခုနှစ် | တောင်ကြီးတိုင်းမ် | ဖြစ်ရပ်မှန်ဆောင်းပါး
ဒုတိယကမ္ဘာစစ်ပြီး ကမ္ဘာနှင့်အ၀ှမ်း၊ နယ်ချဲ့လက်အောက်မှ နိုင်ငံပေါင်းများစွာလွတ်လပ်ရေး ရရှိခဲ့ကြသည်။ မြန်မာနိုင်ငံလည်း အမျိုးသားခေါင်းဆောင် ဗိုလ်ချုပ်အောင်ဆန်း၏ မှန်ကန်သော နိုင်ငံရေးဦးဆောင်မှုကြောင့် နိုင်ငံရေးအသိစိတ်ဓါတ် နှိုးကြားတက်ကြွစွာ လွတ်လပ်ရန် ကြိုးပမ်းခဲ့ကြ သည်။ ထိုနည်းတူ ပအိုဝ်းအမျိုးသားခေါင်းဆောင်ကြီး ဦးခွန်ကြည်နှင့် ဦးလှဖေတို့၏ စည်းရုံးသိမ်းသွင်းမှုကြောင့် ပအိုဝ်းအမျိုးသားများ နိုင်ငံရေးနိုးကြားတက်ကြွလာကြသည်။ ၁၉၄၇-ခုနှစ်တွင် ဦးဟိန်မောင်၊ ဦးအောင်သာ၊ ဦးဟိန်တိထွန်း အစရှိသော ပအိုဝ်းခေါင်းဆောင်များက ပအိုဝ်းလှိုင်ဗူ ခေါ် ပအိုဝ်းစုစည်းအဖွဲ့ကို စတင်ဖွဲ့စည်းခဲ့ကြသည်။
၁၉၅၀-ခုနှစ်တွင် ပအိုဝ်းလှိုင်ဗူမှ ပြည်ထောင်စုပအိုဝ်းအမျိုးသားအဖွဲ့ချုပ် (ပ၊ အ၊ မ၊ ဖ) ကို ပြောင်းလဲဖွဲ့စည်းခဲ့ကြသည်။ ပြည်ထောင်စုပအိုဝ်းအမျိုးသားအဖွဲ့ချုပ် ရုံးခန်းကို ယခုစာတိုက်ရှေ့ ဗိုလ်ချုပ်အောင်းဆန်းလမ်း အနောက်ဘက်၊ ယခင် ညွန့်မြန်မာထမင်းဆိုင်တွင် ငှားရမ်းဖွင့်လှစ်ခဲ့သည်။ ၁၉၅၄ ခုနှစ်၊ ဧပြီလ (၇) ရက်၊ ဗုဒ္ဓဟူးနေ့ နေ့လည် (၁၂) နာရီအချိန်တွင် အဖွဲ့ချုပ်အပေါ်ထပ် အစည်းအဝေးခန်းမ၌ (ပအမဖ) ဗဟိုဦးစီး အစည်းအဝေးတစ်ရပ် ကျင်းပခဲ့သည်။ ထိုအစည်းအဝေးသို့ ဦးဖြူ၊ ဦးဟိန်ရှင်ငွေ၊ ဦးထွေးလုံ၊ ဦးထွန်းရီ၊ ဦးကျော့လမ်း၊ ဦနန္ဒိယ၊ ဦးဆရာပေ၊ ဦးကံ၊ ဦးရှမ်းခင်၊ ဦးအုံးဖါဖြိန်း၊ ဦးဗျမ်း၊ ဦးမြ၊ ဦးစာရေးဖြား၊ ဦးဟိန်မောင်၊ ဦးကျန်၊ ဦးကျော်စိန်၊ ဦးပေါင်းစင်ထွန်း၊ ဦးကြွယ်၊ ဦးကျောင်းကုံရနှင့် ဦးစံညွန့်တို့ စုံညီစွာ တက်ရောက်ခဲ့ကြပါသည်။
ထိုအစည်းအဝေးမှ ပြည်ထောင်စုပအိုဝ်းအမျိုးသားအဖွဲ့ချုပ်၊ ပဏာမညီလာခံကို ၁၉၅၄-ခုနှစ်၊ မေလ (၂၇) ရက်နေ့တွင် ကျင်းပရန် ဆုံးဖြတ်ခဲ့ပါသည်။ ပဏာမညီလာခံကို နောင်ကားခရိုင်၊ နောင်ယွေးရွာ ဘုန်တော်ကြီးကျောင်းတွင် ကျင်းပရာ ပအိုဝ်းအမျိုးသားပိုင် အဆောက်အဦး သတ်သတ်မှတ်မှတ်ရှိရန် ဆွေးနွေးဆုံးဖြတ်ခဲ့ကြသည်။ ထိုအစည်းအဝေးတွင် (ပအမဖ) ပါလီမန်အမတ် ဦးအောင်သာ က ဆွေးနွေးရာတွင် လူမျိုးအသီးသီးတွင် ကိုယ်ပိုင်အဆောက်အဦးများရှိရန် ကြိုးပမ်းနေကြကြောင်း၊ ရန်ကုန်မြို့တွင် ချင်း၊ ကချင်၊ ကယား၊ မွန်၊ ရခိုင် လူမျိုးများ ကိုယ်ပိုင်အဆောက်အဦးများ အသီးသီးရှိကြကြောင်း၊ ပအိုဝ်းအမျိုးသားပိုင် အဆောက်အဦး၊ တောင်ကြီးမြို့တွင် ရှိသင့်သည်မှာ ကြာပြီဖြစ်ကြောင်း အမျိုးသားပိုင် အဆောက်အဦးကို ရရှိအောင် ဆွေးနွေးကြစေလိုကြောင်း ဆွေးနွေးသွားခဲ့ကြပါသည်။
အဆောက်အဦး ၀ယ်ယူရေးနှင့် ပတ်သက်၍ ဗဟိုဦးစီးအဖွဲ့ဝင် ဦးအုံးဖါဖြိန်း၊ ဦးပေါင်စင်ထွန်း၊ ဦးခွန်စိန်၊ ဦးဖြူနှင့် ဦးဆရာပေ (နောင်စုံ) တို့က အမျိုးသားပိုင် အဆောက်အဦး ၀ယ်ယူရန် ဆွေးနွေးကြရာ ပဏာမညီလာခံမှ အတည်ပြုနိုင်ရန် ဦးဆရာပေ (နောင်စုံ) က အဆိုတင်သွင်း၍ ဦးအောင်သိန်း (ထီတခုခရိုင်) ကထောက်ခံပြီး၊ တောင်ကြီးမြို့၊ ဈေးပိုင်းရပ်၊ ကုန်သည်လမ်းအမှတ် (၉၈) ဦးပဉ္စင်းဘဖြူတိုက်ကို ကျပ် ၈၀၀၀၀ိ/-(ကျပ်ရှစ်သောင်းတိတိ) ဖြင့် ၀ယ်ယူရန် အများသဘောတူ ဆုံးဖြတ်ခဲ့ကြပါသည်။
အဆိုပါ အဆောက်အဦးဝယ်ယူရန် စိတ်အားထက်သန်စွာ ရံပုံငွေ ထည့်ဝင်လှူဒါန်းခဲ့ကြသော ခရိုင်ကြီးငယ်များမှ ရရှိသောငွေများမှာ၊ (၁) လွယ်ပွတ်ခရိုင်-၉၅၀၀ိ/-၊ (၂) မဲနယ်တောင်ခရိုင်-၇၅၀၀ိ/-၊ (၃) ကျောက်တန်းခရိုင်-၅၅၀၀ိ/-၊ (၄) ထီတခုခရိုင်-၇၅၀၀ိ/-၊ (၅) ဆဲလင်ခရိုင်-၁၅၀၀ိ/-၊ (၆) စန်းသန်းကောင်ခရိုင်-၉၅၀၀ိ/-၊ (၇) မူရားခရိုင်-၈၀၀၀ိ/-၊ (၈) ဆောင်ဖိုးခရိုင်-၆၀၀၀ိ/-၊ (၉) နောင်ကားခရိုင်-၆၅၀၀ိ/၊ (၁၀) ပင်မွန်းခရိုင်-၈၀၀၀ိ/၊ (၁၁) မန်းဆောင်းခရိုင်-၇၀၀၀ိ/၊ (၁၂)ပင်မှီခရိုင်-၃၀၀၀ိ/ စုစုပေါင်း ကျပ်-၈၀၀၀၀ိ/-(ကျပ်ရှစ်သောင်းတိတိ) ဖြစ်ကြောင်း သိရပါသည်။
အဆောက်အဦးကို ၀ယ်ယူခဲ့ကြသော အမျိုးသားခေါင်းဆောင်များက တစ်မျိုးသားလုံး သွေးနှင့်ချွေး ဖြင့် ရင်းနှီးမြှုပ်နှံခဲ့ရသော၊ ပအိုဝ်းအမျိုးသားပိုင် အဆောက်အဦးကြီးကို ပအိုဝ်းတစ်မျိုးသားလုံး၏ အထိန်အမှတ်အဖြစ်၊ ပိုမိုကောင်းမွန်သော၊ တည်တံ့ခိုင်မြဲသော၊ အကျိုးဖြစ်ထွန်းဖွယ် အခြေအနေရောက်ရှိရန် ၀ိုင်းဝန်းကြိုးပမ်း ထိန်းသိမ်းသွားကြရန် ခေါင်းဆောင်ကြီးများက အကြိမ်ကြိမ်၊ အဆင့်ဆင့် မှာကြားသွားခဲ့ကြကြောင်း သိရပါသည်။ ၁၉၅၈-ခုနှစ်တွင် ကိုယ်ကျိုးစွန့် အနစ်နာခံ၊ မျိုးချစ်စိတ်ဓါတ်ပြင်းထန်သော ပအိုဝ်းမျိုးချစ်လူငယ်များ၏ ထည့်ဝင်လှူဒါန်းငွေများဖြင့်၊ ယခုလက်ရှိဝင်းအတွင်းမြောက်ဘက် အဆောက်အဦးသစ် တစ်လုံးကို၊ တောင်ကြီးမြို့ကန်ထရိုက် ဦးကျန်အား ဆောက်လုပ်စေခဲ့သည်။ ငါးနှစ်အတွင်း အဆောက်အဦး ထိန်းသိမ်း ကြီးကြပ်သူများ၏ ကိုယ်ကျိုးမဖက်၊ မှန်မှန်ကန်ကန်ဆောင်ရွက်သွားမှုနှင့် ပြည်သူလူထု၏ ပူးပေါင်းပါဝင်မှုကြောင့် အမျိုးသားပိုင် အဆောက်အဦး တစ်လုံးမှ နှစ်လုံးသို့ ဂုဏ်ယူဝင့်ကြွားစွာ ပေါ်ထွန်းလာနိုင်ခဲ့ပါသည်။
အမျိုးသားပိုင် အဆောက်အဦးအတွင်း ပအိုဝ်းအမျိုးသားစာပေ ပြန့်ပွားတိုးတက်ရေးအတွက် ပုံနှိပ်တိုက်လုပ်ငန်းများ၊ အမျိုးသားစီးပွားရေး ဖွံ့ဖြိုးတိုးတက်ရေးအတွက် သီးနှံနှင့် သနပ်ဖက်စုပေါင်း ရောင်းဝယ်ရေး သမ၀ါယမရုံးများ ဖွင့်လှစ်ဆောင်ရွက်ခဲ့ပြီး နိုင်ငံရေးအသိအမြင် နိုးကြားတက်ကြွမည့် လူငယ်ခေါင်းဆောင်များ မွေးထုတ်ပေးရာ ဘူမိနက်သန် အဆောက်အဦးပင် ဖြစ်ပါသည်။ တစ်နည်း အားဖြင့် အမျိုးသားထု တစ်ရပ်လုံး၏ နိုင်ငံရေး၊ စီးပွားရေး၊ လူမှုရေး၊ စာပေနှင့် ယဉ်ကျေးမှု တိုးတက်ရာ တိုးတက်ကြောင်း၏ ဗဟိုချက်မကြီးပင် ဖြစ်သည်။
၁၉၆၄-ခုနှစ်တွင် မြန်မာနိုင်ငံရေး အခြေအနေပြောင်းလဲမှုကြောင့် အမျိုးသားရေးလုပ်ငန်းများ၊ ရပ်စဲသွားခဲ့ရပါသည်။ အမျိုးသားပိုင် မူလအဆောက်အဦးနှစ်လုံးအပြင်၊ မော်တော်ကားများ၊ ထွန်စက် များ၊ ဆန်စက်ကြီးများ၊ ဈေးများ၊ ဂိုဒေါင်များ၊ ရေကန်များ၊ စာသင်ကျောင်းများ၊ မြို့နယ်များမှ ရောင်းဝယ် ရေးဒိုင် အဆောက်အဦးများ၊ ကတ္တားများ၊ မီးခံသေတ္တာများ၊ ရုပ်ရှင်များနှင့် ရုံးသုံးပရိဘောဂပစ္စည်းများ များစွာရှိခဲ့ကြောင်း၊ သက်ကြီးစကား သက်ငယ်ကြားအရ သိရပါသည်။ အမျိုးသားပိုင် ပစ္စည်းများကို တာဝန်ယူ ထိန်းသိမ်းဆောင်ရွက်ပေးမည့် အဖွဲ့အစည်း၊ လူပုဂ္ဂိုလ် မရှိခဲ့သဖြင့် အလေအလွင့်၊ အပျက် အစီး၊ ပျောက်ဆုံးမှု များစွာ ရှိခဲ့ကြောင်း သိရပါသည်။
၁၉၇၂-ခုနှစ်တွင် အမျိုးသားပိုင်ပစ္စည်းများ မပျောက်မပျက်စေရန် ထိန်းသိမ်းပေးမည့်အဖွဲ့ တစ်ဖွဲ့ကို၊ ရှမ်းပြည်နယ်လုံခြုံရေးနှင့် အုပ်ချုပ်ရေးမှု ကော်မတီမှ ဖွဲ့စည်းပေးခဲ့ကြောင်း သိရပါသည်။ ထိုအဖွဲ့ကို ဥက္ကဌအဖြစ် ဦးဖြူ၊ အတွင်းရေးမှူး ဦးခွန်စိန်နှင့် အဖွဲ့ဝင် ဦးရွေ၊ ဦးပညာ၊ ဦးဘော်ဘီ၊ ဦးယွေး ဦးထွန်းကျော်၊ ဦးထွန်းအောင် အစရှိသော ပုဂ္ဂိုလ်များ ပါဝင်ခဲ့ကြကြောင်း သိရပါသည်။
၁၉၈၇-ခုနှစ်တွင် ပအိုဝ်းအမျိုးသားပိုင် ပစ္စည်းထိန်းသိမ်းရေးကော်မတီအသစ် ဖွဲ့စည်းနိုင်ရေးအတွက် ဥက္ကဌ ဦးပေါင်စင်အိုးနှင့် အတွင်းရေးမှူး ဦးခွန်ကျော်ဇေယျတို့ ဦးဆောင်သော ကော်မရှင် အဖွဲ့ကို၊ ရဟန်းသံဃာတော်များ မြို့မိမြို့ဖများ လူငယ်ကျောင်းသူ/ကျောင်းသားများ၏ ဆန္ဒအရ ဖွဲ့စည်းခဲ့ကြောင်း သိရသည်။ ပစ္စည်းထိန်းဖွဲ့စည်းရေးကော်မရှင်မှ ညှိနှိုင်းအစည်းအဝေးများ အကြိမ်ကြိမ်ကျင်းပပြီး ၁၉၈၇-ခုနှစ်၊ မတ်လ (၃၀) ရက်နေ့တွင် လက်ရှိပစ္စည်းထိန်းသိမ်းရေးကော်မတီကို ဖွဲ့စည်းပေးခဲ့ပါသည်။
လက်ရှိ ဂေဟာထိန်းသိမ်းရေးအဖွဲ့တွင် နာယကကြီးများအဖြစ် ဦးကျော်စိန်၊ ဦးဆရာအိုး၊ ဦးဘဖြူ တို့က လည်းကောင်း၊ ဥက္ကဌ ဦးဇော်အောင်သိန်း၊ ဒု-ဥက္ကဌ ဦးခင်မောင်မြင့်နှင့် ဦးကျောင်းအောင်တို့က လည်းကောင်း၊ အတွင်းရေးမှူး ဦးကျော်သိန်း၊ တွဲဘက်အတွင်းရေးမှူး ဦးသန်းရွှေ၊ ဦးခွန်ကျော်ဇေယျတို့က လည်းကောင်း၊ ဘဏ္ဍာထိန်း၊ ဦးထွန်းလွင်၊ ဦးခွန်သိန်းဖေတို့က လည်းကောင်း အဖွဲ့ဝင် ဦးခွန်ကျော်စွာ၊ ဦးသန်းဖေ၊ ဦးကျောင်းကုံရ၊ ဦးမော်ဝါယမတို့ အသီးသီး ပါဝင်ခဲ့ကြပါသည်။
အဖွဲ့အစည်းများ၏ လုပ်ထုံးလုပ်နည်းများအရ ပစ္စည်းလက်ကျန်၊ ငွေသားလက်ကျန် ရရန် ပေးရန် ငွေစာရင်း၊ ဘဏ်စာရင်း စသည်များကို ကော်မတီအဟောင်းမှ ကော်မတီအသစ်သို့ စာရင်းဇယား အတိအကျဖြင့် လွှဲပြောင်းပေးသူ၊ လက်ခံရရှိသူ၊ လက်မှတ်ရေးထိုးကာ တရားဝင်လွှဲပြောင်းပေး လေ့ရှိပါသည်။
အဖွဲ့အသစ် ဖွဲ့စည်းပြီး လပေါင်းအတော်ကြာသော်လည်း ပအိုဝ်းအမျိုးသားပိုင် အဆောင်အဦး၊ ပစ္စည်း၊ ပရိဘောဂ၊ ဘဏ်ငွေ လက်ကျန်၊ ငွေသားလက်ကျန်၊ ဖိုင်တွဲ၊ စာရင်းဇယား စာအုပ်စာတမ်းများကို ယခင်ကော်မတီအဟောင်းမှ လွှဲပြောင်းပေးခြင်း မရှိခဲ့ပါ။
အမှုဆောင်သစ် ဖွဲ့စည်းပြီး (၇) လအကြာ ၁၉၈၇-ခုနှစ်၊ ဒီဇင်ဘာလ (၃၁) ရက်နေ့တွင် ကော်မတီအဟောင်း တာဝန်ရှိ ပုဂ္ဂိုလ်ထံမှ နောက်တစ်နှစ် ၁၉၈၈- ခုနှစ် ဂိုဒေါင်ငှားရမ်းခ ကြိုတင်ငွေ-(၁၁၀၀၀)-(ကျပ်တစ်သောင်းတစ်ထောင်တိတိ) နှင့် အုတ်နံရံများ ပြုပြင်ရန်ငွေ-(၅၀၀)-(ကျပ်ငါးရာတိတိ) စုစုပေါင်း ငွေသား-(၁၁၅၀၀)-(ကျပ်တစ်သောင်း တစ်ထောင်ငါးရာတိတိ) ကို လက်ခံရရှိပါသည်။ အခြားစာရင်းဇယားပိုင်း၊ မှတ်တမ်းမှတ်ရာ ဘဏ်ငွေစာရင်းလက်ကျန် ရရန် ပေးရန်များကို တစုံတရာမျှ လက်ခံရရှိခဲ့ခြင်း မရှိကြောင်း အစီရင်ခံအပ်ပါသည်။
ပအိုဝ်းဂေဟာအဖွဲ့သစ် အနေဖြင့် ယခုလက်ရှိ အဆောင်အဦးကြီး နှစ်လုံးနှင့် ငွေသား-(၁၁၅၀၀)-(ကျပ်တစ်သောင်း တစ်ထောင်ငါးရာတိတိ) ကိုသာ လက်ခံရရှိခဲ့သဖြင့် လက်ခံရရှိသော ငွေသားကို လုံခြုံမှုရှိစေရန် ဥက္ကဌ ဦးဇော်အောင်သိန်းနှင့် ဘဏ္ဍာထိန်း ဦးထွန်းလွင်တို့ “တွဲဘက်အမည်ဖြင့် (၁၉-၁-၈၈) နေ့တွင် ဘဏ်တွင် ငွေစုစာအုပ်အမှတ် (အက်စ်တီ-၄၀၇၁) ဖြင့် အပ်နှံထားပါသည်။ ဤအဖွဲ့အနေဖြင့်၊ ၁၉၈၉-ခုနှစ် ဒီဇင်ဘာလအထိ ဆိုင်ခန်းခငွေ၊ လက်ကျန်ငွေနှစ်ရပ်ပေါင်း-၂၈၄၃၃/-(ကျပ်နှစ်သောင်းရှစ်ထောင်လေးရာ သုံးဆယ့်သုံးကျပ်တိတိ) ရရှိခဲ့ပါသည်။ အဆိုပါငွေများမှ အဆောက်အအုံပြင်ဆင်ထိန်းသိမ်းရေး၊ မီးပြုပြင်ရေး၊ လစဉ်မီတာခ၊ သန့်ရှင်း ရေးခ၊ စံဌားခွန် စသည်များကို သုံးစွဲခဲ့ရာ-၂၀၉၂၆/-(နှစ်သောင်းကိုးရာနှစ်ဆယ့်ခြောက်ကျပ်တိတိ) ကုန်ခဲ့ပါသည်။ သို့ပါ၍ ယခုဘဏ္ဍထိန်းလက်ဝယ် ကျန်ရှိငွေမှာ-၇၅၀၆/-ကျပ်ခုနှစ်သောင်းငါးရာခြောက်တိတိ) ရှိပါသည်။
၁၉၈၈ ခုနှစ်၊ နိုဝင်ဘာလတွင် ပါတီစုံဒီမိုကရေစီအထွေထွေ ရွေးကောက်ပွဲကျင်းပရေး ကော်မရှင်တွင် မှတ်ပုံတင် ခွင့် ရရှိခဲ့သော ပြည်ထောင်စုပအိုဝ်းအမျိုးသားအဖွဲ့ချုပ် (ပ၊ အ၊ မ၊ ဖ) က ပစ္စည်းထိန်းအဖွဲ့ ဥက္ကဌထံ (၁၀-၁၁-၈၈) နေ့စွဲပါ စာအမှတ် ပအ/၂၇/စီမံ (၁) ဖြင့် အမှတ် (၉၈) ကုန်သည်လမ်း၊ ဈေးပိုင်းရပ်၊ တောင်ကြီးမြို့ကို အကွက် အမှတ် (၂၀)၊ ဦးပိုင်အမှတ် (၁၈) ပေါ်ရှိ အကျယ်အ၀န်း စတုရန်းပေ-၇၀၅၈ ရှိ အဆောက်အအုံ နှစ်လုံးအား ငှားရမ်းသုံးစွဲခွင့်ပြုပါရန် တောင်းခံလာခဲ့ပါသည်။ ပအိုဝ်းဂေဟာထိန်းသိမ်းရေးအဖွဲ့မှ (၁၃-၁၁-၈၈) နေ့တွင် အစည်းအဝေးခေါ်ယူကာ ပအိုဝ်းဂေဟာအဆောက်အဦး နှစ်လုံးကို (ပ၊ အ ၊ မ၊ ဖ) သို့၊ ၁၉၈၉ ခုနှစ်၊ ဇန်န၀ါရီလ (၁) ရက်နေ့မှ စတင်ငှားရမ်းခွင့်ပြုရန်နှင့် ငှားရမ်းသုံးစွဲရေး စာချုပ်ကို၊ ဈေးပိုင်းရပ်ကွက်၊ ငြိမ်းဝပ်ပိပြားမှု တည်ဆောက်ရေးအဖွဲ့အား သက်သေထားပြီး ( ပ ၊ အ၊ မ၊ ဖ) အမှုဆောင်နှစ်ဦး ဂေဟာအမှုဆောင်နှစ်ဦးတို့ ငှားရမ်းစာချုပ် ချုပ်ဆိုရန် အများသဘောတူ ဆုံးဖြတ်ခဲ့ပါသည်။
၁၅-၁၁-၈၈ နေ့တွင် ပအိုဝ်းဂေးဟာအဆောက်အဦးအား (ပ၊ အ၊ မ၊ ဖ) သို့ တစ်လလျှင် ၁၆၀၀/ (ကျပ်တစ်ထောင့်ခြောက်ရာတိတိ) ဖြင့် ငှားရမ်းစာချုပ်ကို ဈေးပိုင်းရပ် ငြိမ်ဝပ်ပိပြားမှုတည်ဆောက်ရေးအဖွဲ့ ဥက္ကဌနှင့် အဖွဲ့ဝင်တို့ကို သက်သေထား၍ (ပ၊ အ၊ မ၊ ဖ) မှ ဥက္ကဌဦးကျော်သိန်း၊ ဦးထွန်သာ (ခ) ဦးခဲ၊ ပအိုဝ်းဂေဟာမှ ဦးသန်းရွှေ၊ ဦးကျောင်းကုံရ တို့ လက်မှတ်ရေးထိုး ချုပ်ဆိုခဲ့ပါသည်။
အမျိုးသားပိုင်အဆောက်အအုံကို (ပ၊ အ၊ မ၊ ဖ၊) အမှုဆောင်နှင့် ၀န်ထမ်းများက အနီးကပ် ကြပ်မတ်စောင့်ရှောက် ပေးနိင်သဖြင့် ပို၍ကောင်းမွန်လာပါသည်။ ပအိုဝ်းဂေဟာအဖွဲ့အနေဖြင့် မိမိတာဝန်ယူ လက်ခံထားသော ငွေ၊ အဆောက်အဦး၊ စာရင်းဇယားများကို စနစ်တကျ မှတ်တမ်းမှတ်ရာ ထားရှိခဲ့ပါသည်။
အဆောက်အအုံမြေဂရံကိုလည်း ယခင်ဦးကျောင်းကုံရ အမည်မှ ပအိုဝ်းဂေဟာအမည်သို့ ပြောင်းလဲပြီး ဥက္ကဌ ဦးဇော်အောင်သိန်းထံတွင် သိမ်းဆည်းထားပါသည်။ မည်သို့ပင်ဖြစ်စေ ပအိုဝ်ဂေဟာထိန်းအနေဖြင့်သော် လည်းကောင်း အဆောက်အဦးကို ငှားရမ်းအသုံးပြုသော (ပ၊အ၊မ၊ဖ) သည်လည်းကောင်း ပအိုဝ်အမျိုးသားများသာ ဖြစ်သည်။ အမျိုးသားပိုင် အဆောက်အအုံ၊ အမျိုးသားရေး အသိစိတ်ဓာတ်ကိုယ်စီဖြင့် ထိန်းသိမ်းစောင့်ရှောက်သွားကြရန် လိုအပ်မည် ဖြစ်သည်။ မိဘပြည်သူတစ်ရပ်လုံးကလည်း၊ ပအိုဝ်းဂေဟာအဖွဲ့၏ ပျော့ကွက်ဟာကွက် အားနည်းချက်များကို အမျိုးသားအကျိုးကို ရှေ့ရှုကာ သွန်သင်ဆုံးမ အကြံပြုကြရန် မေတ္တာရပ်ခံအပ်ပါသည်။
ထို့ကြောင့် ပအိုဝ်းအမျိုသားများ၏ အသက်သွေး၊ ချွေးတို့ဖြင့် ရယူတည်ဆောက်ခဲ့ရသော အဆောက်အဦးကြီးကို ကမ္ဘာတည်သရွေ့ တည်တံ့ခိုင်မြဲပြီး၊ တိုးတက်သည်ထက် တိုးတက်အောင် ကြိုးပမ်းသွားကြရန်မှာ ပအိုဝ်းဂေဟာထိန်းအဖွဲ့ သာမက၊ မိဘပြည်သူအမျိုးသားများ ကိုယ်စီတွင် သမိုင်းပေးရန် တာဝန်ရှိကြပါသည်။ ပအိုဝ်းဂေဟာထိန်းသိမ်းရေးအဖွဲ့၏ ဆောင်ရွက်ချက်အခြေအနေများကို လက်လှမ်းမှီသမျှ၊ ပြည်သူသို့ တင်ပြအစီရင်ခံရာတွင် အမှားအယွင်း အတိမ်းအစောင်းရှိပါက ပြုပြင်ပေးပါရန် လေးစားစွာ တင်ပြအစီရင်ခံ အပ်ပါသည်။
ဦးခင်မောင်မြင့်
ဥက္ကဌ (ကိုယ်စား)
ပအိုဝ်းဂေဟာထိန်းသိမ်းရေးအဖွဲ့
တောင်ကြီးမြို့
(၈-၃-၁၉၉၀) ရက်နေ့
No comments:
Post a Comment