ဇွန်လ ၅ ရက်၊ ၂၀၁၀။ စနေနေ့
တောင်ကြီးမြို့အနီးရှိ ပင်းပက်သံမဏိစက်ရုံတွင် လွန်ခဲ့သည့် ဧပြီလ သင်္ကြန်ပြီးသည့် နောက်ပိုင်းမှစတင်၍ ပညာအရည်အချင်း အနည်းဆုံး ၈ တန်းအောင်၊ အသက် ၁၇ နှစ်နှင့် အထက်ရှိသူများအား အလုပ်သင်အဖြစ် ခေါ်ယူနေကြောင်း သိရသည်။ အလုပ်သင်များခေါ်ယူရာတွင် စက်ရုံအနီးဝန်းကျင်ရှိ ဒေသခံရွာသူ ရွာသားများကို အဓိက ဦးစားပေးခေါ်ယူကြောင်း သိရသည်။
အလုပ်သင်မှတဆင့် စက်ရုံမှ သတ်မှတ်ထားသည့် အရည်အချင်းနှင့် ပြည့်စုံပါက စက်ရုံမှ ၎င်းတို့ အလုပ်နှင့် သက်ဆိုင်သည့်ပညာရပ်များ ၂ နှစ် သင်ပေးမည့်ဖြစ်ပြီး၊ ပညာသင်ပေးစဉ် အတွင်း အလုပ်သင်များ ကိုယ့်စရိတ်နှင့် ကိုယ်သာ အကုန်ကျခံရမည်ဟု ဆိုသည်။
အဆိုပါ ၂ နှစ်သင်တန်းပြီးဆုံးလျင် လစာ ကျပ်ငွေ ၄၀၀၀၀ မှ ၅၀၀၀၀ အထိဖြင့် အခြေခံဝန်ထမ်းများ အဆင့်မှစပြီး အလုပ်စတင်ခန့်အပ်သည်ဟု သိရသည်။ လက်ရှိချိန်တွင် တချို့အလုပ်သင်များမှာ သင်ကြားမှုများစတင်နေပြီဖြစ်ပြီး နံနက်ပိုင်းတွင် စာသင်ပေး၍ ညနေပိုင်းတွင် ကွင်းဆင်းလက်တွေ့လုပ်ဆောင်မှုများ ပြုလုပ်သည်ဟု ဆိုသည်။
ယင်းစက်ရုံအလုပ်သင်များမှာ အနီးဝန်းကျင်ရှိဒေသခံရွာသားများကို အဓိကဦးစားပေး ခေါ်ယူသော်လည်း ဒေသခံပအိုဝ်းလူငယ် အများစုက စိတ်ဝင်စားမှုမရှိကျပဲ အနည်း အကျဉ်းမျသာ ၀င်လုပ်ကြပြီး၊ များသောအားဖြင့် မြန်မာပြည်အလယ်ပိုင်းမှ လူငယ်များလာရောက်လုပ်ကိုင်ကြသည်ဟု ပင်းပက်သံမဏိစက်ရုံကို အနီးကပ်စောင့်ကြည့်နေသည့် အမည်မဖေါ်လိုသည့် ဒေသခံတစ်ဦးက ဆိုသည်။
ထို့အတူ ပင်းပက်ကမ္ဘောဇဘိလပ်မြေစက်ရုံသည်လည်း စက်ရုံအလုပ်သမားများကို စက်ရုံအနီးဝန်းကျင်ရှိဒေသခံရွာသားများ အဓိကခေါ်ယူသော်လည်း အလားတူ ရွာသားများက စိတ်ဝင်စားမှု မရှိကြောင်း သိရသည်။
စက်ရုံပတ်ဝန်းကျင်ရှိကျေးရွာများမှ ဒေသခံရွာသားများသည် အခြေခံပညာ အလယ်တန်း ကျောင်းအောင်သည့်သူများ မရှိသလောက်ဖြစ်၍ အလုပ်သင်ခေါ်ယူရာတွင် ၎င်းတို့ သတ်မှတ်ထားသည့် ပညာအရည်အချင်းများအား ဒေသခံလူငယ်အများစုနှင့် ကိုက်ညီမှုမရှိကြောင်း ပင်းပက်သတ္တုစီမံကိန်းနှင့်ပတ်သက်သည့် “အနာဂတ်ကို လုယူဖျက်ဆီးခြင်း” အမည်ရှိ အစီရင်ခံစာထုတ်ဝေရာတွင် အဓိကပါဝင်သူ ခွန်ချန်ကီမှ ဆိုသည်။
“စက်ရုံမှာတာဝန်ရှိတဲ့သူတွေ အဲဒီဒေသခံက အခြေအနေတွေကို သူတို့သိတယ်။ ပင်ငိုရွာနှင့် ၆ မိုင်ရွာကလွဲလို့ ကျန်တဲ့ရွာမှာ ၈ တန်းအောင်တဲ့လူတွေ မရှိသလောက်အလွန်နဲတယ်ဆိုတာ သူတို့သိတယ်။ ဦးစားပေးအလုပ်ခေါ်လဲ သူတို့လုပ်နိုင်မှာမဟုတ်မှန်းသိတယ်။”
စက်ရုံတွင် အလုပ်ရမည်ဆိုသော်လည်း ထမင်းချက် သန့်ရှင်းရေးအလုပ်၊ ဂိတ်စောင့်အလုပ်နှင့် အခြားသော အလုပ်ကြမ်းများသာ လုပ်ရမည်ဖြစ်သည့်အတွက်ကြောင်း ဒေသအတွင်း အရည်အချင်းရှိသည့်ဘွဲ့ရလူငယ်များလည်း ၀င်လုပ်လိုသည့်စိတ်မရှိကြကြောင်း ၎င်းကဆိုသည်။
“၂၀၀၄၊ ၂၀၀၅ နှင့် ၂၀၀၆ ခုနှစ်လောက်မှာလဲ သူတို့အလုပ်သမားတွေ ခေါ်တယ်။ အလုပ်လျှောက်ချင်တဲ့လူတွေ လျှောက်လွှာတွေဝယ်ရတယ်၊ နောက်ဆုံးတော့ နှစ်ယောက်ပဲအလုပ်ရတယ်၊ နှစ်ယောက်စလုံးဘွဲ့ရတွေပဲ၊ တစ်ယောက်က တမင်းချက်တယ်၊ တယောက်က သန့်ရှင်းရေးအလုပ်ပဲ လုပ်ရတယ်။ အခုတခါပြန်ခေါ်တော့ လူတွေစိတ်မ၀င်စားတော့ဘူး”
ပင်းပက်သံမဏိစက်ရုံနှင့် ပင်းပက်တောင်သံသတ္တုရိုင်းတူးဖေါ်ရေးစီမံကိန်းလုပ်ငန်းအား ၂၀၀၄ ခုနှစ်တွင် စတင်ခဲ့ပြီး၊ ရုရှားအစိုးရပိုင် Tyazhpromexport ကုမ္ပဏီမှ အမေရိကန်ဒေါ်လာ သန်း ၁၅၀ ရင်းနှီးမြုပ်နှံထားသည်။
ယင်းစီမံကိန်းကြောင့် ဒေသခံပြည်သူထုများပိုင်ဆိုင်သည့် မြေယာဧကပေါင်း ၁၁၀၀၀ သိမ်းပိုက်ခြင်းခံခဲ့ရပြီး ဒေသခံရွာသားအယောက် ၅၀ ကို နေရာရွှေ့ပြောင်းခဲ့သည်မက၊ စီမံကိန်းအနီးရှိနောက်ထပ် ရွာပေါင်း ၂၅ ရွာနှင့် ဒေသခံပြည်သူလူထုပေါင်း ၇၀၀၀ ကျော်အား နေရာရွှေ့ပြောင်းခံရဖွယ်ရှိကြောင်း ၂၀၀၉ ခုနှစ် ဇွန်လတွင် ပအိုဝ်းလူငယ်အစည်းရုံးမှ ထုတ်ဝေသည့် "အနာဂတ်ကို လုယူဖျက်ဆီးခြင်း" အမည်ရှိ အစီရင်ခံစာတွင်ဖေါ်ပြသည်။
No comments:
Post a Comment