ဇွန်လ ၁၄ ရက်၊ ၂၀၁၀။ တနင်္လာနေ့
တောင်းကြီးမြို့နယ်ရှိ ဖာမွန်းကျေးရွာအုပ်စု ထီးရောင်းကျေးရွာအုပ်စုတို့မှ၊ ထီဟန်းဆွေးရွာ လွယ်ကောင်းရွာ၊ ညိုမွူးရွာ၊ ထီရောင်းရွာ၊ ဆင်တွူးရွာ၊ ဖာမွန်းရွာ စသည့်ကျေးရွာများနှင့် ဟိုပုံးချိုင့်ဝန်းလွင်ပြင်ရှိ ဟိုပုံးနှင့် ဆီဆိုင်မြို့နယ်အတွင်းရှိ လယ်သမားများသည် စိုက်ပျိုးရေးလုပ်ငန်းများ ပြုလုပ်ရန် တဘက်ချောင်းကိုအဓိကမှီခိုကြသည်။
ယခုချိန်ထိမိုးမရွာသောကြောင့် တစ်ဘက်ချောင်းမှာ ရေများခန်းခြောက်နေသည့်အပြင် အစိုးရမှ ဆောက်လုပ်ထားသည့်ဆည်မှာလည်း ရေအနည်းငယ်သာရှိပြီး ဆည်ထိန်းများမှ ခုချိန်ထိ ရေမလွတ်ပေးသေးသဖြင့် လယ်လုပ်သမားများ လယ်လုပ်ရန် ရေမရှိ၍ ဒုက္ခရောက်နေ ကြသည်။ တချို့သောလယ်သမားများသည် ကောက်စိုက်ရန် ၎င်းတို့ပျိုးထားသည့်စပါးပင်များမှာ ပျိုးသက်ပြည့်သော်လည်း မိုးမရွာသဖြင့် မနုတ်နိုင်ပဲ ပျိုးထားသည့်အပင်များ ပျိုးသက်လွန်၍ အလဟဿဖြစ်ကုန်ကြသည်။ ထို့အတူ ထွန်ယက်စိုက်ပျိုးချိန်တန်သော်လည်း မထွန်ယက် မစိုက်ပျိုးနိုင်သဖြင့် အလုပ်လက်မဲ့ပြဿနာ ကြုံနေရသည်။
“ကျနော်တို့ လယ်ဆင်းတာကြာပြီ။ ဒါပေမယ့် ခုထိ မိုးကမရွာသေးတော့ ကျနော်ဘာလုပ်လို့ လုပ်ရမှန်းတောင် မသိတော့ဘူး၊ နွားကျောင်း၊ ကျွဲကျောင်းကလွဲလို့ ဘာမှလုပ်လို့မရပဲ ဖြစ်နေတယ်။ ရွာပြန်တော့လည်း ရွာမှာဘာမှ လုပ်စရာမရှိတော့ဘူး၊ တောင်ပေါ်မှာလဲ မိုးမရွာသေးဘူးလို့ မနေ့ကမှဆင်းလာတဲ့ ကျနော်တို့ရွာလူတစ်ယောက်က အဲလိုပြောတယ်။ အစိုးရဆည်ရေကို မျော်ပြန်တော့လည်း ဆည်ကလူကြီးတွေ ရေမဖွင့်သေးတော့ ဘာမှလုပ်လို့ မရဘူးဖြစ်နေတယ်။ ခုဆိုရင်ပျိုးထားတဲ့ စပါးပျိုးသက်ကလဲ တစ်လပြည့်ပြီ ပျိုးသက်တော့လွန်နေမှာပဲလေ၊” ဟု တဘက်ချောင်းကို မှီခိုနေသည့် တောင်ကြီးမြို့နယ်မှ လယ်လုပ်သူတစ်ဦးက ဤသို့ ဆိုသည်။
No comments:
Post a Comment