တန်ဖိုးနည်းဖုန်းကိုမဲစနစ်ဖြင့်လုပ်ပေးရန်ပြည်သူတောင်းဆို

ခွန်နဂါးဗွာ | ဒီဇင်ဘာ ၁၀ ရက်၊ ၂၀၁၃ ခု | တောင်ကြီးတိုင်းမ်

ဆီဆိုင်မြို့နယ် နောင်ကျောကျေးရွာအုပ်စုတွင် မြန်မာ့ဆက်သွယ်ရေးမှ ချပေးသော တန်ဖိုးနည်းဖုန်းကို ပွင့်လင်း မြင်သာမှုရှိအောင် ကျေးရွာအုပ်ချုပ်ရေးမှူးဥက္ကဌ ဦးစိုး (ဖြားဒုံစိုး) က ပြည်သူများကို မဲစနစ်ဖြင့် ပြုလုပ်ပေးခြင်း မရှိဘဲ၊ သူ့ဆန္ဒအတိုင်း သူပေးလိုသောသူကိုသာ ပေးနေကြောင်း အမည်မဖေါ်လိုတဲ့ နောင်ကျောကျေးရွာအုပ်စုနေ ရွာသားတစ်ဦးက ပြောသည်။

“ဆီဆိုင်မြို့နယ် နောင်ကျောကျေးရွာအုပ်ချုပ်ရေးမှူးက တန်ဖိုးနည်းဖုန်းကို မဲနိုက်စနစ်နဲ့ မဟုတ်ဘဲနဲ့ ပေးချင်တဲ့သူကိုသာ ပေးနေတယ်။ ဖုန်းကို တရားဝင်မဲစနစ်နဲ့ လုပ်ပေးဖို့၊ လျှောက်ထားတဲ့လူတွေကိုလည်း သူ့ကံနှင့်သူ သွားနိုက်ခိုင်းသင့်တယ်။ လျှောက်ထားတဲ့ လျှောက်လွှာအဟောင်းတွေ အကုန်လုံးမီးရှို့ လိုက်တယ်။ နောက်ထပ်လျှောက်မယ်ဆိုလည်း ဓါတ်ပုံဖိုး ဖေါင်ဖိုအတွက် နှစ်နာခဲ့ရတယ်။ မလျှောက်ထားတဲ့သူကလည်း မေးနေတယ်။ အပတ်တိုင်းလျှောက်ပြီးတော့ အပတ်တိုင်းရနေတဲ့သူလည်း ရှိတယ်။ အစကတည်းက လျှောက်ထားတဲ့သူမှာ ယခုထိမရသေးတဲ့သူလည်း ရှိတယ်။ ဟုတ်မဟုတ် အထက်လူကြီးတွေက လာရောက်စစ်ဆေးပေးသင့်တယ်။” ဟု နောက်ကျောကျေးရွာအုပ်စုနေ အမည် မဖော်လိုတစ်ဦးက ပြောသည်။

ဖုန်းလျှောက်ချင်သူ ပြည်သူတစ်ဦးက ဖုန်းကို မဲစနစ်ဖြင့် ဖြန့်ဝေရောင်းချဖို့အစီအစဉ်ရှိ မရှိ အုပ်ချုပ်ရေးမှူး ဦးစိုးကို သွားမေးရာတွင် အုပ်ချုပ်ရေးမှူးက “မပေးဘူး ဒီဖုန်းဟာ PYN လူငယ်ကွန်ယက်တွေအတွက်နဲ့ ရွာသူကြီးများအတွက်သာ ဦးစားပေးရတယ်” ဟု ပြောကြောင်း သိရသည်။

နိုင်ငံတော်မှ ညွှန်ကြားစာတွင် တန်ဖိုးနည်းဖုန်းကို တစ်ယောက်နှင့် တစ်ယောက် လုယက်ဝယ်ယူပြီး ခိုက်ရန်ဖြစ်ခြင်းမရှိစေရန် မဲစနစ်ဖြင့် ချခိုင်းသည်ကို အဘယ်ကြောင့် မလုပ်ပေးသနည်းဟု ဆက်လက်မေးမြန်းရာတွင် “ငါကတော့မသိဘူး၊ နောက်ဆို အများကြီး ပေါ်လာမှာ။ လမ်းပေါ်ပုံရောင်းပြီး ခင်ဗျားတို့ ပိုက်ဆံရှိမှာမဟုတ်ဘူး။” ဟု အုပ်ချုပ်ရေးမှူး ဦးစိုးက ဖုန်းလာလျှောက်သောသူကို ပြောလိုက်ကြောင်း သိရသည်။

အုပ်ချုပ်ရေးမှူးအလုပ်သည် ၀င်ငွေလစာမဲ့ လုပ်နေရခြင်းမဟုတ်ပဲ၊ တစ်လကို လစာ တစ်သိန်းနှစ်သောင်း ရပြီး လုပ်နေသည်ကို ယခုလို ပြည်သူအပေါ် တာဝန်ကျေပွန်မှုမရှိကြောင်း ပြည်သူများက ဆိုသည်။

နောင်ကျောကျေးရွာအုပ်စုတွင် ပထမအသုတ် ဖုန်းလျှောက်သူမှာ ဖုန်းကဒ်ပိုနေပြီး၊ မဲနိုက်စရာမလိုကြောင်း။ ဒုတိယအသုတ်တွင် လျှောက်ထားသူများ၍ မဲနိုက်ရကြောင်း။ တတိယအသုတ်တွင်မှု မဲစနစ်ဖြင့်ပြုလုပ်ပေးကြောင်း။ စတုတ္ထအသုတ်တွင် မဲနိုက်ပေးခြင်း မရှိတော့ကြောင်း။ ယခုငါးကြိမ်မြောက်မှာလည်း မဲနိုက်ပေးခြင်း လုပ်ပေးခြင်းမရှိကြောင်း။ အမှန်တကယ် အသုံးပြုလိုသော ပြည်သူများက မဲစနစ်ဖြင့် ပွင့်လင်းမြင်သာမှုရှိအောင် ပြုလုပ်ပေးရန်တောင်းဆိုကြကြောင်း သိရသည်။

No comments: