ထိုင်းနိုင်ငံသို့ ၀င်ရောက်အလုပ်လုပ်ကိုင်နေသည့် မြန်မာနိုင်ငံသား ရွှေ့ပြောင်းအလုပ်သမားများဟာ တရားဝင်သည့် ရွှေ့ပြောင်းအလုပ်သမားဖြစ်ဖို့ အရေးကြီးဆုံးဖြစ်ကြောင်း ထိုင်းနိုင်ငံအစိုးရ အလုပ်သမားရေးဝန်ကြီး မစ္စတာဖဒိစ်ချိုင်း ဆဆွန်ဆပ် နှင့် မြန်မာနိုင်ငံအစိုးရ အလုပ်သမား ဒုဝန်ကြီး ဦးမြင့်သိန်းတို့၏ တွေ့ဆုံဆွေးနွေးပွဲတွင် ထိုင်းအလုပ်သမားရေးရာဝန်ကြီး၏ပြောကြားချက်ကို ထိုင်းနိုင်ငံအစိုးရ အလုပ်သမားဝန်ကြီးဌာနရုံး အွန်းလိုင်း သတင်းစာမျက်နှာမှာ ဖော်ပြထားပါတယ်။
မြန်မာနိုင်ငံ အစိုးရအဖွဲ့အနေဖြင့် ထိုင်းနိုင်ငံအစိုးရအဖွဲ့နှင့် မတွေ့ဆုံမီ ထိုင်းနိုင်ငံရှိ ရွှေ့ပြောင်းအလုပ်သမားရေးရာကိစ္စဖြင့် ပူးပေါင်းဆောင်ရွက်ပေးနေသည့် အစိုးရမဟုတ်သော အဖွဲ့အစည်းများထံ ပြီးခဲ့သည် (၂၅၊ ၁၁၊ ၂၀၁၂) ရက်နေ့တွင် ထိုင်းနိုင်ငံ ဘန်ကောက်မြို့၊ မြန်မာသံရုံး၌ တွေ့ဆုံဆွေးနွေးပြီး အကြံဥာဏ်များရယူခဲ့ကြောင်းလည်း သိရပါတယ်။
"၂၀၁၃ ခုနှစ်၊ ဇန္နဝါရီလ (၁) ရက်နေ့မှာ အကောင်အထည်ဖော်ဆောင်ရွက်မယ့် ထိုင်းနိုင်ငံအတွင်းရှိ ခရိုင်ဒေသအားလုံးမှာ အခြေခံ နေ့တွက်လုပ်အားခ (၃၀၀ ဘတ်) ပေးဖို့နဲ့ ထိုင်းနိုင်ငံ အလုပ်သမားများ အားလုံး တန်းတူအခွင့်အရေးရဖို့အတွက် ထိုင်းနိုင်ငံအတွင်း အလုပ်လုပ်ကိုင်နေကြတဲ့ မြန်မာနိုင်ငံသားတွေ အားလုံးကလည်း တရားဝင်အလုပ်သမားဖြစ်ဖို့က အရေးကြီးတယ်" ဟု ထိုင်းနိုင်ငံအစိုးရ အလုပ်သမားရေးဝန်ကြီး မစ္စတာ ဖဒိစ်ချိုင်း ဆဆွန်ဆပ် က ပြောသွားပါတယ်။
လာမည့် ဒီဇင်ဘာ (၁၄) ရက်နေ့မှာ သက်တမ်းကုန်တော့ မည်ဖြစ်သည့် ယာယီနိုင်ငံကူးလက်မှတ် ထုတ်ပေးရေးလုပ်ငန်းများကို ထိုင်းနိုင်ငံဘက် အစိုးရမှ ဆက်လက်လုပ်ကိုင်ခွင့်ရှိအောင် ဥပဒေအရ (ရက်တွေ လတွေ နှစ်တွေ) ထပ်ပြီး တိုးပေးနိုင်မည် မဟုတ်ဟု ပြောသွားပါတယ်။
မြန်မာနိုင်ငံအစိုးရအဖွဲ့နှင့် ထိုင်းနိုင်ငံအစိုးရအဖွဲ့တို့ တွေ့ဆုံပြီး နှစ်နိုင်ငံရှိ ရွှေ့ပြောင်းအလုပ် သမားရေးရာများကို တိကျမှန်ကန် လွယ်ကူစွာ ဖြေရှင်းပေးနိုင်ဖို့အတွက် သဘောတူညီမှု ကော်မတီကိုယ်စားလှယ်များကို ရွေးချယ်နိုင်ခဲ့ပါတယ်။
No comments:
Post a Comment