ပအိုဝ်းကိုယ်ပိုင်အုပ်ချုပ်ခွင့်ရဒေသ၊ ဟိုပုံးမြို့နယ်၊ နောင်တောင်းဗုဒ္ဓဘာသာ ဘုန်းတော်ကြီးကျောင်းတွင် တက္ကသိုလ်ဝင်ခွင့်ရသည့် ကျောင်းသူကျောင်းသားများ၏ ဂုဏ်ပြုပွဲကို သြဂုတ်လ ၄ ရက်နေ့ နံနက် (၁၀) နာရီအချိန်တွင် ကျင်းပခဲ့ကြောင်း သိရသည်။
ဤဂုဏ်ပြုပွဲတွင် ပအိုဝ်းကိုယ်ပိုင်အုပ်ချုပ်ခွင့်ရဒေသ ဥက္ကဋ္ဌ ဦးခွန်စံလွင်မှ တက္ကသိုလ်ဝင်ခွင့်ရသည့်ကျောင်းသူကျောင်းသားများအတွက် ဂုဏ်ယူမိကြောင်း၊ ပအိုဝ်းဒေသအတွင်း ပညာရေးမြင့်တင်၍ မိမိဒေသအကျိုးပြုလုပ်ငန်းများလုပ်ဆောင် ရန်လိုကြောင်း အဖွင့်အမှာစကား ပြောကြားခဲ့သည်။
တက္ကသိုလ်ဝင်ခွင့်ရသည့်ကျောင်းသူကျောင်းသားများ ဂုဏ်ပြုပွဲကို နောင်တောင်း ဗုဒ္ဓဘာသာဘုန်းတော်ကြီးကျောင်း ဆရာတော်အား ရှိခိုးကန်တော့ခြင်းဖြင့် စတင်ခဲ့သည်။
တဆက်တည်းတွင် ပအိုဝ်းစာပေနှင့်ယဉ်ကျေးမှုဗဟို ဒု-ဥက္ကဋ္ဌ ဦးခွန်ဝင်းကိုမှ မိမိအနာဂါတ်ကို တည်ဆောက်ရာတွင် ကံကိုသာအပြစ်မတင်ဘဲ လက်တွေ့ကြိုးစားရယူရန် လိုအပ်ကြောင်း၊ အကြံပြုပြောကြားခဲ့သည်။
ဟိုပုံးမြို့ မြို့နယ်အထွေထွေအုပ်ချုပ်ရေးဦးစီးဋ္ဌာန၊ မြို့နယ်အုပ်ချုပ်ရေးမှူး ဦးမောင်မောင်မှ နယ်မြေဖွံ့ဖြိုးရေးလုပ်ငန်းနှင့်အတူ ပညာရေးကို ဦးစားပေးလုပ်ဆောင်ရန် လိုအပ်ကြောင်း အမှာစကားပြောကြားခဲ့သည်။
တောင်ကြီးမြို့နယ် ပအိုဝ်းအမျိုးသမီးပညာရေးမြင့်တင်ရေးအဖွဲ့ ဥက္ကဋ္ဌ ဒေါက်တာဒေါ်ခင်သန်းနွဲ့ မှ ကေးလများ၏ပညာရေးကို အားပေးရာတွင် ပရဟိတ္တကျောင်းများသာမက အရေးကြီးဆုံးမှာ မိဘများ၏ အထူးတာဝန်ယူမှု လိုအပ်ကြောင်း ပြောကြားခဲ့သည်။
ဤဂုဏ်ပြုပွဲသို့ ရဟန်းသံဃတော်များ၊ ပအိုဝ်းအဖွဲ့ အစည်းမှ လူကြီးမင်းများ၊ ရပ်မိရပ်ဖများ စုစုပေါင်း (၂၀၀) ခန့် တက်ရောက်ခဲ့ကြပြီး တက္ကသိုလ်ဝင်ခွင့်ရသည့် ကျောင်းသူကျောင်းသား (၈၁) ဦးအတွက် ဂုဏ်ပြုဆု ချီးမြင့်ခဲ့ကြောင်း သိရသည်။
ဟိုပုံးမြို့နယ်၊ တောင်ရပ်ကွက်၊ လေးအိမ်ကုန်းနေ ဦးစိမ်းလီ၊ ဒေါ်မိုးစိန်တို့သမီး၊ သုံးဘာသာဂုဏ်ထူးရှင် နန်းစန်းထွေးမှ ပညာရေးအတွက် အစွမ်းကုန်ထောက်ပံ့ကူညီအားပေးခဲ့သည့် မိဘနှစ်ပါးကို အထူးကျေးဇူးတင်မိကြောင်း ပြောကြားခဲ့သည်။
ဟိုပုံးမြို့အနောက်ရပ်ကွက်မှ နန်းဖူးသက်ဝေအောင်နှင့် ဟိုပုံးမြို့ နယ် ရန်ကင်းရွာ နန်းဖြိုးအိအိလွင် တို့မှလည်း ယခုကဲ့သို့ ဂုဏ်ပြုလက်မှတ်ရရှိခြင်းအတွက် မိမိကိုယ် ကိုယ်ဂုဏ်ယူမိကြောင်းနှင့် ပညာရေးအတွက် အစွမ်းကုန်ထောက်ပံ့ကူညီအားပေးခဲ့သည့် မိဘနှစ်ပါးကို အထူးကျေးဇူးတင်မိကြောင်း ၀မ်းသာပိတိဖြင့် ပြောကြားခဲ့းသည်။
ဂုဏ်ပြုလက်မှတ်ရရှိခဲ့သည့် နန်းဖူးသက်ဝေအောင်မှ ပညာရေးကောလိပ်တက်၍ ဆရာမအဖြစ်ဖြင့် ကျေးလက်ဒေသရှိ ကလေးသူငယ်များအား ပညာသင်ပေးလိုကြောင်း၊ နန်းဖြိုးအိအိလွင်မှလည်း အစိုးရလုပ်ငန်းများတွင် ၀န်ထမ်းတစ်ယောက်အဖြစ် ဒေသအကျိုးပြုရန်အတွက် တာဝန်ထမ်းဆောင်နိုင်ရန် ရည်ရွယ်ထားကြောင်း သိရသည်။
ဤဂုဏ်ပြုပွဲတွင် ပအိုဝ်းကိုယ်ပိုင်အုပ်ချုပ်ခွင့်ရဒေသဦးစီးအဖွဲ့ မှ တက္ကသိုလ်ဝင်ခွင့်ရသည့် ကျောင်းသူကျောင်းသားများ၏ ပညာရေးအတွက် အသုံးပြုရန် ကျပ်ငွေ (၃) သိန်းအား ကူညီပေးအပ်ခဲ့ကြောင်း သိရသည်။
No comments:
Post a Comment