ပအိုဝ်းအမျိုးသားအဖွဲ့ချုပ်(PNO)
အဖွဲ့အစည်းမှ စံပြစိုက်ပျိုးရေးကွင်းအဖြစ် မတရားသိမ်းဆည်းထားသော တောင်ကြီး-ဖက်ကွန်
လမ်းမဘေးရှိ မြေယာများကို မေလ ၁၅ ရက်နေ့တွင် မြေသိမ်းခံရသူ ဒေသခံရွာသားများ ၀င်ရောက်လုပ်ကိုင်
ထွန်ယက်နေပြီဖြစ်ကြောင်း စုံစမ်းသိရှိရသည်။
ယခုတွင် ၎င်းတို့သိမ်းဆည်းထားသောမြေယာများပေါ်တွင်
ဖွံ့ဖြိုးရေးလုပ်ငန်းအတွက် မလုပ်ဘဲ ပုဂ္ဂိုလ်တစ်ဦးတစ်ယောက်မှ မိမိကိုယ်ကျိုးအတွက် မြေယာများ
ရောင်းစားနေကြောင်း မြေယာသိမ်းခံရသူ ဒေသခံများက ပြောသည်။
“စားဝတ်နေရေးအတွက်နဲ့ သားသမီးပညာရေးအတွက် အဲဒီမြေကို အားထားနေရတယ်၊ သိမ်းဆည်းခံရတဲ့မြေ ဧက ၁၀၀ ကျော်က ခြံယာပိုင်ရှင် ၅၀ ကျော်ရှိတယ်၊ ဖက်ကွန်ကျေးရွာက အများဆုံးပါ။ မိုးတွင်းမှာ ပန်းနှမ်းတွေ စိုက်ပျိုးဖို့အတွက် မေလ ၁၅ ရက်နေ့မှာ စတင်ပြီးတော့ ထွန်ယက်နေပြီ”ဟု မြေယာသိမ်းခံရသူ ထီပသဲရွာနေ ဦးရီက ပြောသည်။
ခေါင်းဆောင်မရှိ မြေယာသိမ်းခံရသော
ဒေသခံအားလုံး ညီညီညွှတ်ညွှတ်တစ်ပြိုင်တည်း ၀င်ရောက်လုပ် ကိုင်ခြင်းဖြစ်သည်။ ထီခြုံးရွာ၊
ငိုမွူးရွာ၊ ဖက်ကွန်ရွာနှင့် ထီပသဲ့ရွာများ စုပေါင်းပြီး မေလ ၁၄ ရက်တွင် ကွန်ကရစ်တိုင်များ
ဖြုတ်၊ ခြံစည်းရိုးများ ပြန်ဖော်ပြီး မေလ ၁၅ ရက်တွင် ၀င်ရောက်လုပ်ကိုင်ကြောင်း သိရသည်။
“၁၀ နှစ်ကျော်အတွင်း လုပ်ကိုင်စရာမြေ အခက်ခဲရှိလို့ သားသမီးပညာရေးအတွက် ပရဟိတကျောင်းမှာ ပို့ထားရတယ်၊ တစ်ချို့သားသမီးတွေဆို ပညာရေးတစ်ဝက် တစ်ပြက်နဲ့ ကျောင်းမထားနိုင်တော့ဘူး”
ဟု မြေယာ ၄ ဧက အသိမ်းခံရသူ ဖက်ကွန်ရွာနေ
ဦးထွန်းစိန်က ပြောသည်။
မြေယာအသိမ်းခံရ၍ လင်မယားနှစ်ယောက်လုံး
တစ်ရက် တထောင့်ငါးရာဖြင့် နေ့စားအလုပ် လိုက်လုပ်နေရပြီး တစ်ခါတစ်လေ ဆီပြတ် ဆားပြတ်ဖြစ်နေရကြောင်း၊
မြေယာမရှိတော့၍ သားသမီးလည်း အတူမနေနိုင်ကြောင်း၊ အလုပ်ရှိလျှင် စားသောက်မှု ဖူလုံပြီး
အလုပ်မရှိလျှင် စားသောက်မှု အခက်ခဲရှိကြောင်း မြေသိမ်းခံရသူ ဗွေဖါမြင့်က ပြောသည်။
ကိုယ့်ဘိုးဘွားပိုင်မြေယာဖြစ်သည့်အတွက်
ကိုယ်ဝင်ရောက်လုပ်ကိုင်သည်ကို ကျူးကျော်သူဟု စွပ်စွဲလျှင် ရွာသားအားလုံး ဆန္ဒပြထပ်တောင်းဆိုသွားမည်ဟု
မြေသိမ်းခံရများက ဆိုသည်။
ယခုတွင် အကြိမ်ကြိမ်ခွင့်တောင်းထားသော်လည်း
ဖြေရှင်းပေးမှု တစ်စုံတစ်ရာမရှိသည့်အတွက် ဒီထက်ပိုပြီးသည်းခံနိုင်မှု မရှိတော့ကြောင်း၊
ဥပဒေနည်းလမ်းအတိုင်း ဖြေရှင်းပေးရန် အကောင်းဆုံးဖြစ်ကြောင်း မြေယာသိမ်းဆည်းခံရသော
ရွာသားများက ပြောသည်။
No comments:
Post a Comment