PNLO နှင့် နိုင်ငံတော်အစိုးရ ပြည်ထောင်စုအဆင့် ဆွေးနွေးပွဲ နှင့် သဘောတူညီချက်များ

ခွန်ရာဇာ(တောင်ကြီး) | မတ်ခ်ျလ ၂၅၊ ၂၀၁၃ | တောင်ကြီးတိုင်းမ်



ပြည်ထောင်စုသမ္မတမြန်မာနိုင်ငံတော်အစိုးရနှင့် ပအိုဝ်းအမျိုးသားလွတ်မြောက်ရေးအဖွဲ့ချုပ် PNLO ကိုယ်စားလှယ်တို့ မတ်လ ၂၃ ရက် ရန်ကုန်မြို့ Myanmar peace center တွင်ပြည်ထောင်စုအဆင့် ငြိမ်းချမ်းရေး ညှိနိုင်းဆွေးနွေးရာမှာ သဘောတူညီချက်များ လက်မှတ်ရေးထိုးခဲ့ကြောင်း သိရသည်။

ပြည်နယ်အစိုးရအာဏာပိုင်များနှင့် PNLO ကိုယ်စားလှယ်အဖွဲ့တို့သြဂုတ်လ ၂၅ ရက် ၂၀၁၂ ခုနှစ်တွင် သဘောတူခဲ့သော နှစ်ဦးနှစ်ဖက် တိုက်ခိုက်မှုများရပ်ဆိုင်းရေးကို ယနေ့အချိန်ထိ ခိုင်မာလျှက်ရှိကြောင်း ၊ PNLO အတွက် သတ်မှတ်ပေးသော လှုပ်ရှားနယ်မြေအတွင်းသို့ အခြားအပစ်ရပ် လက်နက်ကိုင်အင်အားစုများ ဝင်ရောက်လှုပ်ရှားပါက ပြည်ထောင်စုအဆင့် ငြိမ်းချမ်းရေးဖော်ဆောင်ရေး လုပ်ငန်းကော်မတီက ကူညီဖြေရှင်းပေးရန် စသည့်အချက်များ ပါဝင်ကြောင်း သိရသည်။

ကိုယ်စားလှယ်များနှစ်ဦးနှစ်ဘက်အကြေအလည်ဆွေးနွေးပြီး သဘောတူညီမှုအချုပ်မှာ
၁။ ပြည်နယ်အဆင့် ပစ်ခတ်တိုက်ခိုက်မှု ရပ်ဆိုင်းရေးကိစ္စကို ဆက်လက်အတည်ပြုပါမည်။
၂။ Code Of Conduct ကိစ္စကိုလည်း သဘောတူညီပါသည်။
၃။ ဆက်ဆံရေး၊ စီးပွားရေးရုံးများကို ဆက်လက်ဖွင့်လှစ်နိုင်ရေးကို သဘောတူညီပါသည်။
၎။ နိုင်ငံသားစိစစ်ရေး ကတ်ပြား ရရှိနိုင်ရေး ဆောင်ရွက်ပေးပါမည်။
၅။ ကယ်ဆယ်ရေး၊ လူမှုရေး၊ မူးယစ်ဆေးဝါးဆန့်ကျင်တိုက်ဖျက်ရေးနှင့် ဒေသဖွံ့ဖြိုးရေးကိစ္စကို ပူးပေါင်းဆောင် ရွက်ပါမည်။
၆။ စီးပွားရေးကဏ္ဍကို ပူးပေါင်းဆောင်ရွက်ပါမည်။
၇။ မြေမြုပ်မိုင်းများ ရှင်းလင်းရေးကိစ္စမှာလည်း ပူးပေါင်းဆောင်ရွက်ပါမည်။
၈။ လူငယ်၊ အမျိုးသမီးနှင့် အလုပ်သမားကဏ္ဍကို ပိုမိုပါဝင်လုပ်ဆောင်နိုင်ရန် ဆောင်ရွက်ပါမည်။
၉။ နောက်တဆင့် နိုင်ငံရေးတွေ့ဆုံဆွေးနွေးမှုများ ဆက်လက်လုပ်ဆောင်သွားမည် စသည့်အချက် ၉ ချက်ကို နှစ်ဦးနှစ်ဘက် သဘောတူလက်မှတ်ရေးထိုးခဲ့ပြီ ဖြစ်ကြောင်း ပြည်ထောင်စုဝန်ကြီး ဦးအောင်မင်းက ပြောသည်။

"ပြည်ထောင်စုအဆင့်ဆွေးနွေးပွဲကို အောင်မြင်စွာကျင်းပနိုင်ခဲ့ပြီ။ တစ်ချိန်တည်းမှာလည်း ပအိုဝ်းအမျိုးသားနေ့ပွဲတော်ကို တက်ရောက်ချင်တယ်။ ထောင်နှင့် သောင်းချီရှိတဲ့ ပအိုဝ်းလူထုတွေကို ကျွန်တော်တို့ ပြည်နယ်အဆင့်ရလာဒ်နဲ့ ပြည်ထောင်စုအဆင့်ရလာဒ်ကို ပြန်လည်ရှင်းပြပေးနိုင်မည့် အခွင့်အရေးကိုလည်း ရရှိမယ်။ အဘက်ဘက်မှ ရလာဒ်ကောင်းတွေကိုလည်း ရရှိနေပြီ"
 ဟု ပအိုဝ်းအမျိုးသားလွတ်မြောက်ရေးအဖွဲ့ချုပ် PNLO ဥက္ကဌ ခွန်ဥက္ကာ က ပြောသည်။

"လောလောဆယ် နိုင်ငံရေးပါတီလုပ်ငန်းကို ရည်မှန်းချက်မရှိသေးပါဘူး။ လက်ရှိပအိုဝ်းအမျိုးသားအဖွဲ့ချုပ် PNO က တည်ဆဲဥပဒေ အောက်မှာမှတ်ပုံတင်ပြီး ရွေးကောက်ပွဲပါဝင်ပြီး ပါတီလည်းဖြစ်၊ တည်ဆဲ ရှိဆဲ ပါတီ က ပိုအရေးကြီးပါတယ်"
ဟု ၎င်းက ဆက်ပြောသည်။

နှစ်ဖက်စလုံးတွင် ရှိသော အခက်အခဲ ပြဿနာကိစ္စရပ်များကို အဖွဲ့ကြီးငယ်၊ ကိစ္စကြီးငယ်မချန်လှပ်ဘဲ အကြေအလည်ဆွေးနွေး အဖြေရှာရေးကို ဆက်လက်ပြုလုပ်ကြမည့် နိုင်ငံရေးအရ တွေ့ဆုံ ဆွေးနွေးမှု များတွင် အခြေပြု ကိုင်စွဲရမည့် ဆွေးနွေးရေးမှုအဖြစ် နှစ်ဦးနှစ်ဖက် သဘောတူညီ ဆုံးဖြတ်ကြောင်း သိရသည်။

ပြည်ထောင်စုအစိုးရဘက်တွင် လက်မှတ်ရေးထိုးသော ပုဂ္ဂိုလ်များမှာ ပြည်ထောင်စုဝန်ကြီး ဦးအောင်မင်း၊ ပြည်ထောင်စုဝန်ကြီး ဦးခင်မောင်စိုး၊ ပြည်ထောင်စုဝန်ကြီး ဦးဝင်းထွန်း၊ ပြည်ထောင်စုဝန်ကြီး ဦးအုန်းမြင့်၊ ရှမ်းပြည်နယ်ဝန်ကြီးချုပ် ဦးစဝ်အောင်မြတ်၊ ကာကွယ်ရေးဦးစီးချုပ်ရုံး ဗိုလ်မှူးကြီးကျော်စိုးဝင်း၊ ပြည်သူ့လွတ်တော်ကိုယ်စားလှယ် ဒေါ်ဒွဲဘူ၊ အမျိုးသားလွတ်တော်ကိုယ်စားလှယ် ဦးခက်ထိန်နန် နှင့် ရှမ်းတိုင်ရင်းသားများဒီမိုကရက်တစ်ပါတီ ဥက္ကဌ ဦးစိုင်အိုက်ပေါင်းတို့ ဖြစ်ပြီး၊ ပအိုဝ်းအမျိုးသားလွတ်မြောက်ရေးအဖွဲ့မှ ဥက္ကဌ ဗိုလ်မှူးကြီး ခွန်ဥက္ကာ၊ အထွေထွေအတွင်းရေးမှူး ဦးခွန်မြင့်ထွန်း၊ တွဲဖက်အတွင်းရေးမှူး ဗိုလ်မှူးကြီးခွန်သူရိန်၊ ဗိုလ်မှူးကြီးအောင်ကျော်၊ ခွန်ထီး၊ နန်းနွယ်နွယ်၊ ဂျပန်နိုင်ငံအစိုးရ၏ မြန်မာနိုင်ငံအမျိုးသားပြန်လည်သင့်မြတ်ရေးဆိုင်ရာ အထူးကိုယ်စာလှယ် ဦးယောဟဲအိဆာဆာကာဝါ၊ ပအိုဝ်းအမျိုးသားအဖွဲ့ချုပ် ပြည်သူ့လွတ်တော်ကိုယ်စားလှယ် ဦးခွန်သိန်းဖေ၊ PNO အသွင်ပြောင်းဌာန ဗိုလ်မှူးကြီးခွန်လာ စသည်တို့ဖြစ်ကြောင်း သိရသည်။

























No comments: