ရန်ကုန်မြို့ပအိုဝ်းဘုန်းကြီးကျောင်းများသို့ ပအိုဝ်းတက္ကသိုလ်ကျောင်းသူ/သားနှင့် မိသားစုများ စုပေါင်းကန်တော့

နန်းခမ်းဟွမ်နွိုး | သြဂုတ်လ ၄ ရက်၊ ၂၀၁၄ ခု | တောင်ကြီးတိုင်းမ်



ရန်ကုန်မြို့ရှိ ပအိုဝ်းတက္ကသိုလ်ကျောင်းသူကျောင်းသားများနှင့် ရန်ကုန်မြို့တွင်းရှိ ပအိုဝ်းမိသားများ စုပေါင်းကာ သြဂုတ်လ ၃ ရက်နေ့တွင် ရန်ကုန်မြို့ရှိ ပအိုဝ်းဘုန်းတော်ကြီးကျောင်းများရှိ ဆရာတော်များကို သတင်းကျွတ်အကြို လိုက်လံကန်တော့နေကြကြောင်း သတင်းရရှိသည်။

“ကျွန်တော်တို့ ရန်ကုန်မှာရှိတဲ့ ပအိုဝ်းလူမျိုးတွေ အတူတကွဆုံစည်းနိုင်စေရန်၊ မိမိတို့ရိုးရာဓလေ့ကို ဖော်ထုတ်နိုင်ရန်နှင့် ကျေးဇူးရှင်ဆရာတော်များကို ကျေးဇူးဆပ်ရန်အတွက် ယခုလို စုပေါင်းပြီး ဘုန်းကြီးကျောင်းများကို လိုက်လံကန်တော့တာ ဖြစ်တယ်” ဟု ကျောင်းသားခေါင်းဆောင်က ပြောသည်။

ရန်ကုန်မြို့ရှိ ပအိုဝ်းများနှင့် တက္ကသိုလ်ကျောင်းသူ/သားများသည် မိမိတို့တတ်နိုင်သမျှသော အလှူငွေများဖြင့် စုပေါင်းကာ ရန်ကုန်မြို့ရှိ ပအိုဝ်းဘုန်းတော်ကြီးကျောင်းများသို့ ယခုလို သတင်းကျွတ်အကြို လိုက်လံကန်တော့သည်မှာ (၉) ကြိမ်မြောက် ရှိနေပြီဖြစ်ကြောင်း သိရသည်။

ရန်ကုန်မြို့တွင် ပအိုဝ်းဘုန်းတော်ကြီးကျောင်း ၃၀ ကျော ရှိသည်။ ယခုနှစ်တွင် ဘုန်းကြီးကျောင်း (၉) ကျောင်း ကန်တော့မည်ဖြစ်ကြောင်း သိရသည်။ နှစ်စဉ်နှစ်တိုင်း အလှည့်ခွ္ပဲ၍ လိုက်လံကန်တော့ ကြသည်။ ယခုနှစ်တွင် ပအိုဝ်းတက္ကသိုလ်ကျောင်းသူကျောင်းသားများနှင့်အတူ ရန်ကုန်မြို့ရှိ ပအိုဝ်းမိသားစုများ စုစုပေါင်း ၁၅၀ ဦးကျော်မှ စုပေါင်းကန်တော့ကြကြောင်း သိရသည်။

လှည်ပတ်ကန်တော့သည်အစီအစဉ်မှာ ရွှေတိရုံအရှေ့မှုတ်ရှိ ပအိုဝ်းအမျိုးသားဓမ္မာရုံတွင် စုစည်းကာ နံနက် ၈ နာရီခွဲတွင် စတင်ထွက်ခွါကြကြောင်း သိရသည်။

”ယခုလို အနယ်နယ်အရပ်ရပ် ခမ်းကောင် ခမ်းဒွမ်မှာရှိတဲ့ ပအိုဝ်းသူငယ်ချင်းတွေ ဆုံဆုံညီညီနဲ့ အတူတွေ့ဆုံခွင့်ရတဲ့အတွက် အရမ်းပဲဝမ်းသာပါတယ်၊ ဒီလို များများလုပ်ဖို့လိုပါတယ်။ ပြီးတော့ ကျွန်တော်တို့ ရန်ကုန်မြို့မှာရှိတဲ့ ပအိုဝ်းတွေကို သာရေးနာရေး ပွဲလမ်းသဘင် အစရှိတဲ့အတွက် ကူညီနိုင်ရန် ပအိုဝ်းအဖွဲ့ ဖွဲ့ဖို့ရှိတယ်။ ဒီနေ့ ဘုန်းတော်ကြီးများကို ကန်တော့ရင်း ဒီအဖွဲ့ ဖွဲ့ဖို့ကိုလည်း လျှောက်တင်မှာပါ”
ဟု တက္ကသိုလ်ကျောင်းသားတစ်ဦးက ပြောသည်။

No comments: