ခြောက်တိုင်းကြောက်မဲ့ပြည်သူ မဟုတ်တော့ပါ

အမြင်ဆောင်းပါး | ခွန်သွီပအိုဝ်းခမ်းကောင်
သြဂုတ်လ ၁၉ ရက်၊ ၂၀၁၄ ခု | တောင်ကြီးတိုင်းမ်

မြန်မာနိုင်ငံသည် နှစ်ပေါင်းငါးဆယ်ကျော် စစ်အာဏာရှင်၏ဖိနှိပ်မှုကို ကြုံလာခဲ့ခြင်းဖြစ်ပြီး ၂၀၁ဝ နောက်ပိုင်းတွင် ဒီမိုကရေစီစနစ်ကို ပြောင်းလဲကျင့်သုံးလာခဲ့သည်။ အပြည့်အဝ ဒီမိုကရေစီမဟုတ် သော်လည်း အသင့်သင့်ပြောင်းလဲကျင်းသုံးနေသည်ကို တွေ့ရသည်။

ယခုတွင် ဒီမိုကရေစီသက်တမ်းတစ်ခု ကုန်ဆုံးတော့မည်ဖြစ်သည်။ မြန်မာနိုင်ငံတွင် ပြည်တွင်းငြိမ်းချမ်းရေးလည်း ဆက်တိုက်ဆိုသလို ပြုလုပ်နေသော်လည်း ယခုထိ ပြည်တွင်းစစ် မငြိမ်းနိုင်သေးကြောင်း သိရသည်။ အဘယ်ကြောင့်ဆိုသော် အပစ်ခတ်ရပ်ဆဲရေးကို လက်နက်ကိုင် အဖွဲ့များနှင့် ညှိနိုင်းဆွေးနွေးမှုများ ပြုလုပ်နေသော်လည်း အောင်မြင်မှု နည်းပါးနေသည်။

အပစ်အခတ်ရပ်ဆဲရေးကို သဘောတူလက်မှတ်ရေးထိုးပြီးသော်လည်း နောက်ဆက်တွဲ တိုက်ပွဲဆက်လက်ဖြစ်ပွားနေသော နေရာများလည်း ရှိသည်။ စစ်ဘေးဒုက္ခသည်များ ပိုမိုများပြားလာနေသောဒေသလည်း ရှိသည်။

မည်သို့ပင်ဆိုစေ စနစ်တစ်ခုနှင့်တစ်ခု အပြောင်းအလဲပြုလုပ်ချိန်တွင် မုန်တိုင်းများ ၀င်ရောက်တတ်သည်ကို သဘာဝပင် ဖြစ်သည်။ မြန်မာနိုင်ငံတွင် အပြောင်းအလဲတစ်ခုအပေါ် ရောက်ရှိနေပြီဆိုသည်ကို ယုံကြည်သောသူ ရှိသလို၊ လုံးဝမပြောင်းလဲသေးဘူးဟု ယူဆသောသူများလည်း ရှိသည်။ ပြည်တွင်း ဆူပူမှုများနှင့် သတင်းနှင့်မီဒီယာများအပေါ် ဖိနှိပ်မှုများကို ကြည့်ခြင်းအားဖြင့် ပြောင်းလဲ့မှုမရှိဟု ထင်ရသော်လည်း၊ လွှတ်တော်နှစ်ရပ်၏ လုပ်ဆောင်ချက်နှင့် အစိုးရ၏ ထိပ်ပိုင်းခေါင်းဆောင်တစ်ချို့ လုပ်ဆောင်ချက်ကို ကြည့်ခြင်းအားဖြင့် အတော်အသင့် ပြောင်းလဲနေပြီဟု ထင်မိသည်။

ထိုသို့အပြောင်းအလဲကာလတွင် ယခင်က ၀ှက်ကွယ်ဖုံးဖိထားသော ပြဿနာများကို သူ့အလိုလို ပေါ်ပေါက်လာပါသည်။ ဥပမာအားဖြင့် မြေယာပြဿနာသည် အလွန်ကြီးမားပြီး ဖြေရှင်းရခက်သော ပြဿနာတစ်ခု ဖြစ်နေသည်။ “တောင်သူ” ဟု ခေါ်လေ့ရှိသော ပအိုဝ်းတိုင်းရင်းသားများသည် တောင်ယာ ခြံယာဖြင့် အသက်မွေးကြသည်။ ရှမ်းပြည်တောင်ပိုင်းတွင် နေထိုင်သော ပအိုဝ်းတိုင်းရင်းသားများသည် စစ်အာဏာရှင်၏ ဖိနှိပ်မှုကို ခံခဲ့ရပြီး ကြောက်စိတ်များ ဖုံးလွမ်းနေခဲ့ပါသည်။ ပဒေသရာဇ်စနစ်ဆိုး၊ စစ်အာဏာရှင်စနစ်ဆိုး၏ အောက်တွင် ပြားပြားမောက်နေရသော ပအိုဝ်းပြည်သူများသည် မော့မကြည့်ရဲအောင် ကြောက်စိတ်ဖုံးလွမ်းနေခဲ့ပြီး ဖြစ်သည်။

အာဏာသုံးအဖွဲ့အစည်းများဖြစ်သော တိုင်းရင်းသားလက်နက်ကိုင်တပ်ဖွဲ့များ၊ ဗမာအစိုးရများ၊ နိုင်ငံတော်မှစစ်တပ်များ၏ မတရား အဓမ္မသိမ်းဆည်းသော လယ်ယာမြေများသည် ပအိုဝ်းတောင်သူများ၏ ဘဝနေထိုင်ရေးကို အကြီးအကျယ်ခြိမ်းခြောက်လာခဲ့သည်။

ပအိုဝ်းပြည်သူများ ကြုံတွေ့နေရသောအခက်ခဲသည် မိမိမြေယာများကိုအသိမ်းခံရပြီး စိုက်ပျိုးမြေများမရှိလျှင် အသက်မွေးဝမ်းကျောင်းလုပ်ငန်းများ ပျက်ဆီးမှုကြောင်း မိမိတို့စားဝတ်နေရေးအတွက် နိုင်ငံခြားသို့ အလုပ်လုပ်ရန် ထွက်ခွါသွားကြရပါသည်။ ပြည်ပတွင် လုပ်ငန်းများရှာဖွေလုပ်ကိုင်ရာ၌ အဆင်ပြေသောသူများရှိသလို ဒုက္ခလှလှကြုံတွေ့နေရသောသူလည်း များပြားလှသည်။ ထိုသို့ပြဿနာ ကြုံတွေ့နေရသော ပအိုဝ်းတိုင်းရင်းသားများသည် ခေတ်စနစ် ပြောင်းလဲလာသည်နှင့် အတွေးအမြင်လည်း ပြောင်းလဲလာနေပြီ ဖြစ်သည်။

မြေမရှိလျှင် အသက်ရှင်နေထိုင်ဖို့ မလွယ်ကူသော ပအိုဝ်းတိုင်းရင်းသားများသည် စစ်အစိုးရသိမ်းထားသော လယ်ယာမြေ၊ လက်နက်ကိုင်တော်လှန်ရေး ငြိ်မ်းချမ်းရေးအဖွဲ့အစည်းက သိမ်းထားသော မြေယာများကို ပြန်လည်ရရှိရန် လိုအပ်သည်။ ခေတ်စနစ်အပြောင်းအလဲကာလတွင် ၎င်းမြေများကို ပြန်လည်ရရှိဖို့ နည်းမျိုးစုံဖြင့် ပြန်လည်တောင်းဆိုရန် ကြိုးစားလာကြသည်။ ထိုသို့ကြိုးစားနေချိန်တွင် အာဏာရှိပုဂ္ဂိုများ နည်းမျိုးစုံဖြင့် အကြိမ်ကြိမ်ခြိမ်းခြောက်ခြင်းကို ခံခဲ့ရသည်။ ပအိုဝ်းတောင်သူများကို တရားစွဲဆိုသည့်အဆင့်ထိ ရောက်ခဲ့ရပါသည်။ လူမျိုးချင်းချင်းဖြစ်သော အဖွဲ့အစည်းကပင် ပြုလုပ်ခြင်းပင် ဖြစ်သည်။

လက်နက်အားကိုးခြိမ်းခြောက်ခြင်း၊ အာဏာသုံးအမျိုးမျိုးခြိမ်းခြောက်ခြင်းနှင့် ဖမ်းဆီးချုပ်နှောင်ပြီး ယခင်စနစ်ဟောင်းကဲ့သို့ ကျင့်သုံး နှိပ်စက်ခြင်း စသည်များ ပြုလုပ်လာခဲ့သည်။ ထိုသို့ပြုလုပ်ခြင်းဖြင့် ကြောက်စိတ်ရှိသော ပြည်သူများအချို့တွင် ပိုမိုကြောက်လာပြီး မလုပ်ရှားရဲတော့ပေ။ သို့သော် တစ်ချို့သော ပအိုဝ်းတောင်သူများသည်ပင် မည်သို့ပင်ခြိမ်းခြောက်စေကာမူ အသက်ပေး၍ ဆက်လက်လုပ်ရှားနေပါသည်။

အဘယ်ကြောင့်ဆိုသော် ထိုသိမ်းဆည်းမြေယာကို ပြန်လည်ရရှိခြင်း မရှိပါက အသက်မွေးရှင်သန်နိုင်ဖို့ အလွန့်အလွန်ခက်ခဲနေခြင်း၊ သားသမီးပညာရေး လုံးဝဆုံးရှုံးခြင်း အခြေအနေသို့ ရောက်ရှိနေပြီ ဖြစ်သည်။ တစ်ချို့တွင် မြေယာအစားထိုး ပြန်လည်ပေးအပ်သော်လည်း ရသင့်ရထိုက်သော ပမာဏထက် အလွန်နည်းပါးခဲ့သည်။ မတရားသိမ်းထား မြေယာများကို တရာမျှတမှုရှိအောင် ပြုလုပ်ပေးရန် ဒီမိုကရေစီအစိုးရကို တောင်းဆိုလာကြတော့သည်။

သြဂုတ်လ ၇ ရက်နေ့တွင် ရှမ်းပြည်နယ်တောင်ပိုင်းရှိ ပအိုဝ်းတောင်သူများက မိမိမြေယာများ ပြန်လည်ရရှိရေး ဆန္ဒဖော်ထုတ်မှု ပြုလုပ်ခဲ့သည်။ အတားအဆီးချုပ်ချယ်မှုများကြားတွင် ရဲရဲရင့်ရင့် ဆန္ဒဖော်ထုတ်သွားသည်ကို မြင်တွေ့ရသည်။ အစတွင် တောင်ကြီးမြို့အဝင်တွင် အေးချမ်းစွာ စီတန်းလှည့်လည်ပြီး ဆန္ဒဖော်ထုတ်သွာရန် ရည်ရွယ်ထားသော်လည်း အစိုးရ၏ညစ်ပတ်မှုကြောင့် ခွင့်ပြုမိန့်ရရှိပြီးမှ ကန့်ကွက်စာများ ထွက်လာကာ ဆန္ဒပြခွင့် မရရှိခဲ့ပေ။

သို့သော် အားမလျော့သော တောင်သူများသည် အေးသာယာမြို့တွင် ဆန္ဒဖော်ထုတ်ပွဲ ပြုလုပ်ခဲ့ရသည်။ ၎င်းဆန္ဒဖော်ထုတ်ပွဲတွင် ဆိုင်းဘုတ်အလံ အသီးသီး ကိုင်ဆောင်ပြီး ကြွေးကြော်သံများနှင့် လူအင်အား ၇ဝဝ ကျော် ဆန္ဒဖော်ထုတ်သွားကိုကို တွေ့ရသောအခါ ”သြ .. ပအိုဝ်းပြည်သူများလည်း ကြောက်စိတ်နည်းလာပြီဘဲ” ဟု တွေးတေားမိခဲ့သည်။ ပအိုဝ်းဝတ်စုံဖြင့် ဆန္ဒဖော်ထုတ်နေသည်ကို တွေ့ရသောအခါ ပအိုဝ်းပြည်သူများ ခံစားနေရသော ခံစားချက်၊ တွေ့ကြုံနေရသော ဒုက္ခများကို တွေ့မြင်နိုင်ပါသည်။

မည်သို့ပင်ဆိုစေ ခေတ်စနစ်အပြောင်းအလဲကားလသာ ရှိသေးသော မြန်မာနိုင်ငံသည် ဒီမိုကရေစီ စနစ်ပီပီ ပြည်သူများ ပူးပေါင်းပါဝင်မှု ရှိနေပြီဟု ထင်မှတ်ရသည်။ အဘယ်ကြောင့်ဆိုသော် ဒီမိုကရေစီစနစ်သည် အချင်းချင်းထိန်းညှိပြီး အာဏာခွဲဝေကျင့်သုံးရသော စနစ်ဖြစ်သည်။ ထို့ကြောင့် ပြည်သူများသည် ငြိမ်ခံနေရသော စနစ်ကို တွန်းလှန်ပြီး ရဲရဲရင့်ရင့် ပူးပေါင်းပါဝင်မှု ရှိလာနေသည် ဖြစ်သည်။

ယခုတွင် ဒီမိုကရေစီစနစ်အရသာကို ခံစားလိုသော ပြည်သူများသည် ယခင်ကပုံစံအတိုင်း ခြိမ်းခြောက်သမျှက်ို ငြိမ်ခံနေတော့မည် မဟုတ်ပေ။ အဖွဲ့အစည်းများသည်လည်း နိုင်ငံရေးကို လုပ်ဆောင်မည်ဟု ရည်ရွယ်ထားလျှင် ပြည်သူ၏ကဏ္ဍကို မမေ့သင့်ပေ။ ”ပြည်သူသည်သာအမိ ပြည်သူသည်သာအဖ” ဟု ပြောင်းလဲနေပြီး ဖြစ်သည်။ တပ်မတော်သည်အမိ တပ်မတော်သည်အဖ ဟု ကြွေးကြော်နေသော စစ်အစိုးရစစ်နစ်မှ ဒီမိုကရေစီစနစ်သို့ ကူးပြောင်းလာပြီ ဖြစ်သည့်အတွက် ပြည်သူလူထုကို အထင်မြင်သေးသော အဖွဲ့အစည်းများ သို့မဟုတ် အမျိုးသားခေါင်းဆောင်များ သို့မဟုတ် အစိုးရများကို ပြည်သူ၏ထောက်ခံမှုကို ရရှိမည်မဟုတ်ကြောင်း တင်ပြချင်ပါသည်။

တစ်ချို့က ပြောလေ့ရှိစကားရှိသည်။ ”ဒီမိုကရေစီစနစ်ကို တပ်မတော်က ပေးတာ၊ မပေးလည်းရသည်” ဟု ပြောကြသည်။ ယုတ္တိမရှိသော စကားပင် ဖြစ်သည်။ နိုင်ငံတကာ၏ ဖိအားနှင့် ပြည်သူလူထု၏ တောင်းဆိုမှုကို ချန်ထား၍ မရသော အခြေနေသို့ ရောက်ရှိနေပြီဖြစ်သည့်အတွက် ဒီမိုကရေစီစနစ်ကို ပြောင်းလဲ့ကျင့်သုံးရခြင်း ဖြစ်သည်ကို နားလည်ထားရန် လိုအပ်သည်။

ထို့ကြောင့် ငြိမ်းချမ်းရေးအဖွဲ့အစည်းများ အာဏာရှိခေါင်းဆောင်များသည် ပြည်သူလူထုကို အထင်မြင်သေးခြင်း ကင်းရှင်ရန် လိုအပ်နေပြီး ဖြစ်သည်။ ပြည်သူလူထုမရှိလျှင် အဘယ်သူကို အုပ်ချုပ်နိုင်မည်နည်း။ အုပ်ချုပ်မှုအာဏာကို ရရှိရန် ပြည်သူလူထုက အရေးကြီးဆုံးအချက်ဖြစ်သည်။ ယခုတွင် ပြည်သူလူထုသည် အသိမြင်ပိုမိုကျယ်ပြန့်လာပြီ ဖြစ်သည့်အတွက် ခြိမ်းခြောက်တိုင်း ကြောက်နေမည့် ပြည်သူများ မဟုတ်တော့ပေ။

No comments: