ပအမဖ ပါတီရုံးဖွင့်ပွဲနှင့် ဆိုင်းဘုတ်တင်ပွဲပြုလုပ်

ခွန်ရာဇာ (တောင်ကြီး) | မတ်ခ်ျလ ၁၆ ရက်၊ ၂၀၁၄ ခု | တောင်ကြီးတိုင်းမ်


ပြည်ထောင်စုပအိုဝ်းအမျိုးသားအဖွဲ့ချုပ် (ပအမဖ) ပါတီသည် ပြည်ထောင်စုရွေးကောက်ပွဲကော်မရှင်မှ ဇန်နဝါရီ ၂၃ ရက်တွင် နိုင်ငံရေးပါတီအမှတ် ၇၃ ရရှိထားပြီး ပါတီရုံးချုပ်ဖွင့်ပွဲနှင့်ဆိုင်းဘုတ်တင်ပွဲကို မတ်လ ၁၅ ရက်နေ့ တောင်ကြီးမြို့ ညောင်ဖြူစခန်းရပ်၊ ည/၁၀၇၄ အနောက်မြို့ပတ်လမ်းပေါ်တွင် ဖွင့်လှစ်ကြောင်း သိရသည်။

“ဒီနေ့ဟာ အစိုရကနိုင်ငံရေးပါတီအနေဖြင့် တရားဝင်အသိမှတ်ပြုလိုက်ပြီ။ ဒါကြောင့် ပွင့်လင်းမြင်သာစွာ လုပ်ကိုင်တော့မှာ၊ ပအမဖအနေဖြင့် ပအိုဝ်းတိုင်းရင်းသားများအတွက် ပေါ်လစီကောင်းတစ်ခု ထွက်ပေါ်လာအောင် လုပ်ဆောင်သွားမှာဖြစ်တယ်၊ အနာဂတ်မှာလည်း ဒီတိုင်းမသွားဘူး၊ ပအမဖရဲ့သမိုင်းအရ ညီလာခံမှ ချမှတ်ထားသောလုပ်ငန်းစဉ်များကို အကောင်ထည်မဖော်ရသေးသောအရာကို အကောင်ထည်ဖော်နိုင်ဖို့ လုပ်ဆောင်သွားရမှာဖြစ်တယ်၊ မူဝါဒချမှတ် ထားသည်ကို ခေတ်နှင့်လျှော်ညီအောင် လုပ်ဆောင်သွားမှာဖြစ်တယ်၊ ပအမဖအဟောင်းရဲ့အမွေကို ဆက်ခံပြီး အသစ်ကို ပေါင်းစပ်မှာဖြစ်တယ်၊ ပအိုဝ်းအမျိုးသားကိစ္စအတွက် အဖွဲ့ပေါင်းစုံမှ ဆွေးနွေးတိုင်ပင်ရမှာပါ။ ပအိုဝ်းပြည်သူလူထု မရရှိသေးသောအခွင့်အရေးကို ခံယူစိတ်ပျင်းပျင်းဖြင့်လုပ်ဆောင်သွားမှာဖြစ်တယ်။” ဟု ပအမဖ ယာယီအတွင်းရေးမှူး ခွန်ခေတ်စံက ပြောသည်။

“ငယ်ငယ်ကတည်းကသိလာတာ ပအိုဝ်းနိုင်ငံရေးဟာ ပအမဖပဲရှိတယ်လေ။ ယခု ပအမဖပြန်လည် အသက်ရှင်မယ်ဆို ဝမ်းသာတာပေါ့၊ ပအိုဝ်းမှာ ပါတီနှစ်ကို ရှိလာတာကို ပြည်သူလူထု ဆုံးဖြတ်မှုအပေါ်မှာဘဲ မူတည်ပါတယ်၊ ဒီ ပအမဖ ပါတီဟာ အသစ်လား အဟောင်းရဲ့အမွေကို ဆက်ခံမှာလား အရေးကြီးတယ်။ အစဉ်လာကြီးမားခဲ့သော ပအမဖအမွေကို ဆက်ခံမယ်ဆိုလျှင် ၅၀% က အောင်မြင်မှု ရပြီးသားလို့မြင်တယ်၊ ပအိုဝ်းနိုင်ငံရေးစစ်ဟာ ဒီ ပအမဖပါတီဖြစ်တယ်။ ယခုလုပ်မယ်သူဟာလည်း နိုင်ငံရေးသမားအစစ်ဖြစ်ဖို့ လိုတယ်။ အတ္တမထားဖို့ ပရစိတ်ကို မွေးဖို့လိုတယ်” ဟု တရားလွတ်တော်ရှေ့နေ ဦးခွန်စိန်ဝင်းက ပြောသည်။

“ပြည်ထောင်စုပအိုဝ်းအမျိုးသားအဖွဲ့ချုပ် ပေါ်လာတာကို ဒီမိုကရေစီနိုင်ငံတော်အတွက် အင်အားတစ်ခုလို့ ကျွန်တော်တို့ သတ်မှတ်တယ်၊ ဒီမိုကရက်တစ်အင်အားစုဆိုတဲ့ ပြည်သူ့အကျိုးအတွက် ဘယ်လောက်လုပ်နိုင် တဲ့ပါတီလဲ ဆိုတာ စောင့်ကြည့်ရမှာပါ၊ ကျွန်တော်တို့နိုင်ငံဟာ အရပ်ဘက်လူ့အဖွဲ့စည်းအားကောင်းပြီး ပါတီအားမကောင်လျှင်လည်း ဒီမိုကရေစီသွားမည့်လမ်းကြောင်း နည်းနည်းခက်ခဲနေမယ်၊ ပါတီအားကောင်းဖို့လည်း လိုတယ်။ နိုင်ငံတကာစံနှုန်းနှင့်သာ သွားနေရတယ်။ အမျိုးသားစံနှုန်း တိုင်းရင်းသားစံနှုန်းနှင့်သွားဖို့လည်း လိုအပ်ပါတယ်၊ ဒီ ပအမဖ က ရှေးအင်္ဂလိပ်လက်ထက်ကတည်းက ရှိလာတာသိရတယ်၊ တော်တော်လေးစားခဲ့ရတယ်။ ကြားထဲမှာ ဘယ်လိုပျောက်သွားပြီး ဘယ်လိုနာမည်ပြောင်းသွားသည်ကို ကျွန်တော်မျက်စိလည်ခဲ့ရပါတယ်။ ယခု လူငယ်အဖွဲ့မှ ပြန်လည်ဖွဲ့စည်းသည်ကို ကျွန်တော်တို့က ဝိုင်းဝန်းကူညီပေးသွားမည်” ဟု ၈၈မျိုးဆက်ပွင့်လင်းအဖွဲ့စည်းရှမ်းပြည် ကိုနေမျိုးက ပြောသည်။

ပါတီရုံးဖွင့်ပွဲကို နိုင်ငံရေးပါတီအချို့နှင့် အရပ်ဘက်လူ့အဖွဲ့စည်းများ အစိုးရဌာနဆိုင်ရာအချို့များကို ဖိတ်ထားကြောင်း သိရသည်။

No comments: