မြေယာမှုခင်းဖြေရှင်းခြင်းမရှိ၍ မြေယာပိုင်ရှင် ၀င်ရောက်လုပ်ကိုင်

ခွန်ရာဇာ (တောင်ကြီး) | ဧပြီလ ၃၀ ရက်၊ ၂၀၁၃ | တောင်ကြီးတိုင်းမ်

တောင်ကြီးမြို့နယ်၊ ပလီလင်းရွာတွင် နိုင်ငံတော် ကြက်ဆူစီမံကိန်းအတွက် မတရားသိမ်းဆည်းထား သောမြေအား အကောင်ထည်ဖော်ခြင်းမရှိဘဲ ပုဂ္ဂလိကသို့ လွဲပေးလိုက်ခြင်းဖြစ်ပြီး မြေယာပိုင်ရှင်များ ပြန်လည်လုပ်ကိုင်ခွင့်ပြုရန် တင်ပြခြင်းကို ဖြေရှင်းပေးခြင်းမရှိသည့်အတွက် မြေပိုင်ရှင်များ ၀င်ရောက်လုပ်ကိုင်နေပြီဖြစ်ကြောင်း ဧပြီ ၃၀ ရက်တွင် စုံစမ်းသိရှိရသည်။



၂၀၀၈ ခုနှစ်တွင် နိုင်ငံတော်ကြက်ဆူစီမံကိန်းအတွက် ပလီလင်းရွာနေ ဒေါ်အုန်းရွှေ၊ ဒေါ်နန်းဒေါ နှင့် ဦးအောင်သာတို့ပိုင်မြေ ၅.၇၅ ဧကကို တောင်ကြီးမြို့နယ် အေးချမ်းသာယာရေးနှင့် ဖွံ့ဖြိုးရေး ကောင်စီဥက္ကဌ ဦးကျော်စွာမှ နိုင်ငံတော်စီမံကိန်းဆောင်ရွက်ရန်ဟု မတရားသိမ်းဆည်းထားသော မြေကို အကောင်အထည်ဖော်ခြင်းမရှိဘဲ ၂၀၁၀ တွင် တောင်ကြီးမြို့၊ စစ်စံထွန်းရပ်ကွက်နေ ဦးမြင့်စိန်သို့ သီးစားချထားပေးကြောင်း သိရသည်။

၎င်းမြေနေရာကိုပင် တောင်ကြီးမြို့ ကျောင်းကြီးစုရပ်ကွက်နေ နန်းမြလှိုင်ဦးအား လွဲအပ်ထားပြီး ထိုနေရာတွင် ယခုချိန်ထိ အုတ်ဘလောက်၊ သဲတူး၊ ကွန်ကရစ်တိုင်လုပ်ငန်းများ လုပ်ကိုင်နေကြောင်း မြေသိမ်းခံရသူဒေါ်နန်းဒေါ ၏ သား ဦးမောင်ဟိန်းက ပြောသည်။

မြေယာပိုင်ရှင် တိုင်ကြားခြင်းကြောင့် တောင်ကြီးမြို့နယ် အုပ်ချုပ်ရေးမှုး ဦးကျော်ခေါင်က မြေယာမှုခင်းဖွင့်ပြီး ကာယကံရှင်များအနေဖြင့် ပိုင်ဆိုင်မှုနှင့် ပတ်သက်၍ သက်ဆိ်ုင်ရာကျေးရွာအုပ်စု အုပ်ချုပ်ရေးမှုးရုံးတွင် မြေယာမှုခင်းအဖြစ် အမှုတွဲဖွင့်လှစ်ဆောင်ရွက်သွားရေး ညွှန်ကြားချက်အား သိရှိနိုင်ရန် စက်တင်ဘာ ၉ ရက် ၂၀၁၂ တွင် အကြောင်းကြားထားကြောင်း သိရသည်။

ထိုမြေယာမှုခင်းကို နမ့်ဟူးကျေးရွာအုပ်စု ရယက ဥက္ကဌ ဦးအောင်ဆန်းသို့ တိုင်ကြားသော်လည်း ဖြေရှင်းပေးခြင်းမရှိ၍ မိုးရာသီအတွက် စိုက်ပျိုးရန် ပြင်ဆင်ဖို့ ခြံပိုင်ရှင်များက ၀င်ရောက်လုပ်ကိုင်နေပြီဖြစ်ကြောင်း ပလီလင်းရွာနေ ဦးခွန်မိုးအောင်က ပြောသည်။

No comments: