ပအိုဝ်းအမျိုးသားအဖွဲ့ချုပ် ပါတီရန်ပုံငွေအတွက် လူထုထံကောက်ယူ

သျှမ်းသံတော်ဆင့် | စက်တင်ဘာ ၁၇ ရက်၊ ၂၀၁၀ | သောကျာနေ့

၂၀၁၀ ရွေးကောက်ပွဲမှာဝင်ရောက်ယှဉ်ပြိုင်မည့် ပအိုဝ်းအမျိုးသားအဖွဲ့ချုပ်သည် ပါတီရန်ပုံငွေအတွက် လူထုထံ တအိမ်ထောင် ကျပ်ထောင်ချီ ဆင့်ဆိုကောက်ခံနေကြောင်း စုံစမ်းသိရှိရပါသည်။

“ကျောက်တလုံးကြီးမြို့နယ်တကြော ကျေးရွာတွေမှာ တအိမ်ထောင်ကို ကျပ် ၂၀၀၀ လိုက် ကောက် တယ်မပေးမ နေရဘဲ။ မပေးရင်ဟိုအမှုဒီအမှု - (ဥပမာ ချဲအမှုအပြင်တခြားအမှု) နဲ့စွပ်စွဲပြီး အပြစ်ပေးတယ်၊ ဒေသအတွင်းအာဏာရှိတာလဲသူတို့ဘဲလေ ကြောက်နေရတယ်” - ဟု ထိုင်းနယ်စပ်ရောက် ပအိုဝ်းလူငယ်ခွန်ဟောဝ်မျတ်ကပြောပြ ပါသည်။

ခွန်စံလွန်ဦးဆောင်သည့် ပအိုဝ်းအမျိုးသားအဖွဲ့ချုပ်သည် ကျေးလက်လူထုထံ အဓမ္မပိုက်ဆံ လိုက်ကောက်သည့် အပြင် ၈ လပိုင်းတုန်းကလည်း ပအိုဝ်းလူထုအား နဂါးရုပ်အမှတ်တံဆိပ်ပါ ရင်ထိုးများ၊ ပန်းချီကားများ အရွယ်အစား အမျိုးမျိုးလုပ်ပြီး အဓမ္မရောင်းချပေးနေကြောင်းလည်း အမည်မဖေါ်လိုသည့်အခြား ပအိုဝ်းအမျိုးသား နောက်တဦးက သျှမ်းသံတော်ဆင့်ထံ ဤကဲ့သို့ပြောပြပါသည်။

“နဂါးရုပ်ဆိုတာက ပအိုဝ်းလူမျိုးတွေရဲ့ အမှတ်တံဆိပ်၊ သူတို့က အခွင့်ကောင်းယူပြီး ရင်ထိုးတွေ၊ ရွှေချီထိုး ငွေချီထိုး ပန်းချီကားချက်တွေလုပ်ပြီး ပအိုဝ်းလူထုထံဈေးအမျိုးမျိုးနဲ့ပြန်လည်ရောင်းချတယ်။ ဈေးအပေါဆုံးဟာက ဖိုက်ဘာ ရင်ထိုးအသေးလေးတခုကို ကျပ်ငွေ ၅၀၀၊ တသောင်းခွဲတန်ရှိတယ်၊ အဓမ္မ၀ယ်ခိုင်း တာက ကျပ် ၇၀၀၀ တန်ရင်ထိုး”

အဆိုပါနဂါးရုပ်ရင်ထိုးအား တတ်နိုင်၍ ၀ယ်သောသူများရှိသကဲ့သို့ မိသားစုဝင်ငွေနည်းသည့် ကျေးလက်ပအိုဝ်းလူထု အဖို့ အခက်အခဲဖြစ်ကြောင်း၊ သို့သော်မ၀ယ်ပါက မိသားစုအပေါ် ပြဿနာတစုံ တရာဖန်တီးလာနိုင်သောကြောင့် မိမိဆွေမျိုးအသိုင်းအ၀ိုင်းမှ ငွေချေးပြီးဝယ်ယူရကြောင်းပြောပြပါသည်။

ပအိုဝ်းအမျိုးသားအဖွဲ့ချုပ်တပ်ဖွဲ့အား ဦးအောင်ခမ်းထီဦးဆောင်၍ ၁၉၉၁ မတ်ခ်ျ ၂၇ ရက်၌ အာဏာသိမ်းစစ်အုပ်စု နှင့်အပစ်ရပ်ခဲ့သည်။ ဗိုလ်ချုပ်မှူးကြီးသန်းရွှေဦးဆောင်၍ ကြံ့ဖွတ်အသင်းစတင်ဖွဲ့စည်းသည့် ၁၉၉၃ ကတည်းက ဦးအောင်ခမ်းထီအား သျှမ်းပြည်ဆိုင်ရာ ကြံ့ဖွတ်ပါတီနာယကအဖြစ် တင်မြောက်ထားသည်။ အပစ်ရပ်လက်နက်ကိုင် တပ်ဖွဲ့အားလုံး ယခုနှစ်ဧပြီလနောက်ဆုံးထားကာအသွင်ပြောင်းရမည်ဆိုသည့် နအဖစစ်အုပ်စု၏ အစီအစဉ်အားလည်း ၎င်းကတစုံတရာငြင်းဆိုမှုမပြုဘဲ အကြွင်းမဲ့လက်ခံလိုက်သည်။

No comments: