အောက်ခြေဝန်ထမ်းများ လာဒ်စားမှုကြောင့် ခံစားနေရသော ဒေသခံပြည်သူများ အခြေနေကို နိုင်ငံတော်မှ စုံစမ်းစစ်ဆေးပေးရန် အထောက်ထားခိုင်မာစွာနှင့် သတင်းစာရှင်းလင်းပွဲကို ရွှေကမ္ဘောဇအဖွဲ့မှ ဦးဆောင်ပြီး ဇန်နဝါရီ ၁၅ ရက်တွင် အထက်ပေါင်းလောင်း ဂွေးကုန်းရွာသစ် ဘုန်းကြီးကျောင်းတွင် ကျင်းပကြောင်း သိရသည်။
“အထက်ပေါင်းလောင်းဒေသရှိ ကျေးရွာ ၂၃ ရွာဟာ ရေဝပ်ဧရိယာဖြစ်တဲ့အတွက် ပြောင်းရွှေ့နေထိုင်ခဲ့ရတယ်။ လယ်၊ အိမ်၊ ယာကိုင်းကျွန်းတွေ ပိုင်ဆိုင်မှုတွေ ဆုံးရှုံးခဲ့ရတယ်၊ ခေတ်အဆက်ဆက် အာဏာရှင်များ ဖိနှိပ်မှုကြောင့် အသိဥာဏ်များ နိုမ့်ကျခဲ့ရတယ်။ အောက်ခြေဝန်ထမ်းများ လာဒ်စားမှုကို အထောက်ထားအခိုင်အမာ ရှိပါတယ်။ ဒါကြောင့် ဒေသခံများ ခံစားနေရတဲ့ပြဿနာတွေ တင်ပြချက်တွေကို သမ္မတနဲ့ နိုင်ငံတော်အကြီးအကဲတွေ သိရှိဖို့လိုအပ်တယ်” ဟု ဖိုကုန်းရွာနေ ဒေါ်ခင်မာရီက ပြောသည်။
ရေဝပ်နေရာဖြစ်သော အထက်ပေါင်းလောင်း ကျေးရွာများသည် တရာမျှတစွာ ပြုလုပ်ပေးခြင်းမရှိကြောင်း၊ ကော်မတီအဖွဲ့ဝင်နှင့် ကျေးရွာအုပ်ချုပ်ရေးမှူးများ၊ အောက်ခြေအစိုးရဝန်ထမ်းများ လာဒ်စားမှုနှင့် မသမာမှုများရှိနေ၍ ဒေသခံပြည်သူများ ဆင်းရဲသထက် ဆင်းရဲနေသည်ကို တွေ့ရကြောင်း၊ ပြောင်းရွေ့နေသော ပြည်သူများ၏ အိမ်ကွက်တွင် သတ်မှတ်ပေနှင့် အ်ိမ်ကွက်ဖော်ရာ၌ ပြီးစီးခြင်းမရှိသည်ကို ပြီးစီးကြောင်း လက်မှတ်ထိုးခိုင်းကြောင်း။ အမှန်တကယ် ပြောင်းရွှေ့ခံပြည်သူတစ်ချို့က လျော်ကြေး ရရှိခြင်းမရှိ၍ ကော်မတီဝင်နှင့် အုပ်ချုပ်သူများက လုပ်ယူသွားကြောင်း။ လျော်ကြေးပေးသော အိမ်ပေါင်းကို အမှန်တကယ် ပြောင်းရွှေ့ရသည်ထက် စာရင်းပိုနေကြောင်း။ ရသင့်ရထိုက်သူက မရဘဲ၊ မရသင့်သူက ရနေကြောင်း။ ၎င်းကို သမ္မတကြီးနှင့် နိုင်ငံတော်အကြီးအကဲများ သိရှိနိုင်ရန် စုံစမ်းစစ်ဆေးမှုများ ပြုလုပ်ပေးသင့်ကြောင်း။ သမ္မတကြီး ဖော်ဆောင် ကောင်းမွန်သော အုပ်ချုပ်ရေနှင့် သန်းရှင်းသောအစိုးရကို ဖြစ်စေချင်ကြောင်း။ ဒေသခံများသည် လျော်ကြေးအပေါ် မကျေနပ်ခြင်းမဟုတ်ကြောင်း။ မတရာမှုများကို အထောက်အထားခိုင်လုံစွာ ညွှန်ချုပ်စီ တင်ပြပြီး ညွှန်ချုပ်က ဆဲလွတ်လိုက်ကြောင်း ဒေသခံများ ပြောပြချက်အရ သိရှိရသည်။
ရေဝပ်ဧရိယာ ကျေးရွာများရွှေ့ပြောင်းမှု ကွပ်ကဲရေးရုံးသို့ မေးမြန်းရာတွင် မြေကွက်မပြည့်မှုဟာ သက်ဆိုင်ရာ အုပ်ချုပ်ရေးမူးနဲ့ ဆိုင်ကြောင်း။ စက်ယန္တရားကို ပြီးစီးသည်အထိ ပေးထားကြောင်း။ မြေယာကိစ္စနဲ့ ပတ်သက်ပြီးတော့ သစ်တောမှ ကန့်ကွက်စာထွက်လာတာကိစ္စကို သိရှိမှုမရှိကြောင်း။ ဝန်ကြီးဌာနနှင့်သာ ဖြေရှင်းရမည်ဖြစ်ကြောင်း။ ထောက်ပံ့ကြေးကိစ္စနှင့်လည်း အကြိမ်ပေါင်းများစွာ ညိနိုင်းထားကြောင်း။ ထို့အတွက်ကြောင့် ကျေးရွာအုပ်ချုပ်ရေးမှုးနှင့် ရပ်မိရပ်ဖများနှင့်ဆိုင်ကြောင်း ကွပ်ကဲရေးမှူးရုံး လက်ထောက်ညွှန်ကြားရေးမှူး ဦးဝင်းနိုင်က ရှင်းလင်းသွားကြောင်း သိရသည်။
“အစိုးရတော့ တာဝန်ကျေသလောက်ရှိပြီပေါ့။ လျော်ကြေးလည်း ရရှိနေပါပြီ၊ ဒါပေမဲ့ မမျှတမှုက များနေတယ်၊ မျှတသွားအောင်နဲ့ ဒေသခံများဆန္ဒအရ ရည်ရွယ်ပြီးတော့ မီဒီယာနဲ့ ဒေသခံများ တွေ့ဆုံပေးခြင်း ဖြစ်တယ်။ ဒီနှစ်မှာ သူတို့ပေးတဲ့ လျော်ကြေးနဲ့ ရပ်တည်လို့ရပါတယ်။ နောက်ပိုင်းမှာ စားစရာမရှိသည်အထိ ဖြစ်သွားနိုင်တယ်။ ဒါကြောင့် လာမည့်တစ်နှစ်၊ နှစ်နှစ်ဆိုရင် ဒီထက်ပိုပြီး ဒေသခံအသံ ပိုထွက်မှာ သေချာတယ်။ အစိုးရက မြေနေရာ ပြန်လည် လုပ်ကိုင်စားသောက်ဖို့၊ ဒေသခံများ အသက်မွေးဝမ်းကြောင်း ပြန်လည် မဖြည့်ဆည်းပေးဘူးဆိုရင် လမ်းပေါ်ရောက်ပြီး ဆန္ဒထုတ်ဖော်တဲ့ အဆင့်ထိ ရောက်နိုင်တယ်” ဟု ကယန်းမျိုဆက်သစ်လူငယ်အဖွဲ့ ဦးဆောင်သူ ကောရီက ပြောသည်။
တက်ရောက်သူပြည်သူ ၁ဝဝ ဝန်းကျင်ရှိပြီး ခံစားနေရသော ပြည်သူများဖြစ်ကြောင်း၊ ပြည်သူများ တောင်းဆိုမှုကို အစိုးရအနေဖြင့် ဖြည့်ဆည်းပေးမှု မရှိပါက ဆန္ဒပြသွားမည်ဖြစ်ကြောင်း၊ တရားမျှတမှုရှိအောင် လွတ်လပ်သော စုံစမ်းစစ်ဆေးရေးအဖွဲ့မှ အမြန်ဆုံး ကွင်းဆင်းလေ့လာ ဖြေရှင်းပေးသင့်ကြောင်း ကျေးရွာ၂၃ ရွာမှ ဒေသခံများက အလိုရှိကြကြောင်း သိရသည်။
No comments:
Post a Comment