မြန်မာနိုင်ငံ ပညာရေး ပြုပြင်ပြောင်းလဲရေး လုပ်ငန်းစဉ်မှာ လူနည်းစု တိုင်းရင်းသားတွေရဲ့ ဘာသာစကား သင်ကြားမှုကို ချန်လှပ်မထားသင့်ဘူး လို့ ပညာရေးနှီးနှောဖလှယ် ဆွေးနွေးပွဲတစ်ရပ်မှာ တိုင်းရင်းသား ပညာရှင်များက တင်ပြပြောဆိုခဲ့တယ်လို့ သိရပါတယ်။
အောက်တိုဘာလ ၆ ရက် ၇ ရက် ရန်ကုန်မြို့ အင်းစိန် ခရစ်ယာန် ကျမ်းစာသင်ကျောင်းမှာ ကျင်းပခဲ့တဲ့ မြန်မာနိုင်ငံ ပညာရေး ပြုပြင်ပြောင်းလဲမှုဆိုင်ရာ ဆွေးနွေးပွဲမှာ ကချင်၊ ကယား၊ ကရင်၊ မွန်၊ ရှမ်း စတဲ့ တိုင်းရင်းသား ပညာရှင်တွေက အခုလို မီးမောင်းထိုးပြခဲ့တာဖြစ်ပါတယ်။ အဆိုပါ ဆွေးနွေးပွဲကို တက္ကသိုလ် အသီးအသီးမှ အငြိမ်းစားယူခဲ့တဲ့ ပါမောက္ခချုပ်များ၊ ပါမောက္ခကြီးများ၊ နိုင်ငံရပ်ခြားမှ ဘွဲ့ ရရှိလာတဲ့ လူငယ်ပညာရှင်များ၊ ဘုန်းတော်ကြီးသင် ပညာရေးကျောင်းများ၊ အခြားပညာရေးဆိုင်ရာ အဖွဲ့အစည်းများ အပြင် အမျိုးသားဒီမိုကရေစီအဖွဲ့ချုပ် နာယက ဦးတင်ဦး၊ ၈၈ မျိုးဆက်ကျောင်းသား ခေါင်းဆောင် ဦးမင်းကိုနိုင်တို့လည်း တက်ရောက်ကြတယ်လို့ သိရပါတယ်။
အဆိုပါ ဆွေးနွေးပွဲမှာ ခေါင်းစဉ်အလိုက် အုပ်စုဖွဲ့ ဆွေးနွေးခဲ့ကြပြီး တိုင်းရင်းသား ဘာသာစကားနှင့် ပညာရေးဆိုတဲ့ ခေါင်းစဉ်မှာ တိုင်းရင်းသား ပညာရှင်များ ဆွေးနွေးခဲ့ကြပြီး ပညာရေး ပြုပြင်ရေး လုပ်ငန်းစဉ်များမှာ ထည့်သွင်းလုပ်ဆောင်သင့်တဲ့ အချက် ၇ ချက်ကို အခုလို တင်ပြခဲ့ပါတယ်။
၁။ မိခင်ဘာသာစကား၊ နိုင်ငံသုံးသာသာစကား (မြန်မာ)၊ နိုင်ငံတကာသုံး ဘာသာစကား (အင်္ဂလိပ်) ဆိုသည့် ဘာသာစကား ၃ မျိုး မူဝါဒချမှတ်ရန်။
၂။ ဗဟိုချုပ်ကိုင်မှု လျော့နည်းသော ပညာရေးစနစ်ကို ပြဌာန်းပေးရန်။
၃။ တိုင်းရင်းသား ကလေးများအားလုံး တန်းတူ အခွင့်အလမ်းများကို ခံစားခွင့်ရရှိရန်။
၎။ အခြေခံ မူလတန်းအဆင့်တွင် မိခင်ဘာသာစကားကို သင်ကြားမှု မဏ္ဍိုင်စကားအဖြစ် အသုံးပြုရန်။
၅။ တိုင်းရင်းသားများ၏ ရိုးရာယဉ်ကျေးမှု၊ သမိုင်း၊ ဓလေ့ထုံးတမ်းအစဉ်အလာ၊ ကိုးကွယ် ယုံကြည်မှုများကို ထိန်းသိမ်းရန် သင်ရိုးညွှန်းတမ်းတွင် ဘာသာရပ် တစ်ခုအဖြစ် သင်ကြားခွင့်ပြုရန်။
၆။ အခြေအနေ အမျိုးမျိုးကြောင့် တက္ကသိုလ် ပညာသင်ယူခွင့် ဆုံးရှုံးနေသူများ အတွက် သတ်မှတ်စံစာမေးပွဲ ဖြေဆိုခွင့်ပြုကာ အဆင့်မြင့်
ပညာကို ဆက်လက်သင်ယူခွင့် ဖန်တီးပေးရန်။
၇။ တိုင်းရင်းသားဒေသများတွင် ဖွင့်လှစ်ထားသောကျောင်းနှင့် ပညာရေးစနစ်များကို အစိုးရက ဥပဒေပြုတရားဝင် အသိအမှတ်ပြုပေးရန်။
နိုင်ငံရပ်ခြားမှာ ပညာသင်ကြားခဲ့ပြီးသူများနဲ့ ဖွဲ့စည်းထားတဲ့ မြန်မာပညာရှင်များကွန်ရက် အဖွဲ့ဝင် ရှမ်းတိုင်းရင်းသူ တစ်ဦးအနေနဲ့ ဝင်ရောက်ဆွေးနွေးခဲ့တဲ့ နန်းဟျိူးဆိုင် က – ကျမတို့ တိုင်းရင်းသားတွေ တင်ပြတဲ့အချက် ၇ ချက်ကို အားလုံးက စိတ်ဝင်တစားနဲ့ ဆွေးနွေးအတည်ပြုလက်ခံကြပါတယ်။ အဓိက နံပါတ်တစ်နဲ့ နံပါတ်လေး အချက်တွေကို အများက စိတ်ဝင်တစားနဲ့ ဆွေးနွေးဖြစ်ကြတယ်။ ပညာရေးကို
လွတ်လပ်စွာ စီမံပိုင်ခွင့်ရလာရင် ကျမတို့ တိုင်းရင်းသားတွေ မိခင်ဘာသာစကားနဲ့ သင်ကြားနိုင်ဖို့အတွက် ပိုမို ဆောင်ရွက်လာနိုင်မယ်လို့ယုံကြည်ပါတယ်။ NLD နဲ့ ၈၈ ကလည်း ကူညီဆောင်ရွက်ပေးသွားမယ်လို့ ပြောသွားပါတယ်။ ကျမတို့ကလည်း လွှတ်တော်ထဲမှာ အသံထွက် နိုင်အောင် ရှမ်းနိုင်ငံရေးပါတီတွေနဲ့ ဆွေးနွေးမယ်။ ပြီးတော့ ရှမ်းစာပေယဉ်ကျေးမှုအဖွဲ့တွေ၊ ပညာရှင်တွေ၊ ရှမ်းပညာရေး အဖွဲ့အစည်းတွေ နဲ့ စုပေါင်းတိုင်ပင် ဆွေးနွေးပြီး မူလတန်းပညာရေးကို ရှမ်းဘာသာစကားနဲ့ သင်ကြားသွားနိုင်အောင် ကြိုးစားသွားမှာပါ။ အခုကတော့ ပထမဆုံး ခြေလှမ်းပဲ ရှိပါသေးတယ်။ အများကြီးကြိုးစားကြရပါဦးမယ် – လို့ ကော့လီ ကိုပြောပါတယ်။ အဆိုပါ ဆွေးနွေးပွဲမှာ
ပညာရေးလွတ်လပ်ခွင့်နှင့် စီမံခန့်ခွဲမှု၊ အခြေခံပညာ ပြုပြင်ပြောင်းလဲရေး၊ တက္ကသိုလ်ပညာ ပြုပြင်ပြောင်းလဲရေး၊ အသက်မွေးဝမ်းကျောင်းပညာရေး၊ ကျောင်းပြင်ပ ပညာရေး၊ ဘုန်းတော်ကြီးသင် ပညာရေး၊ ဘာသာရေးအဖွဲ့အစည်းများ၏ ပညာရေး လုပ်ငန်းများ၊ တိုင်းရင်းသား ဘာသာစကားနှင့် ပညာရေး၊ ပညာဒါန ကျောင်းများ၊ ပုဂ္ဂလိက ကျောင်းများ စတဲ့ ခေါင်းစဉ်များကို ဆွေးနွေးခဲ့တယ်လို့ သိရပါတယ်။
No comments:
Post a Comment