တောင်ကြီးမြို့နယ် ပန်းတင်ကျေးရွာအုပ်စုနှင့်နောင်လေကျေးရွာအုပ်စု နယ်နိမိတ်နှစ်ခုကြား နယ်နိမိတ်ကျူးကျော်ခြင်း မြေယာပြဿနာကို အသစ်ရောက်လာသော ခရိုင်အုပ်ချုပ်ရေးမှူးကို မျက်မြင်ရှိရန် မြို့နယ်အထွေထွေအုပ်ချုပ်ရေးမှူးနှင့် နှစ်ဘက်ကျေးရွာ အုပ်စုအုပ်ချုပ်ရေးမှူးများ ကွင်းဆင်းလေ့လာကြောင်း မေ ၃၀ ရက်တွင် သိရသည်။
“ဝန်ကြီးများ ဖြေရှင်းပေးမှာ၊ သူတို့ကို သွားမေးရမှာ၊ ငါတို့ကို မမေးနဲ့တော့၊ နှစ်ဖက်စလုံးကို တဖက် ၅ဝ ကျော်နဲ့ အစည်းအဝေးခန်းမမှာ ဝန်ကြီးများက ပြောပြီးပြီ၊ ယခု ခရိုင်အုပ်ချုပ်ရေးမှူးက အသစ်မို့လို့ လိုက်ပြနေတယ်၊ ဝန်ကြီးများက ဖြေရှင်းနေတယ် အနေအထားမပျက် ပုံမှန်အတိုင်း စိုက်ပျိုးလုပ်ကိုင်သွားဖို့ဘဲ” ဟု မြို့နယ်အထွေထွေအုပ်ချုပ်ရေးမှူး ဦးဇော်မြင့်သိန်းက ပြောသည်။
“ဒီနေ့က ဖြေရှင်းမပေးဘူးဆိုပေမဲ့ အရင်က ကျွန်တော်တို့ စိုက်ထားတဲ့တိုင်ကို ဖြုတ်ခိုင်းပြီး၊ အခု သူတို့သတ်မှတ်တဲ့ နယ်နိမိတ်ကို ပြနေတာကို သိရတယ်” ဟု နောင်လေကျေးရွာအုပ်စုမှ ဦးထွန်းက ပြောသည်။
“ကျွန်တော်တို့က မြေပုံမူရင်းအတိုင်းကလို ပြန်လိုချင်ပါတယ်၊ အခု ဘုန်းကြီးကျောင်းက မြေပုံအတုထဲ ပါသွားပြီး၊ ဒါကို အလှူသဘောဖြင့် သတ်မှတ်လိုက်တယ်၊ ဒါပေမဲ့ ကျန်တာကို နဂိုမူလအတိုင်း ပြန်လိုချင်တယ်” ဟု နောင်လေကျေးရွာအုပ်စုမှ ဦးထီးက ပြောသည်။
“ခဏခဏကွင်းဆင်းလေ့လာပြီး ဘာမှလဲအဖြေမပေါ်လာဘူး။ ဖြေရှင်းမှုလည်း မရဘူး။ ကျွန်တော်တို့က အလုပ်အပျက်ခံပြီး လာနေရတယ်၊ အုပ်ချုပ်သူက ထိထိရောက်ရောက်ဖြေရှင်းမှုမရှိဘဲ အချိန်ဆွဲနေသလို ခံစားရတယ်၊ ယခု ကွင်းဆင်းလာရင် စရိတ်ကို ကျေးရွာအုပ်ချုပ်ရေးမှူးက ပေးနေရတယ်၊ ယခုလည်း လာကြည့်ရုံသက်သက်ကို ရွာသား ၅ဝ ဝန်းကျင် လိုက်လာရတယ်၊ အစွန်အဖျားကို လာကြည့်ပြီး ပြန်သွားကြတယ်၊ အထဲထိ ကွင်းဆင်းခြင်းလည်း မရှိ၊ ဒါကလည်း အစိုးရရဲ့ လုပ်ထုံးလုပ်နည်းတစ်ခုဘဲလား ထင်မိတယ်” ဟု ကွင်းဆင်းသောနေရာအနီး ဒေသခံတစ်ဦးက ပြောသည်။
မြို့နယ်အထွေထွေအုပ်ချုပ်ရေးမှူး ဦးဇောမြင့်သိန်း၊ ခရိုင်အုပ်ချုပ်ရေးမှူး ဦးကံထွန်း၊ မြို့နယ်မြေစာရင်းနှင့် ပန်းတင်ကျေးရွာအုပ်စုမှ အုပ်ချုပ်ရေးမှူး ဦးခွန်မောင်လေးနှင့် ရွာသားများ၊ နောင်လေကျေးရွာအုပ်စု အုပ်ချုပ်ရေမှူး ဦးကီးနှင့် ရွာသားများ ဂနိုင်ရွေးရွာ ဇေယန္တောဘုန်းကြီးကျောင်တွင် စုံပြီးကွင်းဆင်းလေ့လာသွားကြောင်း သိရသည်။
No comments:
Post a Comment