နောင်ခမ်းခါ | ၁၇ မတ်လ ၂၀၁၁ | ကြာသပတေးနေ့ | တောင်ကြီးတိုင်းမ်၂၀၁၁ ခုနှစ် မတ်လ ၁၉ ရက်နေ့တွင် ကျရောက်မည့် တပေါင်းလပြည့်နေ့ ပအိုဝ်းအမျိုးသားနေ့ကို ဂုဏ်ပြုသည့်အနေဖြင့် ထိုင်းနိုင်ငံ ဘန်ကောက်နှင့် အခြားမြို့များတွင် ရောက်ရှိသည့် ပအိုဝ်းလူငယ်များမှ စုပေါင်း၍ ပအိုဝ်းအမျိုးသားနေ့အထိန်းအမှတ်အဖြစ် "ဒဲဉ်သီ;လိတ်စောင်;" အမည်ရှိ တပေါင်းစာစောင်ကို ယနေ့တွင် ထုတ်ဝေခဲ့ကြောင်း သိရသည်။
စာစောင်ထုတ်ဝေရခြင်း၏ အဓိကဦးတည်ချက်များမှာ ပအိုဝ်းလူမျိုးအချင်းချင်းများအကြားတွင် ရင်းနှီးချစ်ကြည်ရေး၊ စည်းလုံးညီညွတ်ရေး၊ ပြည်ပတွင်နေထိုင်သည့် ပအိုဝ်းလူများ မိမိတို့ပအိုဝ်းစာပေကို ထိန်းသိမ်းရေး၊ နိုင်ငံရပ်ခြားတွင်ရောက်ရှိသည့် ပအိုဝ်းလူမျိုးများ မျိုးချစ်စိတ်ဓာတ် ရှင်သန်လာရေးနှင့် ပြည်တွင်းရှိ ပအိုဝ်းပြည်သူများကို အစဉ်သတိရပြီး ပအိုဝ်းရိုးရာဓလေ့ထုံးတမ်းများ ထိန်းသိမ်းသွားစေရန် စသည်တို့ဖြစ်ကြောင်း စာစောင်တွင် ဖေါ်ပြထားသည်။
ယင်းစာစောင်သည် ပအိုဝ်းဘာသာဖြင့် ရေးသားထုတ်ဝေခြင်းဖြစ်ပြီး ထိုင်းနိုင်ငံတွင် နှစ်အဆက်ဆက် နေထိုင်သည့် ပအိုဝ်းလူမျိုးများနှင့် ထိုင်းနိုင်ငံအနှံ့အပြားတွင် ရောက်ရှိသည့် ပအိုဝ်းလူမျိုး ရွှေ့ပြောင်း အလုပ်သမားများ၊ ထိုင်းနိုင်ငံပညာတော်သင်ရောက်ရှိသည့် ပအိုဝ်းရဟန်းသံဃာနှင့် ကျောင်းသူ ကျောင်းသားများသို့ အဓိက ဖြန့်ချီရောင်းချသွားမည်ဖြစ်ကြောင်း သိရသည်။
စာစောင်ဖြစ်မြောက်ရေးအတွက် ပအိုဝ်းစာပေနှင့်ပတ်သက်၍ အတွေ့အကြုံရင့်ကျက်သည့် ပြည်တွင်းပအိုဝ်းလူမျိုးများကြားတွင် လူသိများသည့် ဝေးခွန်မောင်;၊ ခွန်ရွမ်အာ;နှင့် အခြားသော ပအိုဝ်းဘာသာ ကဗျာဆရာနှင့် စာရေးဆရာများ ပါဝင်စောင်ရွက် ရေးသားသည်ဟုလည်း သိရသည်။
ယင်း "ဒဲဉ်သီ;လိတ်စောင်;" စာစောင်အား ယခုအကြိမ်သည် ပထမဆုံးအကြိမ်ဖြစ်ပြီး၊ နောင်လာမည့် ပအိုဝ်းအမျိုးသားနေ့များနှင့်အတူ နှစ်စဉ်ထုတ်ဝေသွားမည်ဖြစ်ကြောင်းလည်း စာစောင်ထုတ်ဝေရာတွင် အဓိကပါဝင်သည့် ခွန်မွေး မှ ဆိုသည်။
ဤကဲ့သို့သော တပေါင်းလပြည့်နေ့ ပအိုဝ်းအမျိုးသားနေ့ အထိန်းအမှတ်အဖြစ် ထုတ်ဝေသည့် စာစောင်များအား ပြည်တွင်းတွင် နှစ်စဉ်ထုတ်ဝေလေ့ရှိသည်။ ထိုစာစောင်များအနက် နာမည်ကြီး လူသိများသည့် စာစောင်မှာ "ဒဲဉ်သီ;လက်ဆောင်;"၊ မြန်မာလို "တပေါင်းလက်ဆောင်" ဖြစ်သည်။
No comments:
Post a Comment