USDP အနိုင်တွက်ထားတဲ့ လူကြိုက်နည်းတဲ့ ၂၀၁၀ ရွေးကောက်ပွဲ ရက်သတ်မှတ်လိုက်ပြီ

တောင်ကြီးတိုင်းမ် | နောင်ခမ်းခါ | သြဂုတ်လ ၁၃ ရက်၊ ၂၀၁၀ | သောကျာနေ့

၁၉၉၀ ခုနှစ်ကတည်းက ပထမဦးဆုံးအကြိမ် ပြုလုပ်မယ့် ၂၀၁၀ ရွေးကောက်ပွဲကို နိုဝင်ဘာလ ၇ ရက်၊ တနင်္ဂနွေနေ့မှာ ကျင်းပမယ်လို့ ရွေးကောက်ပွဲ ကော်မရှင်ရဲ့ ထုတ်ပြန်ချက်တွေကို စစ်အစိုးရပိုင် သတင်းဌာနများက ဒီကနေ့ ကြေညာသွားပါတယ်။

တချိန်တည်းမှာပဲ နိုင်ငံရေးပါတီများအနေဖြင့် ရွေးကောက်ပွဲမှာ ၀င်ရောက်ယှဉ်ပြိုင်မယ့် မိမိတို့ လွတ်တော်ကိုယ်စားလှယ်လောင်း နာမည်စာရင်းများကို ယခု သြဂုတ်လ ၁၆ ရက်ကနေ သြဂုတ်လ ၃၀ အတွင်းမှာ တင်သွင်းရမယ့်လို့လည်း ကြေညာခဲ့ပါတယ်။

သတ်မှတ်ထားတဲ့ သက်တမ်းအရဆိုရင် နိုဘယ်ငြိမ်းချမ်းရေးဆုရှင် ဒေါ်အောင်ဆန်းစုကြည် နေအိမ်အကျယ်ချုပ်မှ ပြန်လွတ်ရမယ့်ရက်က နိုဝင်ဘာ ၁၃ ရက်နေ့ဖြစ်ပြီး၊ ဒီရွေးကောက်ပွဲမှာ ဒေါ်အောင်ဆန်းစုကြည် မပါဝင်နိုင်အောင် သူမ မလွတ်မြောက်ခင် တစ်ပတ်အလိုမှာ ကျင်းပပြုလုပ်သွားရန် တမင်တကာ ရက်သတ်မှတ်လိုက်ခြင်း ဖြစ်နိုင်ကြောင်း လေ့လာစောင့်ကြည့်သူတွေက ဆိုပါတယ်။

ယနေ့မှစ၍ ရွေးကောက်ပွဲကျင်းပမယ့်ရက် အထိဆိုရင် ရက်ပေါင်း ၈၀ ကျော်သာကျန်ရှိပြီး သုံးလတောင်မပြည့်တော့တဲ့ အချိန်ကာလအတွင်းမှာ ရွေးကောက်ပွဲ ပါဝင်ယှဉ်ပြိုင်မယ့် နိုင်ငံရေးပါတီ တော်တော်များများမှာ အနိုင်ရရှိရေးအတွက် ကျယ်ပြန့်တဲ့ ကွင်းဆင်းစည်းရုံးရေးလုပ်ဖို့အပြင် လိုအပ်တဲ့ ပါတီဝင်အင်အားစာရင်းတောင် မတင်နိုင်သေးကြပါဘူး။

အတိုက်အခံပါတီတွေက မိမိတို့ပါတီဝင်အင်အားများ စုဆောင်းဖို့နဲ့ စည်းရုံးရေးလုပ်ကိုင်ရာမှာ တင်းကြပ်တဲ့ နိုင်ငံရေးမှတ်ပုံတင်ခြင်းဆိုင်ရာနဲ့ ရွေးကောက်ပွဲဆိုင်ရာ ဥပဒေအောက်မှာ ပြုလုပ်နေရတာမကပဲ အာဏာပိုင်တွေရဲ့ လိုက်လံနှောက်ယှက်မှုတွေ ခြိမ်းခြောက်မှုတွေ နေ့စဉ်လိုလို ရင်ဆိုင်ကြုံတွေ့ နေရပါတယ်။ ဒီကိစ္စအပေါ် သက်ဆိုင်တဲ့ တာဝန်ရှိသူတွေကို တိုင်ကြားမှုတွေ ပြုလုပ်သော်လည်း အရေးယူမှု မရှိခဲ့ပါဘူးလို့ စစ်အစိုးရပြိုင်ဘက် ပါတီတွေရဲ့ ညည်းညူသံတွေ ကြားနေရပါတယ်။

အဓမ္မအတည်ပြုလိုက်တဲ့ ၂၀၀၈ ဖွဲ့စည်းပုံအခြေခံဥပဒေကို ပြန်လည်သုံးသပ်မှုနဲ့ ပြင်ဆင်မှုများ ပြုလုပ်ရန်တောင်းဆိုတဲ့အပေါ် စစ်အစိုးရက လစ်လျူရှုခဲ့မှု၊ ရွေးကောက်ပွဲနဲ့ နိုင်ငံရေးမှတ်ပုံတင်ခွင့်ဥပဒေ တရားမျတခြင်းမရှိမှု၊ ထောင်ချီတဲ့နိုင်ငံရေးအကျဉ်းသားများ ရွေးကောက်ပွဲမှာ ပါဝင်ဖို့ ပိတ်ပင်ထားမှု၊ မတရားဖမ်းဆီးထောက်ချခံနေရတဲ့ တိုင်းရင်းသားခေါင်းဆောင်များ ပြန်လွတ်ပေးခြင်းမရှိမှု စတဲ့ ကိစ္စတွေ ကြောင့် ၁၉၉၀ အနိုင်ရခဲ့တဲ့ NLD နဲ့ အခြား တိုင်းရင်းသား ပါတီတွေက ဒီ ၂၀၁၀ ရွေးကောက်ပွဲကို မပါဝင်ဖို့ ဆုံးဖြတ်ခဲ့ကြပါတယ်။

၂၀၀၈ ဖွဲ့စည်းပုံအခြေခံဥပဒေပြန်လည်သုံးသပ်ဖို့၊ ရွေးကောက်ပွဲဥပဒေပြန်လည်ပြင်ဆင်ဖို့၊ တိုင်းရင်းသား ခေါင်းဆောင်များနဲ့ နိုင်ငံရေးအကျဉ်းသားလွတ်ပေးဖို့၊ ရွေးကောက်ပွဲကို ဘက်ပေါင်းစုံ ပါဝင်နိုင်အောင် ပြုလုပ်ပြီး နိုင်ငံတကာမှ လာရောက်စောင့်ကြည့်လေ့လာခွင့်ပေးဖို့၊ သတင်းနဲ့မီဒီယာများ လွတ်လပ်စွာ တင်ပြပြောဆိုခွင့်ပေးဖို့၊ အခြားနိုင်ငံရေးပါတီများ လွတ်လပ်စွာ စည်းရုံးလှုံ့ဆော်ခွင့်ပေးဖို့ စတဲ့ ပြည်တွင်း ပြည်ပအတိုင်အခံအင်အားစုများနဲ့ နိုင်ငံတကာရဲ့ တောင်းဆိုချက်တွေကို ဥပေက္ခာပြုခဲ့တဲ့အပေါ် ကုလသမဂ္ဂနဲ့ နိုင်ငံတကာအသိုင်းအ၀ိုင်းက အကြိမ်အကြိမ် ဝေဖန်မှုတွေ ပြုလုပ်ခဲ့ပါတယ်။

အတိုက်အခံပါတီနဲ့ နိုင်ငံတကာအတိုင်းအ၀ိုင်းရဲ့တောင်းဆိုချက်တွေကို အလေးထားမှုမပြုပဲ ၎င်းတို့ အစီအစဉ်အတိုင်းသာ ရှေ့ဆက်သွားသည့်အတွက်ကြောင့် ၂၀၁၀ ရွေးကောက်ပွဲကို ဆန့်ကျင်သပိတ် မှောက်ကြဖို့ ပြည်တွင်းပြည်ပ အတိုက်အခံအင်အားစုများက စည်းရုံးလှုံ့ဆော်မှုများ ပြုလုပ်နေပါတယ်။

စစ်အစိုးရက ဘက်ပေါင်းစုံရဲ့တောင်းဆိုမှုတွေ ဝေဖန်မှုတွေကြားထဲမှ ၂၀၁၀ ခုနှစ်၊ သြဂုတ်လ ၁၁ ရက်၊ (၁၃၇၁ ခုနှစ်၊ ၀ါခေါင်လဆန်း ၁ ရက်) ရက်စွဲဖြင့် “ပြည်ထောင်စုရွေးကောက်ပွဲကော်မရှင်က ပြည်သူ့လွတ်တော်မဲဆန္ဒနယ်များ၊ အမျိုးသားလွတ်တော် မဲဆန္ဒနယ်များ၊ တိုင်းဒေသကြီးလွတ်တော် သို့မဟုတ် ပြည်နယ်လွတ်တော် မဲဆန္ဒနယ်များ၊ တိုင်းဒေသကြီးလွတ်တော် သို့မဟုတ် ပြည်နယ်လွတ်တော် တိုင်းရင်းသားလူမျိုးများ မဲဆန္ဒနယ်များ သတ်မှတ်ကြေညာ” ဆိုတဲ့ သတင်းခေါင်းစဉ်နဲ့ ရွေးကောက်ပွဲကော်မရှင်ရဲ့ ထုတ်ပြန်ချက်ကို သြဂုတ်လ ၁၂ ထုတ် ကြေးမုံသတင်းစာမှာ ဖေါ်ပြသွားပါတယ်။

တပြည်လုံးရှိ တိုင်းနဲ့ ပြည်နယ်အားလုံးက ပြည်သူ့လွတ်တော် (အောက်လွတ်တော်) မဲဆန္ဒနယ် ၃၃၀ ခု သတ်မှတ်ထားပါတယ်။ အမျိုးသားလွတ်တော် (အထက်လွတ်တော်) အတွက်ကတော့ တိုင်းနဲ့ ပြည်နယ် တစ်ခုခြင်းစီကို မဲဆန္ဒနယ် ၁၂ ခုစီနဲ့ အားလုံး မဲဆန္ဒနယ် ၁၆၈ ခု သတ်မှတ်ထားပါတယ်။

အတင်းအကြပ်အတည်ပြုလိုက်တဲ့ ၂၀၀၈ ဖွဲ့စည်းပုံအခြေခံဥပဒေရဲ့ လိုအပ်ချက်အတိုင်းဆိုရင် ပြည်သူ့လွတ်တော်အမတ်ဦးရေ ၄၄၀ ဦးရှိပြီး၊ ၎င်းအနက် ၁၁၀ ဦးက စစ်အစိုးရက တိုက်ရိုက်ရွေးချယ် ခန့်အပ်သွားမှာဖြစ်တယ်။ အမျိုးသားလွတ်တော်အမတ်ဦးရေကတော့ ၂၂၄ ဦးရှိပြီး၊ ၎င်းအနက် ၅၆ ဦးက စစ်အစိုးရက တိုက်ရိုက်ရွေးချယ်ခန့်အပ်သွားမှာဖြစ်တယ်။

ပြည်သူ့လွတ်တော်နဲ့ အမျိုးသားလွတ်တော် (အထက်လွတ်တော်နဲ့ အောက်လွတ်တော်) စုစုပေါင်းအမတ်ဦးရေ ၆၆၄ ဦးရှိတဲ့ အနက် ၁၆၆ ဦးက ပြည်သူလူထုမှ ရွေးကောက်တင်မြောက်ခြင်းမဟုတ်ပဲ စစ်အစိုးရက တိုက်ရိုက်ရွေးချယ်ခန့်အပ်လိုက်တာဖြစ်ပါတယ်။ ဒါတောင်မကသေးပဲ ပြည်သူလူထုက ရွေးကောက်တင်မြောက်မယ့် ကျန်တဲ့ ၄၉၈ ဦးထဲမှာလဲ စစ်အစိုးရကို ကိုယ်စားပြုတဲ့ပါတီက ၀င်ရောက် အရွေးချယ်ခံရအုံးမှာ ဖြစ်ပါတယ်။

USDP အနိုင်ရရှိဖို့အတွက် အချိန်များစွာယူပြီးတော့ နည်းလမ်းပေါင်းစုံနဲ့ စနစ်တကျ ပြင်ဆင်လာတဲ့ အတွက် ဒီရွေးကောက်ပွဲကို ကျိန်းသေနိုင်မယ်လို့ နေပြည်တော်စစ်အုပ်စုက အသေတွက်ထားပုံရှိတယ်လို့ လေ့လာစောင့်ကြည့်သူတွေက ပြောဆိုပါတယ်။

တဆက်တည်းမှာပဲ တင်းကြပ်တဲ့ဥပဒေနဲ့ ခြိမ်းခြောက်နှောက်ယှက်မှု မျိုးစုံအောက်မှ ရင်ဆိုင်ကျော်လွား ပြီးတော့ ပါဝင်ယှဉ်ပြိုင်တဲ့ အတိုက်အခံပါတီတွေက ဒီ ၂၀၁၀ ရွေးကောက်ပွဲကို အနိုင်ရရှိခဲ့ပါက စစ်အစိုးရအနေဖြင့် ဒီရွေးကောက်ပွဲရဲ့ရလဒ်ကို အသိအမှတ်ပြုပြီး အာဏာလွဲပြောင်းပေးမှုတွေ ပြုလုပ်အုံးမှာလားဆိုတဲ့ မေးခွန်းတွေလည်း ထွက်ပေါ်နေပါတယ်။

No comments: