သံဃာတော်များ ပတ်စ်ပို့လျှောက်ရန် တင်းကျပ်မှုများနှင့် ရင်ဆိုင်ရ

တောင်ကြီးတိုင်းမ် | နောင်ခမ်းခါ
သြဂုတ်လ ၁၀ ရက်၊ ၂၀၁၀ ခုနှစ် | အင်္ဂါနေ့

ကိစ္စအမျိုးမျိုးဖြင့် ပြည်ပနိုင်ငံသို့ ခရီးသွားရန် ခရီးသွားခွင့်လက်မှတ် (ပတ်စ်ပို့) လျှောက်သည့် ရဟန်းသံဃာတော်များအပေါ် အာဏာပိုင်များက ထောက်ခံစာအမျိုးမျိုးတောင်းပြီး တင်းကျပ်မှုများ ပြုလုပ်ထားကြောင်း သိရသည်။

ခရီးသွားခွင့်လက်မှတ်လျှောက်လိုသည့် သံဃာတော်များအား သာသနာရေးဝန်ကြီးဌာန လက်အောက်ခံဖြစ်သည့် သာသနာ့ထွန်းကားပြန့်ပွားရေးဌာန၏ ထောက်ခံစာ အရင်ယူရသည်ဟု ဆိုသည်။

တချိန်တည်းတွင် သာသနာ့ထွန်းကားပြန့်ပွားရေးဌာနတွင် ယင်းထောက်ခံစာ သွားယူသည့် အခါ၌လည်း မိမိသွားမည့်နိုင်ငံတစ်ခုခုတွင်ရှိသည့် အသိဖြစ်စေ၊ ဌာနတစ်ခုခုဖြစ်စေ ၎င်းတို့၏ခေါ်စာ သို့မဟုတ် ပြည်ပနိုင်ငံရှိ မြန်မာနိုင်ငံသံရုံး၏ ထောက်ခံစာ ပြခိုင်းသည်ဟုလည်း ဆိုသည်။

ယင်းခေါ်စာတစ်ခုခု မပါရှိပါက ခရီးသွားလမ်မှတ်လျှောက်ရန် လိုအပ်သည့် ထောက်ခံစာ လုံးဝ မရေးပေးကြောင်း ပြည်ပနိုင်ငံတစ်ခုတွင် ကျောင်းတက်ဖို့အတွက် ခရီးသွားလက်မှတ် လျှောက်ရန် ကြိုးစားသည့် ရန်ကုန်မြို့နေ စာချသံဃာတော်တစ်ပါးက ဆိုသည်။

“ဦးဇင်းက ပတ်စ်ပို့လျှောက်ဖို့ အဲဒီရုံးကိုသွားတော့၊ သာသနာ့ထွန်းကား ပြန့်ပွားရေးဌာန ထောက်ခံစာ လိုအပ်တယ်လို့ သူတို့ပြောတယ်။ အဲဒီတော့ ဦးဇင်းက ကမ္ဘာအေးကုန်းမှာရှိတဲ့ သာသနာထွန်းကားပြန့်ပွားရေးရုံးမှာ ထောက်ခံစာ သွားတောင်းတယ်။ သူတို့က ပြည်ပကခေါ်စာ ပြရမယ်လို့ပြောတယ်။ သံရုံးထောက်ခံစာလဲတောင်းတယ်၊ ဘယ်လို ဆက်လုပ်ရမှာတော့ မသိတော့ဘူး”

ထို့အတူ သာသနာ့ထွန်းကားပြန့်ပွားရေးရုံးမှ ရုံးဝန်ထမ်းများနှင့် အရာရှိများက ထောက်ခံစာ လာရောက် တောင်းယူသည့် ရဟန်းသံဃာတော်များအပေါ် ရိုင်းပြစွာပြုမူဆက်ဆံ ပြောဆိုနေကြောင်းလဲ ကိုယ်တိုင် သွားရောက်သည့် ဦးဇင်းတပါးက ဆိုသည်။

“အဲဒီက ၀န်ထမ်းတွေက ထောက်ခံစာသွားတောင်းတာကို အေးအေးဆေးဆေး ပြန်ပြောပြတာမျိုး မရှိဘူး။ ဒေါသတွေ ကြီးပြီးတော့ ဆဲဆိုပြီးတော့ ပြောတာ၊ ဟိန်းဟောက်တာ၊ စိတ်မချမ်းသာဘူး၊ ဦးဇင်း ဘာမှထပ်မမေးတော့ပဲ ဒီတိုင်းပဲ ပြန်သွားလိုက်တယ်”
ဟု ၎င်းက ဆိုသည်။

No comments: