တောင်ကြီးတိုင်းမ် | သြဂုတ်လ ၁၆၊ ၂၀၁၁ | အင်္ဂါနေ့
နယ်စွန်နယ်ဖြားရှိ ကျေးလက်ဒေသတနေရာ၌၊ တောင်ယာ၊ ခြံ၊ လယ်လုပ်ငန်းများကို အသက်မွေးဝမ်းကျောင်း လုပ်ငန်းအဖြင့် အဓိကလုပ်ကိုင်စားသောက်ကြသည့် တောရွာ နှစ်ရွာရှိ၏။ ၎င်းတောရွာ နှစ်ရွာသည် တောင်ဘက်အရပ်တွင် တည်ရှိသည့် ရွာအား၊ တောင်ရွာဟု အမည်တွင် ပြီး၊ မြောက်ဘက်အရပ်ဒေသတွင် တည်ရှိသည့်ရွာအား မြောက်ရွာဟုခေါ်၏။
ယင်းကျေးလက်တောရွာ နှစ်ရွာမှ ရွာသူရွာသားများအား တစ်ရွာနှင့်တစ်ရွာ အလွန်တရာမှ ခင်မင်ရင်းနှီးကြသလို၊ တစ်ရွာနှင့် တစ်ရွာ အမြဲလိုလိုလည်း သူသာ ကိုယ်သာ၊ သူနိုင် ကိုယ်နိုင် စကားအနိုင် ယှဉ်ပြိုင်ပြောလေ့ရှိသည့် အစဉ်အလာဓလေ့ရှိကြလေ၏။
တနေ့သောအခါဝယ် တောင်ရွာမှရွာသားတစ်ယောက်နှင့် မြောက်ရွာမှရွာသားတစ်ယောက်အား
တောင်ယာလုပ်ငန်းမှအပြန် လမ်းခရီးတနေရာ၌ မမျော်လင့်ပဲ ဆုံတွေ့ကြပြီး၊ သူသာ ကိုယ်သာ သတင်းစကား အနိုင်ပြောကြရာဝယ်…
(တောင်ရွာမှ ရွာသား)။ ။ ဟေ့မိတ်ဆွေ.. ကြုံတုန်း ခင်ဗျားတို့မြောက်ရွာကို အံ့သြစရာ သတင်းလက်ဆောင်တစ်ခု ပါးလိုက်အုံးမယ်။ ကျုပ်တို့တောင်ရွာက စိုက်ပျိုးတဲ့တောင်ယာ၊ ခြံတွေမှာ မြေဆီမြေနှစ်တွေ သိပ်ကောင်းတယ်။ ဓာတ်မြေသြဇာတွေဘာတွေ ထည့်စရာမလိုဘူး။ မြေဘယ်လောက်ကောင်းလဲဆိုတာ ပဲနွယ် (နွယ်လို ပတ်သည့်ပဲမျိုး) ကို စိုက်ပြီးတာနဲ့ ခြံအပြင်ဘက်တောင် မထွက်အားသေးဘူး၊ အပင်ချက်ချင်း ပေါက်ထွက် ကြီးထွားလာပြီးတော့ လူကို ရစ်ပတ်ပြီးတော့ ချက်ချင်းအသီး သီးတော့တာပဲ၊ အဲဒီလိုရှိတယ် ကိုယ့်လူ .. ။
(မြောက်ရွာမှ ရွာသား)။ ။ အော် ဟုတ်လား .. ဒါဆိုရင် ကျုပ်လဲ ကြုံတုန်း ခင်ဗျားတို့တောင်ရွာအတွက် အံ့သြစရာ သတင်းကောင်းတစ်ခု လက်ဆောင်ပါးချင်တယ်။ ကျုပ်တို့ရွာမှာလဲ မြေဆီမြေနှစ် မြေဆွေးတွေ သိပ်ကောင်းတယ်။ ကောက်ညင်း စပါးစိုက်တာ တောင်ယာအပြင်ကနေ လမ်းကြဲပြီးတော့ စိုက်ရတယ်၊ သို့မဟုတ်ရင် စိုက်ပြီးတာနဲ့ စပါးပင်ချက်ချင်းကြီးထွားလာပြီး၊ ထွက်လာတဲ့ ကောက်ညင်းစပါးပင်နဲ့ ကပ်ပြီး၊ လူပါ ကောက်ညင်းထုပ်တောင် ဖြစ်သွားနိုင်တယ်။ အဲဒီကောက်ညင်းဆန်ကို စားတဲ့လူတောင်မှ တကိုယ်လုံး ကောက်ညင်းလိုပဲ ကပ်စိကပ်စိဖြစ်သွားကုန်တယ်။
---------------------------------------
မှတ်ရန်။ ။ ကျေးလက်ဒေသတွင် နေထိုင်သည့် ကာလသား ပအိုဝ်းလူငယ် လူရွယ်များကြား ပျော်ရွှင်စရာ ရယ်မောစရာအဖြစ် ပြောဆိုနေကြသည့် ရိုးရာဟာသများကို နောင်ခမ်းခါ မှ စုစည်း ရေးသား တင်ပြထားပါသည်။
No comments:
Post a Comment