ပအိုဝ်းအရေး တောင်ပေါ်-မြေပြန့်က ပအိုဝ်းလူငယ်များ တွေ့ဆုံဆွေးနွေး

ခွန်ရာဇာ (တောင်ကြီး) | ဒီဇင်ဘာ ၂၁၊ ၂၀၁၃ | တောင်ကြီးတိုင်းမ်

ပအိုဝ်းလူငယ်အဖွဲအစည်းအသီးသီးမှ အချင်းချင်းပူးပေါင်းဆောင်ရွက်မှု အားကောင်းစေရန်နှင့် တောင်ပေါ် မြေပြန့် စည်းလုံးညီညွှတ်မှု ရှိစေရန်ရည်ရွယ်၍ လူငယ်တွေ့ဆုံဆွေးနွေးပွဲတရပ်ကို ဒီဇင်ဘာ ၁၇ ရက် ဂနိုင်ရေးရပ်ကွက်ရှိ တပေါင်းကွင်း ပအိုဝ်းဘက်စုံဖွံ့ဖြိုးရေးကွင်းရှိ ခန်းမတွင် ကျင်းပခဲ့ကြောင်း သိရသည်။

ပအိုဝ်းလူငယ်များသည် အဖွဲ့အသီးသီးဖြင့် ပြန့်ကျဲနေပြီး ပူးပေါင်းလုပ်ဆောင်နိုင်မှု အားနည်းနေကြောင်း။ အမြင်များဖလှယ်နိုင်တဲ့ ဤကဲ့သို့ တွေ့ဆုံမှုပွဲများ ပြုလုပ်ခြင်း အလွန်နည်းပါးကြောင့်း၊ ထို့ကြောင့် ပအိုဝ်းတစ်မျိုးသားလုံး စည်းလုံးညီညွှတ်ရေးကို ရည်ရွယ်ပြီး ယခုလို တွေ့ဆုံပွဲကို များများလုပ်ပေးသင့်ကြောင်း ဆွေးနွေးပွဲ တက်ရောက်သူတစ်ဦးက ဆိုသည်။

ဆွေးနွေးပွဲ၏ သဘောတူညီချက်များမှာ …..

၁။ ပအိုဝ်းအမျိုးသားအတွက် လွတ်လပ်၍ တရားမျှတပြီး မှန်ကန်သောသတင်းမီဒီယာတစ်ခု ပေါပေါက်စေရန်။

၂။ မြန်မာနိုင်ငံ၏ ဒီမိုကရေစီပြုပြင်ပြောင်းလဲရေးမှာ ပအိုဝ်းလူငယ်များက နိုင်ငံရေးကို ပိုမိုသိရှိနားလည်ရန်အ တွက် စွမ်းရည်မြင့်တင်ပေးရန်။

၃။ သဘာဝပတ်ဝန်းကျင်နှင့် သက်ဆိုင်သော လူငယ်တွေ့ဆုံပွဲ တစ်ခု သီးသန့်ပေါ်ပေါက်လာရန်။

၎။ ပအိုဝ်းတစ်မျိုးသားလုံး ပညာရေး၊ ကျန်းမာရေး၊ လူမှုရေးနှင့်ဆိုင်သော တွေ့ဆုံဆွေးနွေးပွဲကို စဉ်ဆက်မပြတ် ပြုလုပ်ပေးနိုင်ရန်။

၅။ ပအိုဝ်းအမျိုးသားနေ့မတိုင်ခင် ပအိုဝ်းလူငယ်ညီလာခံတစ်ခု ကျင်းပပြုလုပ်နိုင်ရန်။

၆။ ၂၀၁၄ ခုနှစ် ပအိုဝ်းအမျိုးသားနေ့မတိုင်ခင် ပအိုဝ်းတစ်မျိုးသားလုံး စည်းလုံးညီညွှတ်ရေး ဆွေးနွေးပွဲ ကျင်းပနိုင်ရန်။

၇။ ပအိုဝ်းတစ်မျိုးသားလုံး ညီလာခံကို၂၀၁၄ တွင် ကျင်းပနိုင်ရန် စသည့်အချက်များ ဖြစ်သည်။

ခမ်းကောင်၊ ခမ်းဒွမ် (တောင်ပေါ်မြေပြန့်) ပအိုဝ်းလူမှုအဖွဲ့စည်းပေါင်း ၁၄ ဖွဲ့ ဖိတ်ကြားထားပြီး၊ အမျိုးသားရေး တက်ကြွလှုပ်ရှားသူများအပါအဝင် တက်ရောက်သူ ပေါင်း ၄၆ ဦးတက်ရောက်ကြောင်း၊ ပအိုဝ်းလူငယ်နှင့်မီဒီယာ၊ လူငယ်နှင့်နိုင်ငံရေး၊ လူငယ်နှင့် အမျိုးသားရေး၊ လူငယ်နှင့် သဘာဝပတ်ဝန်းကျင်၊ လူမှုရေး၊ ပညာရေး၊ ကျန်းမာရေးအကြောင်းများကို အဓိကဆွေးနွေးသွားခဲ့ကြောင်း သိရသည်။

No comments: