ပဒေသရာဇ်ကိုတော်လှန်ခဲ့သော ပအိုဝ်းအမျိူးသားအဖွဲ့ချုပ်(PNO) သည် ပဒေသရာဇ်စနစ်၏ အမွေကိုဆက်ခံနေသလား

အမြင်ဆောင်းပါး | ခွန်ထီးခမ်း နှင့် သထွုံးပေးခွန်
ဇူလိုင် ၂၀ ရက်၊ ၂၀၁၄ ခု | တောင်ကြီးတိုင်းမ်

တော်လှန်ရေးဟုဆိုရာတွင် မနှစ်သက်သော စနစ်တစ်ခုမှ အများလက်ခံသော စနစ်တစ်ခုသို့ ပြောင်းလဲရန်အတွက် လက်နက်အင်အား၊ ပြည်သူအင်အား၊ အတွေးအခေါ်သစ်များဖြင့် စုပေါင်းပြီး မနစ်သက်သော စနစ်ကို အန်တုကာ အမြစ်ဖြုတ်ခြင်းဖြစ်သည်ဟု စာရေးသူက လက်ခံယူဆပါသည်။

သို့ရာတွင် တော်လှန်ရေးပြုလုပ်သူများနှင့် အားပေးထောက်ခံသော ပြည်သူများအသည် ထိုမနစ်သက်သော စနစ်ဖြောင့်ဖျက်ပြီးပါက မည်သည့်နိုင်ငံရေးစနစ်ကျင့်သုံးမည်ကို တော်လှန်းရေးပြုလုပ်သောသူများက ထိုစနစ်ဆိုးကို အစားထိုးရန် ကောင်းမွန်သောစနစ်တစ်ခု ကျင့်သုံးကြမည်ဟု သန္ဒိဌာန်ချမှတ်ကြလိမ့်ဟုလည်း ယုံကြည်ပါသည်။

တိုင်းပြည်ကို အုပ်ချုပ်သော မင်းများသည် ဆိုးသွမ်းသော၊ ဥပဒေချိုးဖောက်သော ပြည်သူများကို သွန်သင်ရန် ပြုပြင်ရန် တာဝန်ရှိသည်။ တိုင်းပြည်ကို အုပ်ချုပ်သူများက ပြည်သူများ ဥစ္စာဓန လုံခြုံရေး၊ လွတ်လပ်စွာ နေထိုင်ရေး၊ လွတ်လပ်စွာ ကူးသန်းရောင်းဝယ်နိုင်ရေးအတွက် အတွက် အာမခံပေးခြင်း ၀န်ဆောင်မှုကို ပေးဆပ်ရမည်ဖြစ်သည်။

သို့သော် စာရေးသူနေထိုင်သော ဆီဆိုင်မြို့နယ်တွင် ရွာသားများ ရိုက်ခံရခြင်း၊ အဖမ်းခံရခြင်း၊ ဆက်ကြေးကောက်ခံမှုကို ပေးရခြင်းများ မကြာခဏ ကြားနေရပါသည်။ ဤနေရာတွင် ဥပဒေချိုးဖောက်သောကြောင့် အဖမ်းခံ၊ အရိုက်ခံရခြင်းမျိုးကို ကျနော်မဆိုလိုတော့ပေ။

ဒီနှစ်လွန်ခဲ့သော ဇွန်လ (၂၈) ရက်တွင် PNO မှတော်လှန်ရေးကာလကတည်းက အုပ်ချုပ်ရေး ယန္တယားပုံစံ အွိုင်တောရခေါ်( လွယ်ပွတ်ကျေးရွာအုပ်စု) မှ အုပ်စုမှူး ဦးခွန်အောင်သိန်းက ဦးဆောင်ပြီး PNA စစ်သားများဖြစ်ကြသည့် ခွန်မောင်ကံ၊ ခွန်မောင်ဒ၊ ခွန်မောင်ခင် နှင့် ခွန်မောင်လွင်တို့က အပြစ်ကင်းမဲ့သော ဖာလိုင်အပေါ်ရွာမှ ခွန်မောင်ဖြစ် နှင့် ဖြီးဟန်းခါးရွာမှ ခွန်မောင်ပြားတို့ကို ဖမ်းချုပ်ချည်နှောင်ပြီး လူမဆန်စွာရိုက်နက် ညင်းဆဲခဲ့ကြသည်။

”ကျနော်တို့ကို စစ်ဆေးတယ် ကျနော်တို့က မခိုးရဘူးလို့ ပြောလည်းမရဘူး၊ တောင်းပန်လည်းမရဘူး ဘာမှပြန်မပြောနဲ့ဆိုပြီး ရှားဆူးကိုင်းများနဲ့ ၀ါးလုံးတွေ ကြေတဲ့ ငါတို့ကို ရိုက်တယ်။ ပြီးတော့ ငါတို့နှစ်ယောက်လုံးကို လျှပ်စစ်မီးနဲ့ တစ်ယောက်လေးချက် ရှောပ့်ရိုက်တယ်” ဟု အရိုက်ခံရသူ နှစ်ဦးက ပြောသည်။

ဖြစ်စဉ်တွင် လွန်ခဲ့သော ဇွန်လ ၁၈ ရက်နေ့တွင် လွယ်ပွတ်ကျေးရွာအုပ်စု၊ မီးရဲ့ကျေးရွာနေ ခွန်ထွန်းသစ်က တောရကျေးရွာမှ ခိုးယူထားသော ကျွဲတစ်ကောင်ကို ဆီဆိုင်ကျွဲနွားဈေးတွင် သွားရောင်းရန်အတွက် လမ်းခုလတ်ရှိ ဖာလိုင်ကျေးရွာနေ ခွန်မောင်ဖြစ်၏ နေအိမ်တွင် နံနက်စာဝင်စားခဲ့သည်။ ကျွဲနွားဈေးတန်းတွင်လည်း ပွဲစားများက ခွန်ထွန်းသစ်ကို မသင်္ကာသောကြောင့် ကျွဲရောင်းခွင့်လက်မှတ် မထုတ်ပေးခဲ့ပါ။ ထိုကျွဲနွားဈေးတွင် ဖြီဟန်းခါးရွာမှ ခွန်မောင်ပျာက ခွန်ထွန်းသစ်နှင့် ကျွဲအရောင်းအ၀ယ်ကိစ္စ စကားပြောဖြစ်ခဲ့သည်။

”ကျွဲဘယ်လောက်ဈေးနဲ့ ရောင်းမလဲလို့ ကျနော်မေးလိုက်တော့ သုံးသိန်းခွဲလို့ သူကပြောတယ်။ ဒါပေမဲ့ ကျနော်ထင်တာ ငါးသိန်းလောက်တန်တဲ့ ကျွဲကို အဲလောက်ရောင်းတေ့ာ မ၀ယ်ရဲလို့ ပိုင်ရှင်ထံမှ အရောင်းအ၀ယ်လုပ်မယ်။ ပြီးတော့ နင်က သုံးသိန်းခွဲတောင်းတာ ငါမင်းကို လေးသိန်းပေးမယ် ပိုင်ရှင်နဲ့ အရောင်းဝယ်လုပ်မယ် နင်က ငါးသောင်းယူပေါ့”

ခွန်ထွန်းသစ်သည် ကျွဲအရောင်းအ၀ယ် မဖြစ်သောကြောင့် ကျွဲကို ပြန်လည်ဆွဲပြန်ရာတွင် တောရရွာမှ ကျွဲပိုင်ရှင်က လိုက်လံစုံစမ်းရာ ထီဟန်ထွိုန်းရွာနား အရောက်တွင် ကျွဲခိုးသူ ခွန်ထွန်းသစ်အား လက်ပူးလက်ကြပ် ပြန်လည်ဖမ်းမိခဲ့သည်။ ကျွဲပိုင်ရှင်က ခွန်ထွန်းသစ်ကို အမှုဖွင့်တိုင်းတန်းအရေးယူမှု မပြုလုပ်ပဲ ကျွဲကိုသာပြန်ယူပြီး အိမ်ကိုပြန်ခဲ့သည်။

သို့သော် တောရအုပ်စုမှူး( PNO မှ) ဦးခွန်အောင်သိန်းက ကျွဲခိုးသူကို အရေးမယူပဲ ကျွဲခိုးသူမဟုတ်သော ခွန်မောင်ဖြစ် နှင့် ခွန်မောင်ပျာကို ဖမ်းချုပ်ပြီး ရိုက်နက်ညင်းဆဲခဲ့သည်။ ရ်ိုက်နက်ပြီး လွယ်ပွတ်ကျေးရွာရှိ အိမ်တစ်အိမ်တွင် ဆီဆိုင်မြို့နယ် PNO ပါတီအတွင်းရေးမှူး ဆရာဖျော်ဦးဆောင်သော အဖွဲ့သည် ကျွဲခိုးသူမဟုတ်သော ရွာသားနှစ်ဦးကုို ငွေကျပ်ငါးသိန်း ပေးလျော်ရန် ဆုံးဖြတ်ချက်ချမှတ်ခဲ့သည်။

”ငါတို့တောင်းပန်တော့ သုံးသိန်းနဲ့ ဆယ်ရက်အတွင်းပေးမယ်လို့ သဘောတူခဲ့ရတယ်” ဟု ဖြီးဟန်းခါး ရွာသူကြီးကို ပြောသည်။

မရှိဆင်းရဲ ကျွဲခိုးသူထံတွင် ငွေညစ်စားတောင်းယူရန် မဖြစ်နိုင်သောကြောင့် ပြစ်မှုတရားခံဖြစ်သော်လည်း ဆရာဖျော်တို့က အပြစ်မယူသည့်အပြင် လစ်လျူရှူခဲ့သည်။ စွပ်စွဲခံရသူ နှစ်ဦးသည် ထိုက်သင့်သော ငွေ ဥစ္စာရရှိနိုင်သောကြောင့် ဖမ်းဆီးချုပ်နှောင် ညင်းဆဲပြီးခြင်း ဖြစ်သည်။

တိုင်းပြည်အုပ်ချုပ်သော သူများသည် ပြည်သူများပိုင်ဆိုင်သော ဥစ္စာဓါနများကို ထိန်းသိန်းရန်၊ လွတ်လပ်စွာ သွားလာ နေထိုင်နိုင်ရန် စိတ်စေတနာ အမှန်တကယ်ရှိပါက အဘယ်ကြောင့် ပြဿနာများကို ထိထိရောက်ရောက်မကိုင်တွယ်ပဲ ပအိုဝ်းအချင်းချင်း နှိပ်စက်အမြတ်ထုတ်နေတာလဲ။

ဤပြဿနာမျိုးသည် ဆီဆိုင်မြို့နယ်သာမှာက အခြားပအိုဝ်းဒေသများတွင်လည်း အုပ်ချုပ်သူများက ပြည်သူများ၏ အကျိူးတော်ဆောင်သူ၊ အနစ်နာခံသူ ခေါင်းဆောင်ဟု ဆိုင်းပုဒ်သတ်ပြီး ဒေသပြဿနာများ ဖြေရှင်းရာတွင် ကိုယ်ကျိူးရှာ အမြတ်ထုတ် အာဏာအလွဲသုံးစားမှုများ ပြုလုပ်လျှက်ရှိသည်။

သက်ဆိုင်ရာ အထက်တာဝန်ရှိ ပုဂ္ဂိုလ်များက သိရှိမှု မရှိတာလား၊ သိလျှက်သားနှင့် လစ်လျူရှုပြီး အောက်ငယ်သားများကို မအုပ်ချုပ်နိုင်တာလား၊ ချက်စားတာမနူးလို့ ပေါင်းစားတာလား စသည့်လားများစွာ စာရေးသူက ပအိုဝ်းပြည်သူတစ်ဦး၏ ခံစားချက်ကို စိတ်စေတနာအမှန်ဖြင့် တင်ပြအပ်ပါသည်။

ထို့ကြောင့် PNO သည် ပဒေသရာဇ်စနစ်ကို တော်လှန်ခဲ့ပြီး ပဒေသရာဇ်စနစ် ကျင့်သုံးနေတာလား။ ဒါမှမဟုတ် ပဒေသရာဇ်စနစ်ကို တော်လှန်ရင်းနဲ့ ထိုစနစ်ကို နှစ်သက်လက်ခံ ကျင့်သုံးနေတာလား။

စာရေးသူ အနေဖြင့် ပအိုဝ်းခေါင်းဆောင်းတိုင်း တာဝန်ရှိအုပ်ချုပ်သူတိုင်း အာဏာအလွဲသုံးစားခြင်းပြုလုပ်သည်ဟု မဆိုလိုပါ။



No comments: