၈၈ မျိုးဆက်ငြိမ်းချမ်းရေးနှင့်ပွင့်လင်းလူ့အဖွဲ့အစည်း(ရှမ်းပြည်) ဦးဆောင်ပြီး မြေယာဥပဒေဆွေးနွေးပွဲနှင့် တောင်သူလယ်သမားများ တွေ့ဆုံနှီးနှောဖလှယ်ပွဲကို တောင်ကြီးမြို့ ရှမ်းစာပေနှင့်ယဉ်ကျေးမှုခန်းမ၌ စက်တင်ဘာ ၃၀ ရက်နေ့တွင် ရှမ်းပြည်တောင်ပိုင်းအတွင်းရှိ ဒေသအသီးသီးမှ မြေယာအသိမ်းခံရသောပြည်သူများ၊ အရပ်ဘက်လူ့အဖွဲ့အစည်းနှင့် နိုင်ငံရေးပါတီအချို့ တက်ရောက်ကြောင်း သိရသည်။
“မြန်မာနိုင်ငံမှာ အခြေခံကျဆုံးနှင့် အများဆုံးဖြစ်တဲ့ လူဦးရေ ၇၀ ရာခိုင်နှုန်းရှိသော တောင်သူလယ်သမားများ ဘဝမြင့်တင်ရေးဟာ အဓိကပြဿနာဖြစ်တယ်။ မြေယာပြဿနာဖြေရှင်းပေးနိုင်ရင် လူကုန်ကူးမှုပြဿနာလည်းနည်းပါးသွားမှာဖြစ်ပါတယ်။ ၁၃၊ ၈၊ ၁၃ ရက်မှာ မုံရွာမြို့ပေါ် တောင်သူလယ်သမားရေးရာကိစ္စတွေ လက်ပံတောင်းတောင် မြေသိမ်းရာကိစ္စကို တက်ကြွစွာ ပါဝင်ဆောင်ရွက်းပေးသူ ပြည်သူ့အကြိုးဆောင်ကွန်ယက်မှ ဒေါ်နော်အုန်းလှအား လည်းကောင်း၊ ၁၈၊ ၉၊ ၁၃ ရက်နေ့တွင် မန္တလေးမြို့ တောင်သူလယ်သမားအကြိုးကူညီသော မိတ္ထီလာ ပြည်သူ့အကြိုးဆောင်ကွန်ယက်မှ ဒေါ်မြင့်မြင့်အေးကလည်းကောင်း၊ ခြွင်းချက်မရှိလွတ်ပေးရန်၊ တောင်သူလယ်သမားများနှင့် အထွေထွေပြဿနာကို တက်တက်ကြွကြွ ဝိုင်းဝန်းလုပ်ရှား အဖြေရှာသူကို ပုဒ်မ ၁၈၊ ပုဒ်မ ၅၀၅ (ခ) စတဲ့ ဥပဒေထုတ်ပြီး ဝရမ်းထုတ်ဖမ်းဆီးထောင်ချခြင်းကို ရပ်ဆိုင်းပေးပါ” ဟု ၈၈ မျိုးဆက်ငြိမ်းချမ်းရေးနှင့် ပွင့်လင်းလူ့အဖွဲ့အစည်း (ရှမ်းပြည်) ဥက္ကဌ ကိုအောင်ဇေက ပြောခဲ့သည်။
“ကျွန်တော်တို့ အသိမ်းခံရမြေယာများကို ပြန်ရနိုင်ဖို့နှင့် ပြန်လည်တောင်းဆိုဖို့၊ မြေယာဥပဒေကို သိရှိလိုခြင်းဖြင့် ဒီအခန်းအနားကို တက်လာရခြင်းဖြစ်တယ်” ဟု ဟိုပုံးမြို့နယ် ဘုရားဖြူရွာနေ လယ်သမားတစ်ဦးဖြစ်သူ ဦးခွန်စိန် က ပြောသည်။
“ကျွန်တော်တို့မြေယာဟာ ငြိမ်းချမ်းရေးအဖွဲ့မှ သိမ်းယူတာဖြစ်တယ်။ ယခု တပ်မတော်မှ သိမ်းထားတဲ့ မြေယာကို ပြန်လည်ပေးနေပြီ ဖြစ်သောကြောင့် ကျွန်တော်တို့ မြေယာလည်း ပြန်လည်ရလိုခြင်းက အဓိကဖြစ်တယ်။ ဒါကြောင့် နည်းလမ်းများကို ရှာပြီးတောင်းဆိုသွားမှာဖြစ်တယ်” ဟု နောင်ကားရွာမှ လယ်သမားဖြစ်တစ်ဦးသည့် ဦးလုပ်က ပြောသည်။
၈၈ မျိုးဆက် (ငြိမ်းချမ်းရေးနှင့်ပွင့်လင်းလူ့အဖွဲ့အစည်း) လယ်ယာစီးပွားနှင့် တောင်သူလယ်သမားရေး ရာကော်မတီမှ လယ်သမားအသံဟု ဆွေးနွေးပွဲမှ စုစည်းရရှိသော လယ်ယာမြေဆိုင်ရာကိစ္စရပ်နှင့် တောင်သူလယ်သမားများ သဘောထားအမြင်ကို အချက် ၁၇ ချက် ထုတ်ပြန်ကြေငြာခဲ့ပါသည်။
၎င်းတို့မှာ
(၁) လွတ်လပ်သော တောင်သူလယ်သမားသမဂ္ဂများ တရားဝင်ရပ်တည်လှုပ်ရှားခွင့် ရှိရန်။
(၂) တောင်သူလယ်သမားအခွင့်အရေးအတွက် လှုပ်ရှားဆောင်ရွက်နေသော တောင်သူလယ်သမားများနှင့် တောင်သူလယ်သမားအရေး ဆောင်ရွက်သူများကို ပုဒ်မအမျိုးမျိုးတပ်ကာ ဖမ်းဆီးချုပ်နှောင်ခြင်း၊ တရားစွဲဆိုခြင်းများအား ရုပ်သိမ်းပေးရန်။
(၃) စုံစမ်းစစ်ဆေးရာတွင် တရားခံစစ်မစစ်ဘဲ ဘက်လိုက်မှုကင်းသော စုံစမ်းစစ်ဆေးမှုများကို စနစ်တကျပြုလုပ် ဆောင်ရွက်ရန်။
(၄) အာဏာနှင့် ငွေရှိလျှင် အလွယ်တကူရယူနိုင်သော လန (၃၉) မြေငှားဂရန်များကိုပြ၍ တရားဥပဒေနှင့် ညီညွတ်ဟန်ဆောင်ပြီး မြေယာမှ နှင်ထုတ်နေခြင်းများသည် ဥပဒေပြင်ပလုပ်ရပ်များဖြစ်သဖြင့် ပြန်လည်စိစစ်ပြီး ပါဝင်ပတ်သက်သူများအား အရေးသူဆောင်ရွက်ရန်။
(၅) မြေယာများ ပြန်လည်ပေးအပ်ရာတွင်ဖြစ်စေ၊ လျော်ကြေးနှင့်နှစ်နာကြေးများ ပေးအပ်ရာတွင်ဖြစ်စေ၊ မြေယာနှင့် သက်ဆိုင်သူများကို တိုက်ရိက်ပေးအပ်ရန် အုပ်ချုပ်ရေးပိုင်းမှတစ်ဆင့်ခံ ပေးအပ်ခြင်းများ မပြုရန်။
(၆) မြေလျော်ကြေးနှင့် နစ်နာကြေး ဟူသော စကားရပ်အစား ကရုဏာကြေးဟု သုံးနှုန်းမှုများအား လုံးဝရပ်ဆိုင်းရန်။
(၇) သိမ်းဆည်းခံရသော မြေယာများမှ နေအိမ်များကိုဖယ်ရှားမည်ဆိုလျှင်-
- အဓမ္မအင်အားသုံး ဝင်ရောက်ဖျက်ဆီးခြင်းများ၊ ပြောင်းရွှေ့စေခြင်းများ လုံးဝမပြုလုပ်ရန်၊
- အိုးအိမ်များ စနစ်တကျပြန်လည်ထူထောင်ပေးရန်၊
- လူမှုရေး၊ ကျန်းမာရေး၊ ပညာရေးစသည်တို့အတွက် စနစ်တကျစီစဉ်ပေးရန်။
(၈) စီမံကိန်းများနှင့်ပတ်သက်၍ သက်ဆိုင်ရာဒေသခံပြည်သူများကို ပွင့်လင်းမြင်သာစွာ ညှိနိုင်းဆောင်ရွက်ပြီး နိုင်ငံတကာစံချိန်စံနှုန်းများနှင့်အညီ အကောင်အထည်ဖော်ရန်။
(၉) စီမံကိန်းများအတွက် မူလဆောက်လုပ်ထားသော အဆောက်အဦးများ၊ စက်ရုံများ၊ ဆောက်လုပ်ထားသည့် ဧရိယယာများမှအပ ပိုလျှံသောမြေများအားလုံးကို ပြန်လည်ပေးအပ်ရန်၊ သိမ်းထားသောမြေများအတွက် လျော်ကြေး ပေးရာတွင် အများလက်ခံနိုင်သော စံချိန်စံနှုန်းများနှင့်အညီ ပွင့်လင်းမြင်သာစွာ ဆွေးနွေးညှိနိုင်း ပေးအပ်ရန်။
(၁၀) လက်ရှိရပ်ကွက်/ကျေးရွာအုပ်ချုပ်ရေးမှူးကို ဗဟိုပြုသော လယ်ယာမြေစီမံခန့်ခွဲမှုအဖွဲ့သည် အဂတိလိုက်စားမှုနှင့် ကိုယ်ကျိုးရှာမှုများ ဖြစ်ပေါ်စေသဖြင့် တောင်သူလယ်သမားကိုယ်စားလှယ် အစစ်အမှန်များ ပါဝင်သည့် အရည်အချင်းပြည့်မီသော စီမံခန့်ခွဲမှုအဖွဲ့သစ်တစ်ခု အစားထိုးဖွဲ့စည်းပေးရန်။
(၁၁) ဘဏ်ချေးငွေ အပြည့်အဝ မရခြင်း၊ အမည်ပြောင်းထုတ်ခြင်း စသည့် အဂတိလိုက်စားမှုများရှိနေသည့်အတွက် ဘဏ်ချေးငွေအချိန်မီ အပြည့်အဝရရှိရေးနှင့် ခြစားမှုများ ပပျောက်ရေးအတွက် လျှင်မြန်ထိရောက်စွာ အရေးယူဆောင်ရွက်ပေးရန်။
(၁၂) မြေလွတ် မြေရိုင်းများအား စိစစ်၍ မြေယာမဲ့ ကျေးလက်နေပြည်သူများအား ဦးစားပေး လုပ်ကိုင်ခွင့် ပြုရန်။
(၁၃) ၂၀၁၂ ခုနှစ် မြေယာဥပဒေနှင့် မြေလွတ်၊ မြေလပ်နှင့် မေရိုင်းများ စီမံခန့်ခွဲရေးဥပဒေများကို တောင်သူလယ်သမားများ၏ အကျိုးစီးပွားနှင့်အညီ အသစ်ပြန်လည်ရေးဆွဲရန်။
(၁၄) မည်သည့်ဥပဒေ ရေးဆွဲသည်ဖြစ်စေ တောင်သူလယ်သမား ဟူသော စကားရပ်၏ အဓိပ္ပာယ်ဖွင့်ဆိုချက်ကို တောင်သူလယ်သမားများ လက်ခံနိုင်သည့် အဓိပ္ပာယ်ဖွင့်ဆိုချက်ဖြင့် အတိအကျဖွင့်ဆိုပေးရန်။
(၁၅) နှစ်တို၊ နှစ်ရှည် စိုက်ပျိုးစရိတ် ချေးငွေများ ထုတ်ချေးပေးရန်နှင့် စိုက်ပျိုးချိန်အမီ လယ်သမားများ လက်ဝယ်သို့ ရောက်ရှိစေရန်။
(၁၆) ဆည်မြောင်း ရေကာတာ ရေတံခါးများကို စနစ်တကျပြုလုပ်ပေးရန်နှင့် ဆည်ရေ၊ မြစ်ရေကို အမှီပြု၍ စိုက်ပျိုးရသော လယ်မြေများအတွက် လိုအပ်သောရေကို အချိန်မီနှင့် အလုံအလောက် ရရှိစေရန်။
(၁၇) တောင်တန်းဒေသများတွင် တိုင်းရင်းသားဓလေ့ထုံးတမ်းဥပဒေများကို လေးစားလိုက်နာရန်။ စသည့် တောင်သူလယ်သမားများ အမှန်တကယ်ခံစားရသော အချက်များထွက်ပေါ်လာပြီး ဤအချက်များကို ဖြေရှင်းပေးရန်လိုအပ်ကြောင်း ထုတ်ပြန်ချက်အရ သိရသည်။
No comments:
Post a Comment