ကျော်ထင် (ထိုင်း) / ၆ ဇူလိုင် ၂၀၀၇
မကြာသေးမီက ရှမ်းပြည်နယ်၊ မောက်မယ်မြို့နယ်အတွင်း ပအိုဝ်းလူမျိုးများကို ရှမ်းပြည်တပ်မတော်-တောင်ပိုင်း (SSA-S) မှ အတင်းအကျပ် စစ်သားစုဆောင်းသည့်သတင်း ထွက်ပေါ်လာမှုအပေါ် SSA-S ပြောရေးဆိုခွင့်ရှိသူက စစ်ရေးတည်ဆောက်ရန်လိုအပ်နေချိန်တွင် စစ်မှုထမ်းခြင်းသည် မွေးရာပါတာဝန်ကို ထမ်းဆောင်ခြင်းဖြစ်သည်ဟု ပြောဆိုသည်။
SSA-S ပြောရေးဆိုခွင့်ရှိသူ ဗိုလ်မှူးလောင်ဝ်ဆိုင်းက “ကိုယ့်တိုင်းပြည်ကိုယ့်လူမျိုး အေးချမ်း သာယာရေးအတွက် လူငယ်တွေအားလုံးမှာ တာဝန်ရှိပါတယ်။ တိုင်းပြည်တိုင်းအားလုံးလည်း ဒီလိုပဲတည်ဆောက်ကြတာပါ။ ထူးဆန်းတဲ့ကိစ္စမဟုတ်သလို အမြင်မမှားဖို့လည်းလိုပါတယ်” ဟု ပြောသည်။
ရှမ်းပြည်တပ်မတော်တွင် အသက် (၁၈) နှစ်နှင့် (၄၅) နှစ်အကြား ရှမ်းပြည်သား လူမျိုးမရွေး ဘာသာမရွေး အနည်းဆုံး (၅) နှစ် စစ်မှုထမ်းရန် မူဝါဒချမှတ်ထားသည်။
၂၀၀၇ ခု ဧပြီ (၂၃) တွင် မောက်မယ်မြို့နယ်၊ နဟီးရွာမှ ရွာသား (၂၁) ဦးကို SSA-S မှ အတင်း အကျပ် စစ်သားသစ်စုဆောင်းရန် ဖမ်းဆီးသွားခဲ့ရာ ပြန်လည်ထွက်ပြေးလွတ်မြောက်လာ
ခဲ့ကြသည်။
အမည်မဖော်လိုသည့် ဒေသခံတဦးက “ရွာသား (၂၁) ယောက်ပါသွားတယ်။ ဆမ်ခေးဦးစီးတာပေါ့။ လာမဖမ်းခင်မှာ စာနဲ့ပေးပြီး တောင်းခံတယ်။ အဲဒါ မပေးလို့ဆိုပြီး သူတို့ကိုယ်တိုင်လာဖမ်းတာ။
(၁) ယောက်ကတော့ လမ်းမှာတင်ထွက်ပြေးလာခဲ့ပြီး ကျန်တဲ့သူတွေကတော့ သံလွင်မြစ် မကူး ခင်ထွက်ပြေးလာကြတာ။ အသက် (၁၇) နှစ် တယောက်ပါတယ်။ ကျန်တာတွေကတော့
(၂၀) ကျော် (၃၀) ၀န်းကျင်တွေပေါ့” ဟု ပြောသည်။
အဆိုပါနယ်မြေသည် အပစ်အခတ်ရပ်စဲထားသော ပအိုဝ်းအမျိုးသားတပ်မတော်နှင့် မကြာသေးခင်က ပြန်လည်တောခိုလာသော ရှမ်းပြည်လူမျိုးပေါင်းစုံလွတ်မြောက်ရေးအဖွဲ့ (ရလလဖ) ခွဲထွက် အဖွဲ့တို့၏ ထိန်းချုပ်နယ်မြေများဖြစ်သည်။
ဒေသခံများမှာ SSA-S တပ်ဖွဲ့များ ပြန်လည်ဖမ်းဆီးမည်ကို ထိတ်လန့်ကာ ရွာမှတိမ်းရှောင်နေကြ သဖြင့် စားဝတ်နေရေးပြဿနာများနှင့် ကြုံတွေ့နေရသည်။
SSA-S ၏ လွယ်တိုင်းလဲန်းဌာနချုပ်စတင်ထူထောင်ခဲ့သော ၂၀၀၀ ပြည့်နှစ်မှစ၍ တပ်သားသစ် သင်တန်းကို တနှစ်လျှင် အနည်းဆုံး (၂) ကြိမ်နှင့် (၃) ကြိမ်ခန့် ပြုလုပ်လာခဲ့ပြီး အပတ်စဉ်
တခုလျှင် အနည်းဆုံး (၆၀) မှ အများဆုံး (၃၀၀) ကျော်အထိ စစ်သင်တန်းတက်ရောက်လျက် ရှိသည်။
“မပြေလည်သေးတဲ့ နိုင်ငံရေးပြဿနာတွေကို နိုင်ငံရေးနည်းလမ်းနဲ့ ဖြေရှင်းချင်ပေမယ့်လည်း အုပ်ချုပ်နေကြတဲ့ စစ်အစိုးရအဆက်ဆက်က ဖြေရှင်းခွင့်မပေးပါဘူး။ တောင်းဆိုတဲ့အခွင့်အရေး တွေကိုလည်း မပေးပါဘူး။ ဒီတော့ လက်နက်ကိုင်လမ်းစဉ်ကို စွန့်လွှတ်လို့မရသေးပါဘူး။ အင်အားတောင့်တင်းတဲ့ တပ်မတော်တခု တည်ရှိဖို့လိုတဲ့အတွက် စစ်သားသစ်တွေ စုဆောင်းနေ ခြင်းပဲဖြစ်ပါတယ်” ဟု SSA-S ပြောရေးဆိုခွင့်ရှိသူက ပြောသည်။
ရှမ်းပြည်တပ်မတော် အင်အားနှင့်ပတ်သက်၍ (၁) သောင်းကျော်ခန့်ရှိကြောင်း SSA-S
ခေါင်းဆောင် ဗိုလ်မှူးကြီးရွက်ဆစ်က မီဒီယာများအား ပြောခဲ့သည်။ ။
No comments:
Post a Comment