ပအိုဝ်းကိုယ်ပိုင်အုပ်ချုပ်ခွင့်ရဒေသ မရခင်နှင့် ရပြီးနောက်ပိုင်းထိ ပအိုဝ်းနေထိုင်ရာ ဒေသဟာ အရင်အတိုင်းပါဘဲ။ ပအိုဝ်းပြည်သူတွေရဲ့ဘ၀ဟာလည်း ဒီတိုင်းတိုင်းပါဘဲ။ ဘာမှ ထွေထွေထူးထူးတော့ ပြောင်းလဲလာတာ မရှိပါဘူး။ ပအိုဝ်းပြည်သူတွေ ယခင်အတိုင်း လမ်းပန်းဆက်သွယ်ရေး ခက်ခဲလွန်းတဲ့ မိရိုးဖလာ ခြံအလုပ်နှင့် ရိုးရာသနက်ဖက်လုပ်ငန်းကို ကိုယ်ထူကိုယ်ထ လုပ်ကိုင်စားသောက်နေရ တုန်းပါပဲ။
အချို့ဆိုရင် မိရိုးဖလာ လယ်မြေ၊ ခြံမြေတွေကို အာဏာရှိသူ လူတစ်စုက လာရောက် သိမ်းဆည်းတာတွေ ခံနေရတုန်းပါပဲ။ ပြည်သူတွေရဲ့ အခြေခံလိုအပ်ချက်တွေဖြစ်တဲ့ ကျေးရွာစာသင်ကျောင်းတွေ၊ ဆေးခန်းတွေ၊ ရေနှင့် လျှပ်စစ်မီးတွေ ပအိုဝ်းဒေသမှာ အလုံအလောက် မရရှိသေးပါဘူး။ ဖွံ့ဖြိုးတိုးတက်မှု နောက်မှာ ကျန်ရစ်နေတုန်းပါဘဲ။ နယ်မြေဒေသအနေအထားအရ အခြားတိုင်းရင်းသားဒေသကဲ့သို့ နယ်စပ်အစွန်းဘက် မကျပေမယ့် အခြားတိုင်းရင်းသားဒေသနှင့် နှိုင်းယှဉ်ရင် ပအိုဝ်းဒေသ ဖွံ့ဖြိုးတိုးတက်မှု နောက်ကျကျန်နေတုန်း။ လမ်းပန်းဆက်သွယ်ရေး ခက်ခဲနေတုန်း။ အချို့နေရာတွေဆို လူသူအရောက်ပေါက်နည်းမှု ရှိနေတုန်းပါဘဲ။
သို့ပေမယ့် ဖတ်လိုက်၊ ကြားလိုက်ရတဲ့ လူကြီးတွေဆီက စာအုပ်တွေ၊ ဂျာနယ် အထူးထုတ်တွေ၊ ၀တ်ဆိုဒ်တွေ၊ သတင်းတွေမှာဆို ပအိုဝ်းဒေသက အရင်ကထက် အဆပေါင်းများစွာ တိုးတက်လာနေပြီးလို့ ဂုဏ်ယူစွာဖြင့် မှတ်တမ်းတင်ထားတဲ့ ဗွီဒီယိုတွေ၊ ဓါတ်ပုံတွေကို တွေ့နေရပါတယ်။
အခြားတိုင်းရင်းသားနယ်တွေလို သေနတ်သံတွေ၊ ဗုံးသံတွေ ကျယ်ကျယ်လောင်လောင် မကြားရတော့ပေမယ့် လည်း ပအိုဝ်းဒေသမှာ တိတ်တဆိတ် လူ့အခွင့်အရေး ချိုးဖောက်ခံရမှုတွေ၊ မြေယာသိမ်းဆည်ခံရတာတွေ၊ မတရားချိန်းခြောက်ခံရတာတွေကို မကြာခဏကြားရ၊ ဝေဖန်ပြောကြတာ တွေ့ရလေ့ရှိပါတယ်။ အချို့ဆို ခေတ်သစ်၊ စနစ်သစ်တွေပြောင်းသွားပေမယ့်လည်း အရင်တုန်းက လူကြီးတွေရဲ့ အကျင့်တွေက မပြောင်းလဲနိုင်သေးဘူးတဲ့။ ဒါကလည်း နှစ် ၅၀ကြာ အာဏာရှင်စနစ်က အမွေပေးလိုက်တဲ့ အကျင့်တွေက မြန်မာ့လူမှု့ပတ်ဝန်းကျင်မှာ အရိုးစွဲ နေပြီးလေ။ ပအိုဝ်းဒေသ အပါအ၀င်ပေါ့။
အစိုးရက သတ်မှတ်ပေးထားတဲ့ ၂၀၀၈ ဖွဲ့စည်းပုံအခြေခံဥပဒေပါ ပအိုဝ်းကိုယ်ပိုင် အုပ်ချုပ်ခွင့်ရဒေသကလည်း အမည်ခံဒေသ တခုသာသာပါပဲ။ စစ်မှန်တဲ့ ကိုယ်ပိုင်ပြဌာန်းခွင့်ရပြည်နယ် နဲ့ ကိုယ်ပိုင်အုပ်ချုပ်ခွင့်ဒေသ စစ်စစ် မြန်မာပြည်မှာ ယနေ့အချိန်ထိ မရှိသေးပါဘူး။ မကျင့်သုံးနိုင်သေးပါဘူး။ အားလုံးဟာ ယခင်လူများစု အစိုးရ အကြိုက် အတုအယောင် နာမည်ခံ တိုင်းရင်းသားပြည်နယ်တွေ၊ ဒေသတွေပါဘဲ။ ဘာနိုင်ငံရေး အခွင့်အရေး၊ တကယ့်အစစ်အမှန် ကိုယ်ပိုင်ပြဌာန်းခွင့် အခွင့်အရေး မရှိသေးပါဘူး။ ဒီအတွက်လည်း တိုင်းရင်းသား လူမျိုးစုတွေ လက်နက်ကိုင်တော်လှန်ရေး ဆင်နွှဲနေတုန်းပါဘဲ။
သို့ပေမယ့် ၂၀၀၈ ဖွဲ့စည်းအုပ်ချုပ်ပုံအခြေခံဥပဒေက ပြဌာန်းပေးလိုက်တဲ့ ပအိုဝ်းကိုယ်ပိုင်အုပ်ချုပ်ခွင့်ရဒေသ ဖြစ်လာတဲ့အတွက် တချို့ ပအိုဝ်းလူကြီးတွေ၊ အခြားပအိုဝ်းတွေ ၀န်းပမ်းတသာနဲ့ လှုပ်လှုပ်ရှားရှား ဖြစ်ခဲ့ကြပါ တယ်။ အဲဒါက ပအိုဝ်းကိုယ်ပိုင်အုပ်ချုပ်ခွင့်ရဒေသ -မြို့နယ်သုံးခု-- ဆီဆိုင်၊ ပင်လောင်း၊ ဟိုပုံးနယ်ကို ပအိုဝ်း အမည်ခံပြီး ပေါ်ပေါက်လာတဲ့အတွက်ပါပဲ။ ဒီအတွက်လည်း ကျေးဇူး တင်သံတွေ၊ ထောပနာပြုသံတွေ လူကြီး တွေအချင်းချင်းဆီမှ မကြားချင်မှ အဆုံးပါ။
အချို့လူကြီးတွေဆိုရင် ပအိုဝ်းကိုယ်ပိုင်အုပ်ချုပ်ခွင့်ဒေသကို ရရှိလာအောင် စွမ်းစွမ်းတမံ လုပ်ဆောင်တိုက်ပွဲဝင်ခဲ့တဲ့ ယနေ့ခေတ် ပအိုဝ်းလူကြီးတွေတဲ့။ ဘယ်ပအိုဝ်းတော် လှန်ရေးခေတ်တွေမှာ ပအိုဝ်းတွေအတွက် ဘယ်ခေါင်းဆောင်၊ ဘယ်ခေတ်ကမှ မလုပ်ဆောင်ပေးနိုင်တဲ့ လုပ်ဆောင်မှုမျိုးကို ယနေ့လူကြီးတွေ လုပ်ဆောင်ပေးနိုင်ခဲ့တဲ့ အတွက်တဲ့ ယနေ့အချိန်ထိ ဂုဏ်ယူထောပနာပြုနေတုန်း၊ ချီးမွမ်းနေတုန်းပါဘဲ။
ဒီအမည်ခံ အတုအယောင် ပအိုဝ်းကိုယ်ပိုင်အုပ်ချုပ်ခွင့်ရဒေသ အခွင့်အရေးနဲ့သာ ပအိုဝ်းတွေ ဂုဏ်ယူနေရ၊ ကျေနှပ်နှစ်သိမ့်နေရတော့မယ်ဆိုရင် အနာဂတ် ပအိုဝ်းတွေရဲ့ နိုင်ငံရေး ဦးတည်ချက်၊ နိုင်ငံရေး ခံယူချက် ဘယ်လို ပေါ်ပေါက်လာနိုင်မလဲဆိုတာ စဉ်းစားရင် ရင်လေးမိပါတယ်။
သိစေရန် - ဤဆောင်းပါးအား ခွန်နီပအိုဝ်း စာမျက်နှာမှ ပြန်လည်ဖေါ်ပြလိုက်ခြင်းဖြစ်သည်။
No comments:
Post a Comment