ကျောက်မီးသွေးဓါတ်အားပေးစီမံကိန်းများ ရပ်ဆိုင်းပေးရန် တိုင်းရင်းသားအဖွဲ့များက တောင်းဆို

By ဗိုဟိန် (ရွှေမြစ်ခ) | Myit Makha Mediagroup on 25 Jan, 2012

မြန်မာနိုင်ငံရှိ ကျောက်မီးသွေးသုံးလျှပ်စစ်ဓါတ်အားပေး စက်ရုံစီမံကိန်းအားလုံး ရပ်ဆိုင်းပေးရန်အတွက် ပအိုဝ်းလူငယ်အစည်းအရုံးနှင့် ရှမ်းသဘာဝပတ်ဝန်းကျင်အဖွဲ့အစည်းတို့မှ ဇန်န၀ါရီလ(၂၄)ရက်နေ့က ကြေငြာချက် တစ်စောင်ထုတ်၍ တောင်းဆိုခဲ့ကြောင်း သိရသည်။

သဘာဝပတ်ဝန်းကျင်ဆိုင်ရာ ဆိုးကျိုးများဖြစ်ပေါ်လာနိုင်သည့်အတွက် စီမံကိန်းအားလုံး ရပ်ဆိုင်းရန် ပတ်ဝန်းကျင်အရေးလှုပ်ရှားသည့် အဖွဲ့များက တောင်းဆိုခဲ့ခြင်း ဖြစ်သည်။

“ဘာဖြစ်လို့ အစိုးရက နိုင်ငံအတွင်းက သဘာဝဓါတ်ငွေတွေ ထုတ်ရောင်းပြီးတော့ ဒေသခံပြည်သူတွေကို အဆိပ်သင့်စေတဲ့ ကျောက်မီးသွေးမှုန့်တွေကြားမှာ မွန်းကြပ်စေတာလဲ “ ဟု ပအိုင်းလူငယ်အစည်းအရုံးမှ ကိုခွန်းမျိုးထိုက အဆိုပါကြေငြာချက်တွင် ထည်သွင်းပြောကြားခဲ့သည်။

ပအိုဝ်းလူငယ်အစည်းအရုံးနှင့် ရှမ်းသဘာဝပတ်ဝန်းကျင်အဖွဲ့များမှာ နယ်စပ်အခြေစိုက် သဘာဝပတ်ဝန်းကျင် အရေး၊ လူ့အခွင့်အရေးချိုးဖောက်မှု မှတ်တမ်းတင်သွင်းရေးနှင့် လူငယ်စွမ်းရည်မြှင့်တင်ရေးလုပ်ငန်းများ လုပ် ဆောင်နေကြသည့် အဖွဲ့များဖြစ်သည်။

မြန်မာနိုင်ငံတွင် ကျောက်မီးသွေးဓါတ်အားပေးစက်ရုံပေါင်း(၇)ရုံ တည်ဆောက်ရန်ရှိသည့်အနက် တီကျစ် စက်ရုံ တစ်ရုံ သာ လည်ပတ်နေကြောင်းသိရသည်။

လက်ရှိအကြီးဆုံး ကျောက်မီးသွေးလျှပ်စစ်ဓါတ်အားပေးစက်ရုံမှာ ရှမ်းပြည်နယ်တောင်ပိုင်းရှိ မဂ္ဂါဝပ် (၁၂၀) ထွက် တီကျစ်ကျောက်မီးသွေးသုံး လျှပ်စစ်ဓါတ်အားပေးစက်ရုံဖြစ်ပြီး၊ ထိုစက်ရုံမှ အဆိပ်အတောက် ဖြစ်စေ သောဓါတ်ငွေ့နှင့် ကျောက်မီးသွေးပြာမှုန်တန်(၁၀၀)ကျော်ကို နေ့စဉ်ထုတ်လွင့်လျက်ရှိကြောင်း ပအိုဝ်းလူငယ် အစည်းအရုံးမှ ပြုစုထားသည့် အဆိပ်သင့်တိမ်များ အစီရင်ခံစာတွင် ဖော်ပြထားသည်။

ရှမ်းပြည်နယ်အရှေ့ပိုင်းတွင် အီတာလျှံထိုင်းကုမ္ပဏီမှ မဂ္ဂါဝပ်(၃၆၉)ထုတ်လုပ်ပေးသည့် မိုင်းကုတ်ကျောက် မီးသွေးသုံး လျှပ်စစ်ဓါတ်အားပေးစက်ရုံတစ်ခုကိုလည်း အကောင်အထည်ဖော်လျှက်ရှိကြောင်း စာတမ်းပါ အချက်များအရ သိရှိရသည်။

မီဒီယာများနှင့် သဘာဝပတ်ဝန်းကျင်အရေး ချစ်ခင်သူများ၏ ရပ်တန့်ပေးရန် တောင်းဆိုမှုကြောင့် ပြီးခဲ့သည့် ဇန်န၀ါရီလ (၉) ရက်နေ့က အမှတ်(၂)လျှပ်စစ်စွမ်းအားဝန်ကြီးဋ္ဌာန ၀န်ကြီး ဦးခင်မောင်စိုးမှ ထားဝယ်ရေနက် ဆိပ်ကမ်း တည်ဆောက်ရေးစီမံကိန်းတွင် တစ်ခုအပါအ၀င်ဖြစ်သည့် မဂ္ဂါဝပ်(၄၀၀၀)ထွက်ရှိမည့် ကျောက်မီး သွေးသုံး လျှပ်စစ်ဓါတ်အားပေး စက်ရုံတည်ဆောက်ရေးစီမံကိန်းအား ရပ်ဆိုင်းခဲ့သည်။

No comments: