ပအိုဝ်းအမျိုးသားနေ့ဖြစ်ပေါ်လာပုံ

အမျိုးသားနေ့သည် လူမျိုးတိုင်းအတွက် အမျိုးသားစိတ်ဓါတ် ရှင်သန်ထက်မြက်ရေးနှင့် အမျိုးသားစာပေ ယဉ်ကျေးမှု ဖော်ထုတ်ထိန်းသိမ်းရေး စသည်ဖြင့် ပြုလုပ်ရာတွင် အရေးပါသော နေ့တစ်နေ့ဖြစ်သည်။ ပအိုဝ်း လူမျိုးတို့သည် မိမိတို့ထူးခြားသည့် သမိုင်းအစဉ် အလာကို အကြောင်းပြုပြီး ဒဲဉ်သီးလာဗွေ ခေါ် တပေါင်းလ ပြည့်နေ့ကို ပအိုဝ်းအမျိုးသား နေ့ အဖြစ်သတ်မှတ်ကြသည်။ 


ဂေါတမမြတ်စွာဘုရား သက်ရှိထင်ရှားချိန်တွင် သုဝဏ္ဏဘုမိ သထုံပြည်ကို အုပ်ချုပ်ခဲ့သော သူရိယစန္ဒာမင်းသည် ပအိုဝ်းလူမျိုးတို့အတွက် တောက်ပသော ခေတ်ကာလကို ဖန်တီးပေးခဲ့သည်။ ထိုမင်းသည် သထုံမြို့ရှိ ရွှေစာရံစေတီတော်၏ မူလဒါယာကာလည်းဖြစ်သည်။ ဤကျေးဇူးတရားကို အောက်မေ့တမ်းတ သတိရခြင်းအား ဖြင့် သူရိယစန္ဒာမင်း၏ မွေးနေ့ဖြစ်သော တပေါင်း လပြည့်နေ့ကို ပအိုဝ်းအမျိုးသားနေ့အဖြစ် သတ်မှတ်ခဲ့ခြင်း ဖြစ်သည်။ 

သူရိယစန္ဒာမင်းသည် လွန်ခဲ့သော နှစ်ပေါင်း ၂၅၀၀ ကျော်က မဟာသက္ကရာဇ်(၃)ခုနှစ် တပေါင်းလပြည့် စနေနေ့တွင် နေထွက်လ၀င်၊ နေရောင် လရောင် ရောယှက်သော အချိန်တွင် ဖွားမြင်သဖြင့် သူရိယစန္ဒာ ဟု ခေါ်တွင်ခဲ့သည်။

အောက်မြန်မာပြည်ရှိ ပအိုဝ်းတိုင်းရင်းသားတို့သည် လယ်ယာလုပ်ငန်းကို အဓိကထား လုပ်ကိုင်ကြသည်။ လုပ်ငန်းခွင် ရုပ်သိမ်းပြီးစီးသည့် တပေါင်းလတွင် ဗုဒ္ဓရှင်တော်နှင့် ဆွေတော်မျိုးတော် မိအိုဖအို အကြီးအကဲများကို ဆွမ်းဦးကပ်လှူကာ ကောက်ဦးတင်ပွဲများ ကျင်းပကြသည်။ ကောက်ဦးကျွေးမွေးပွဲတွင် ဆွေမျိုးများကို တစ်နှစ် တစ်ကြိမ်တွေ့ဆုံခွင့်ရ ခဲ့ကြသည်။ ထိုကြောင့် တပေါင်းလပြည့်နေ့ ရောက်တိုင်း ရွှေစာရံစေတီ ဘုရားကုန်းမြေ၌ ဘုရားကို ကောက်ဦးပူဇော်ပွဲ ဆွေမျိုးဆုံပွဲပြုလုပ်ရာမှ ပအိုဝ်းအမျိုးသားနေ့ အဖြစ်သို့ ပေါ်ပေါက်လာခဲ့ရသည်။

ဖဆပလ ဦးကျော်ငြိမ်းသည် သထုံနယ်၌ လယ်ယာစီမံကိန်းများ ချမှတ်ခဲ့သည်။ ပအိုဝ်း ရွာသားတို့သည် မိမိတို့ ဘိုးဘွား လက်ထက်ကတည်းက ပိုင်ဆိုင်လာသော လယ်မြေများကို ဖဆပလ အစိုးရက အဓမ္မ သိမ်းဆည်းခြင်းကို ခံခဲ့ရသည်။ ထိုကြောင့် ၁၉၄၈ ခုနှစ် မတ်လတွင် ပအိုဝ်းတောင်သူ အမျိုးသားအဖွဲ့ချုပ် ဦးဆောင်သော လူအင် အား တစ်သောင်း ကျော် သထုံမြို့ပေါ်သို့ ငြိမ်းချမ်းစွာ ချီတက်ဆန္ဒပြခဲ့သည်။ ထိုဆန္ဒပြပွဲတွင် အဆိုသုံးရပ်ကို တင်သွင်းခဲ့ရာ “ပအိုဝ်းလူမျိုးကို တောင်သူဟု ခေါ်ဝေါ်သုံးစွဲရေးသားခြင်း မပြုရေး” အချက်ကိုသာ လိုက်လျောခဲ့ သည်။ 

ထိုအချိန်မှ စ၍ ပအိုဝ်းအမျိုးသားနေ့ကို ရွှေစာရံ စေတီတွင် သာမက ပအိုဝ်းအမျိုးသားများ စုဝေးနေ ထိုင်ရာအရပ်တိုင်းတွင် စည်ကားစွာ ကျင်းပလာကြသည်။ ယင်းသို့ ကျင်းပရာတွင် ရာစုနှစ်များစွာ ကတည်းက ကျင်းပလာခဲ့ သော မိဘဘိုးဘွားတို့၏ အစဉ်အလာကို တန်ဖိုးထားလေးစားခြင်းအားဖြင့် ကျင်းပသည့် အကြိမ် အရေအတွက်ကို တည့်သွင်းကျင်းပခြင်းမပြုပဲ ကျင်းပလာကြပါသည်။

ယခုအခါ ပအိုဝ်းအမျိုးသားနေ့ကို သာမန်ကျင်းပခြင်းမျိုး မဟုတ်တော့ဘဲ အသက်(၈၀) ကျော် ဘိုးအိုဘွားအို များကို ကန်တော့ခြင်း၊ ပရိယတ္တိစာပေတွင် ထူးချွန်စွာ အောင်မြင် သော ပအိုဝ်းသံဃာတော်များကို ဆုများ ချီးမြှင့်ခြင်း စသည့် လူမှုရေးလုပ်ငန်းများဖြင့် ပြုလုပ် လာကြသည်ကို တွေ့ရသည်။ ထိုအပြင် ပအိုဝ်းဒေသတွင်းရှိ အခြားသောတိုင်းရင်းသား လူငယ်များအား တစ်ဦးကိုတစ်ဦး ပိုမိုရင်းနှီးမှုရှိလာအောင် ယဉ်ကျေးမှုအဆိုအက အတီး အမှုတ်များဖလှယ်ခြင်းနှင့် အားကားစားပြိုင်ပွဲများ ကျင်းပပေးခြင်း စသည်ဖြင့် ပြုလုပ်သည်ကို တွေ့ရသည်။

ကျမ်းကိုး
“ပအိုဝ်း” မောင်ခွန်နွယ်၊ အင်းလေး၊ ၁၉၉၁
ပြည်ထောင်စုထဲ့က ပအိုဝ်း၊ ပီအဲန်အိုထုတ်ဝေ၊ ၂၀၀၇
 =============================================

၂၀၀၉ ခုနှစ်၊ မတ်လ (၁၀) ရက်တွင် တပေါင်းလပြည့်နေ့ဖြစ်သည့် ပအိုဝ်းအမျိုးသားနေ့ ကျရောက်တော့မည်ဖြစ်သဖြင့်၊ ပအိုဝ်းအမျိုးသားနေ့ ဖြစ်ပေါ်လာရသည့်အကြောင်းများကို မိမိတို့ပအိုဝ်းလူမျိုး များနှင့် အခြားသောတိုင်းရင်သားလူမျိုးများ ပိုမိုသိရှိနားလည်လာစေရန် ပအိုဝ်းအမျိုးသားနေ့ဖြစ်ပေါ်လာပုံကို ပြန်လည်တင်ပြလိုက်ခြင်းဖြစ်ပါသည်။ ဤစောင်းပါးကို ခွိုပအိုဝ်း စာမျက်နှာပေါ်မှ ကူးယူ၍ ပြန်လည်ဖေါ်ပြ ထားခြင်းဖြစ်သည်။

No comments: