By ခွန်ချန်ကီ | အောက်တိုဘာ ၅၊ ၂၀၁၅ | တောင်ကြီးတိုင်းမ်
ဖြားဗွာလှဖေသည် ၁၉၁၀ ခုနှစ် မတ်လ ၂၄ ရက်နေ့တွင် ဘီလင်းမြို့နယ် ညောင်ပလ္လင်ကျေးရွာအုပ်စု သံပရာဆိပ်ရွာနေ ဦးဖိုးဒွန်း ဒေါ်နန်းတို့မှ ဖွားမြင်သော သားသမီး (၃)ဦးအနက် အငယ်ဆုံးသားဖြစ်သည်။ ၁၉၃၂ ခုနှစ်တွင် ရန်ကုန်တက္ကသိုလ်တွင် B.Sc Hons သိပ္ပံဂုဏ်ထူးတန်းဘွဲ့ကို လည်းကောင်း၊ ၁၉၃၆ ခုနှစ်တွင် အင်္ဂလန်နိုင်ငံ၊ လန်ဒန်တက္ကသိုလ်တွင် BL ဥပဒေဘွဲ့ကိုလည်းကောင်း ဆွတ်ခူးရရှိခဲ့သည်။
၁၉၃၆ ခုနှစ်မှစ၍ သထုံခရိုင်အနောက်ခြမ်းမှ ဥပဒေပြုလွှတ်တော်သို့ ကရင်အမတ်အဖြစ် လည်းကောင်း၊ ၁၉၃၇ တွင် ဒေါက်တာဘမော် ဦးဆောင်သော အစိုးရလက်ထက်တွင် ပါလီမန်လွှတ်တော် ဒုတိယဥက္ကဌအဖြစ် လည်းကောင်း တင်မြောက်ခြင်းကို ခံရသည်။ ၁၉၃၉ မှ ၁၉၄၂ အထိ ပြည်သူ့လွှတ်တော် တရားရေးဆိုင်ရာအတွင်းဝန်အဖြစ် ခန့်အပ်ခြင်း ခံရသည်။
၁၉၃၉ နောက်ပိုင်းတွင် ဝန်ကြီးဟောင်းတစ်ဦးဖြစ်သော တနင်္သာရီအမျိုးသားအဖွဲ့ခေါင်းဆောင် စောဖိုးချစ် ဦးစီးတည်ထောင်သည့်တပ်ဖွဲ့၊ လွှတ်တော်ဒုဥက္ကဌဟောင်း ဖြားဗွာလှဖေ ဦးစီးတည်ထောင်သည့်တပ်ဖွဲ့ စသည်ဖြင့် ကိုယ်ပိုင်စစ်တပ်ဖြင့် ဖွဲ့စည်းထားကြသည်။ ဖြားဗွာလှဖေသည် ထိုအချိန်တွင် ဒေါက်တာဘမော်၊ ဗိုလ်ချုပ်အောင်ဆန်း၊ ဦးနုတို့ ဦးစီးတည်ထောင်ခဲ့ကြသော မြန်မာ့အမျိုးသားတပ်ဦးကြီးဖြစ်သည့် ဗမာ့ထွက်ရပ်ဂိုဏ်းခေါ် နယ်ချဲ့တော်လှန်ရေး တပ်ပေါင်းစုကြီးနှင့် ပူးပေါင်းဆောင်ရွက်ခဲ့သူ တစ်ဦးဖြစ်သည်။
၁၉၄၂ တွင် ဂျပန်စစ်သေနာပတိ ဂျင်နာရယ် အီးဒါက ဖွဲ့စည်းပေးသော မြန်မာပြည်အုပ်ချုပ်ရေးအဖွဲ့ကို ဖြားဗွာလှဖေက ကူးသန်းရောင်းဝယ်ရေးနှင့် စက်မှုလက်မှုဝန်ကြီးအဖြစ် ခန့်အပ်ခြင်းခံရသည်။ ၁၉၄၃ ခုနှစ် မတ်လ (၂၃)ရက်နေ့တွင် မြန်မာနိုင်ငံလွတ်လပ်ရေးဆွေးနွေးရန်အတွက် ဗိုလ်ချုပ်အောင်ဆန်းအပါအ၀င် ဖြားဗွာလှဖေသည် ဂျပန်နိုင်ငံ တိုကျိုမြို့သို့ သွားရောက်ခဲ့ကြသည်။
၁၉၄၃ ခုနှစ် သြဂုတ်လ (၁)ရက်နေ့တွင် ဒုတိယကမ္ဘာစစ်အတွင်း မြန်မာနိုင်ငံကို ဂျပန်ပြည်အစိုးရ ပေးသော ရွှေရည်စိမ် မြန်မာ့လွှတ်လပ်ရေးမှ ဒေါက်တာဘမော်ဦးဆောင်သော အစိုးရအဖွဲ့တွင် ဖြားဗွာလှဖေ သည် သစ်တော်နှင့် သတ္တုတွင်းဝန်ကြီးအဖြစ် ခန့်အပ်ခြင်းကို ခံရသည်။ ၁၉၄၅ ခုနှစ် ဧပြီလ (၂၂)ရက်နေ့တွင် မဟာမိတ်များ တန်ပြန်ထိုးစစ်ဆင်ခြင်းကြောင့် ဦးလှဖေသည် ဂျပန်စစ်တပ်များနှင့်အတူ ရန်ကုန်မြို့မှ မော်လမြိုင်မြို့သို့ ဆုတ်ခွာခဲ့ရသည်။
၁၉၄၆ ခုနှစ် မတ်လ ၂၀ ရက်မှ ၂၈ ရက်နေ့အထိ ကျင်းပသော ရှမ်းပြည်လက်မှုပြပွဲအမည်ခံ ပထမပင်လုံညီလာခံသို့ ဖိတ်ကြားထားသည့် ဖဆပလ ကိုယ်စားလှယ်များအနက် ဗိုလ်ချုပ်အောင်ဆန်းအပါအ၀င် ဖြားဗွာလှဖေ တို့တက်ရောက်ခဲ့သည်။ ထိုညီလာခံမှ ရှမ်းပြည်လွှတ်မြောက်ရေးအဖွဲ့ ရပလမှ ပအိုဝ်းကိုယ်စားလှယ်များ ဖြစ်ကြသော ဦးဖြူ၊ ဖြားနန္တာဟိန်၊ ဗိုလ်ဟိန်မောင် ဆက်သွယ်မိပြီး ၎င်းညီလာခံအပြန်တွင် သထုံဆီဆိုင်စော်ဘွားစဝ်ခွန်ကြည်သို့ သွားရောက်တွေ့ဆုံခဲ့သည်။ ထိုနောက် ၁၉၄၆ ခုနှစ် ဇွန်လတွင် ဖြားဗွာလှဖေသည် ပအိုဝ်းအမျိုးသားအဖွဲ့ချုပ်ကို သထုံမြို့ရှိ ညောင်ဝိုင်းဘုန်းကြီးကျောင်းတွင် ဖွဲ့စည်းထူထောင်ခဲ့သည်။
ဖြားဗွာလှဖေသည် ၁၉၄၇ ခုနှစ် ဖေဖော်ဝါရီလ (၃)ရက်မှ (၁၃)ရက်ထိ ကျင်းပပြုလုပ်သော ပင်လုံညီလာခံတွင် ကရင်ကိုယ်စားလှယ်အဖြစ် တက်ရောက်ခဲ့သည်။ ထိုနောက် ၁၉၄၇ ခုနှစ် ဧပြီလ (၆)ရက်နေ့တွင် ကေအဲန်ယူကို ပြန်လည်ဖွဲ့စည်းရာ ဖြားဗွာလှဖေက ဒုဥက္ကဌအဖြစ် ခန့်အပ်ခြင်းခံရသည်။
၁၉၄၈ ခုနှစ် ဖြားဗွာလှဖေ ပါဝင်ဦးဆောင်သော ပအိုဝ်းအမျိုးသားအဖွဲ့ချုပ်ဦးဆောင်သော သထုံခရိုင်ပအိုဝ်းအမျိုးသားဆန္ဒပြပွဲတစ်ရပ်ကို သထုံမြို့ မော်ကျော့ရပ်၊ ရေကျော်ဘုန်းကြီးကျောင်းဝင်းအတွင်းတွင် ကျင်းပပြုလုပ်ပြီး (၁) ပအိုဝ်းလူမျိုးတို့အား တောင်သူလူမျိုးခေါ်ခြင်းကို နောက်နောင်တွင် ပအိုဝ်းလူမျိုးဟု ခေါ်ဆိုရေးသားရန်။ (၂) ပအိုဝ်းလူမျိုးအား တပ်ရင်း (၂)ရင်းဖွဲ့စည်းပေးရန် စသည်အဆို နှစ်ရပ်ကို တောင်းဆိုခဲ့သည်။ နိုင်ငံတော်အစိုးရလည်း ပအိုဝ်းလူမျိုးကို တောင်သူလူမျိုးဟု ခေါ်ဆိုခြင်းအား နောက်နောင်တွင် ပအိုဝ်းလူမျိုးဟု ခေါ်ဆိုရေးသားရန်အဆိုကို အသိအမှတ်ပြုကြောင်းနှင့် တပ်ရင်း (၂)ရင်းဖွဲ့စည်းခြင်းမှာ နိုင်ငံတော်တွင် စစ်တပ်ရှိပြီးဖြစ်၍ မဖြစ်နိုင်ကြောင်း စစ်မှုဝင်ရောက်ထမ်းလိုပါက စီစဉ်ပေးမည်ဟု ပြန်ကြားခဲ့သည်။
ဖြားဗွာလှဖေသည် ၁၉၄၈ ခုနှစ် သြဂုတ်လ (၃)ရက်နေ့တွင် တော်လှန်ရေးလုပ်ရန် တောခိုပြီး ကေအဲန်ယူခေါင်းဆောင်များ၊ ကေအဲန်ဒီအိုတပ်ဖွဲ့များနှင့် ပူးပေါင်းပြီး သထုံခရိုင်ကို စတင်သိမ်းပိုက်ခဲ့သည်။ ၁၉၄၉ တွင် ဖြားဗွာလှဖေသည် ကေအဲန်ဒီအိုတပ်ဖွဲ့များနှင့်အတူ ရှမ်းပြည်နယ်သို့ ရောက်ရှိခဲ့သည်။ ရှမ်းပြည်နယ်တွင် ပညာရေး၊ ကျန်းမာရေး၊ စီးပွားရေး၊ အမျိုးသားစာပေနှင့် ယဉ်ကျေးမှု စသည်တို့ ခေတ်နောက်ကျကျန်ခဲ့သည်ကို မြင့်တင်ရန် စိတ်အားထက်သန်ခဲ့သည်။
၁၉၄၉ ခုနှစ် ဒီဇင်ဘာလ (၁၁)ရက်နေ့တွင် ပအိုဝ်းအမျိုးသားလွတ်မြောက်ရေးအဖွဲ့ (ပအလဖ)ကို ဖွဲ့စည်းလှုပ်ရှားခဲ့သည်။ ထိုနောက် ဖြားဗွာလှဖေသည် အုတ်လုပ်ငန်းကို ရင်းနှီးမြှုပ်နှံရန် မော်လမြိုင်ဘဏ်နှင့် ရန်ကုန်ဘဏ်တွင် မိမိပိုင်ဆိုင်သော ငွေ (၁၅)သိန်းကို လူယုံတစ်ဦးအား ထုတ်ယူစေခဲ့သည်။ ထိုငွေများဖြင့် ကေအဲန်ယူထံ တပ်ရင်း(၃)ရင်းစာ လက်နက်များဝယ်ယူပြီး ပအလဖ တပ်ဖွဲ့ကို စနစ်တကျ ဖွဲ့စည်းခဲ့သည်။ ၁၉၅၀ တွင် ပအလဖ ရဲဘော်များ အလင်းဝင်ခဲ့သည်ကို ဖြားဗွာလှဖေက တောတွင်း၌ ကျန်ခဲ့သည်။ ၁၉၅၁ တွင် ပအလဖ အလင်းဝင်ခေါင်းဆောင် ဗိုလ်ချန်ဇုံအား ပုဒ်မ(၅)ဖြင့် (၅)လခန့်ကြာ ဖမ်းဆီးထောင်ချခြင်းခံရသည်။ ထိုနောက် ဗိုလ်ချန်ဇုံသည် တောတွင်းတွင် ကျန်ရှိနေသည့် ဖြားဗွာလှဖေနှင့် ပြန်လည်ပူးပေါင်းပြီး လက်နက်ကိုင် တော်လှန်ရေးလမ်းစဉ်ဖြင့် ဆက်လက်လှုပ်ရှားခဲ့သည်။
၁၉၅၈ ခုနှစ် မေလ (၅)ရက်နေ့တွင် ပဒေသရာဇ်စနစ်ဆိုးချုပ်ငြိမ်းရေး၊ ဒီမိုကရေစီရေး၊ ပအိုဝ်းအခွင့်အရေးရရှိရေးအတွက် ဖြားဗွာလှဖေ ဦးဆောင်သော ပအလဖ ရဲဘော် ၁၃၃၃ ဦးနှင့်အတူ လက်နက်နှင့် ဒီမိုကရေစီလဲလှယ်ရေးကို တောင်ကြီးမြို့ ၂၁၂ ကွင်းတွင် ပြုလုပ်ခဲ့သည်။
၁၉၆၀ ခုနှစ်တွင် ပြည်လုံးကျွတ်ပါလီမန်ရွေးကောက်ပွဲ၌ ရွေးကောက်ခံရသော ပြည်ထောင်စုပအိုဝ်းအမျိုးသားအဖွဲ့ချုပ် (ပအမဖ)အမတ် (၃)ဦးအနက် ဖြားဗွာလှဖေသည် ညောင်ရွှေမြို့နယ် အရှေ့ဘက် မဲဆန္ဒနယ်မြေတွင် ရွေးကောက်တင်မြောက်ခြင်းခံရသည်။ ၁၉၆၁ ခုနှစ် ဖေဖော်ဝါရီလတွင် တောင်ကြီးမြို့၌ ကျင်းပသော ပြည်နယ်များညီညွှတ်ရေးညီလာခံအား ဖြားဗွာလှဖေတက်ရောက်ပြီး ထိုနှစ် နိုဝင်ဘာလတွင် ရှမ်းပြည်အနေဖြင့် ပြင်ဆင်ညှိနှိုင်းသည့် ဖက်ဒရယ်မူဝါဒကို ပအမဖ အမတ်များဖြစ်သော ဖြားဗွာလှဖေ၊ ဦးကျော်စိန်နှင့် ဦးဖြူတို့လည်း ပါဝင်ခဲ့သည်။
၁၉၆၃ ခုနှစ် ဇွန်လ (၁၁)ရက်နေ့တွင် တော်လှန်ရေးကောင်စီအစိုးရက တောတွင်းလက်နက်ကိုင်အဖွဲ့အစည်းများအားလုံးကို ပြည်တွင်းငြိမ်းချမ်းရေးတည်ဆောက်ရန်အတွက် စကားကမ်းလှန်းခဲ့သည်။ ထိုနောက် ၁၉၆၃ ခုနှစ် ဇွန်လ(၂၆)ရက်နေ့တွင် ပြည်တွင်းငြိမ်းချမ်းရေးအတွက် သခင်ကိုယ်တော်မှိုင်းက နာယကအဖြစ်လည်းကောင်း၊ ဖြားဗွာလှဖေက ဥက္ကဌအဖြစ်လည်းကောင်း ပြည်သူ့ကော်မတီကို ဖွဲ့စည်းခဲ့သည်။ ထိုကော်မတီသည် ၁၉၆၃ ခုနှစ် နိုဝင်ဘာလ(၈)ရက်နေ့ ညနေပိုင်းတွင် ရန်ကုန်မှ ၂၂ မိုင်ဝေးသော ထောက်ကြန့်တွင် (၆)ရိုင်ဆန္ဒပြပွဲကို လူထု (၁)သိန်းကျော်တက်ရောက်ပြီး ဖြားဗွာလှဖေနှင့် သခင်ကိုယ်တော်မှိုင်းတို့ အသီးသီးမိန့်ခွန်းမြွှတ်ကြားခဲ့ကြသည်။ ပြည်သူ့ကော်မတီက တောတွင်းလက်နက်ကိုင်ကိုယ်စားလှယ်များနှင့် အစိုးရတို့တွေ့ဆုံရာတွင် အောင်မြင်ရေးအတွက် အနိမ့်ဆုံးလိုအပ်ချက် အောက်ပါ (၅)ချက်ကို တင်ပြခဲ့သည်။
(၁) နှစ်ဦးနှစ်ဘက်ထိုးစစ်တိုက်စစ်များကို ကမ်းလှမ်းသည့်အချိန် တွေ့ဆုံဆွေးနွေးသည့်ကာလ၊ ဆွေးနွေးပွဲပျက်ပြီး လုံလောက်သောအချိန်ကာလအထိ (ပစ်ခတ်) ရပ်စဲရေး။
(၂) ဗဟို-ဗဟိုချင်း အပြီးဆွေးနွေးရေး
(၃) ရန်ကုန်တွင် ဆွေးနွေးရေး
(၄) တောတွင်းကိုယ်စားလှယ်များ လွတ်လပ်ခွင့်နှင့် လုံခြုံမှုပေးရေး
(၅) အပြန်အလှန်တင်ပြချက်ကို ပြည်သူတို့အားအသိပေးရေး တို့ဖြစ်သည်။
ထိုနောက် ၁၉၆၄ တွင် ဖြားဗွာလှဖေသည် တော်လှန်ရေးကောင်စီစစ်အစိုးရ၏ ဖမ်းဆီးခြင်းကို ခံရပြီး ၁၉၇၁ ခုနှစ်တွင် ထောင်မှ ပြန်လွတ်လာခဲ့သည်။ ၁၉၇၂ ခုနှစ် ဇွန်လတွင် ရန်ကုန်မှ ပြန်လည်ထွက်ခွာလာပြီး တော်လှန်ရေးနယ်မြေသို့ ပြန်ရောက်ရှိခဲ့သည်။ ၁၉၇၄ တွင် ရှမ်းပြည်လူမျိုးပေါင်းစုံ လွတ်မြောက်ရေးတပ်ဦးတွင် ဥက္ကဌတာဝန်ကို ဆောင်ရွက်ခဲ့သည်။ ၁၉၇၅ ခုနှစ် စက်တင်ဘာလ (၂၄)ရက်နေ့ (တော်သလင်းလဆုတ်- ၅ ရက်နေ့) တွင် တောင်ကြီးမြို့နယ် ပန်တွန်ရွာ၌ လူကြီးရောဂါဖြင့် ကွယ်လွန်ခဲ့သည်။
ထိုနောက် ၁၉၇၆ ခုနှစ် ဇန္န၀ါရီလတွင် ဆီဆိုင်မြို့နယ် လုံးဒါဘုန်းကြီးကျောင်း၌ ကျင်းပပြုလုပ်သော ပအိုဝ်းအမျိုးသားအဖွဲ့ချုပ် (ပီအဲန်အို) ပထမအကြိမ်ညီလာခံတွင် ကန့်ကွက်သူမရှိ တညီတညွတ်တည်းဖြင့် ဆန္ဒပေးကြရတွင် ပအိုဝ်းအမျိုးသားခေါင်းဆောင်ကြီး ဖြားဗွာလှဖေ ကွယ်လွန်သည့် တော်သလင်းလဆုတ် (၅)ရက်နေ့ကို ပအိုဝ်းအာဇာနည်နေ့အဖြစ် ဆုံးဖြတ်ချက်ချမှတ်ခဲ့ကြသည်။
ရေးသားတင်ပြသူ - ခွန်ချက်ကီ
No comments:
Post a Comment