ပအိုဝ့် ပအိုဝ် ပအိုဝ်း သုံးမျိုးပြသနာ

ခွန်ရာဇာ | အောက်တိုဘာ ၁၆ ရက်၊ ၂၀၁၅ ခု | တောင်ကြီးတိုင်းမ်

ပအိုဝ်းတိုင်းရင်းသားတွေဟာ ဟိုးရှေးဘုရားရှင်လက်ထက်ကတည်းက မြန်မာနိုင်ငံမှာ မှီတင်းနေထိုင် လာခဲ့တာဖြစ်ပြီး သမိုင်းအစဉ်အလာအရ ကြီးမားခဲ့တဲ့လူမျိုးတစ်မျိုးဖြစ်ပါတယ်။ သမိုင်းအရ သုဝဏ္ဏဘူမိလို့ခေါ်တဲ့ သထုံမှာ ပအိုဝ်းတိုင်းရင်းသားကိုယ့်ဘုရင်ကိုယ့်ထီးနန်းအနေနဲ့ နေထိုင်လာတဲ့လူမျိုးဖြစ်တယ်လို့သိခဲ့ရပါတယ်။ ပိဋိကတ်သုံးပုံကြောင့် ခွန်မနုဟာ ဘုရင်မင်းလက်ထက်မှာ ပုဂံမင်းအနော်ရထာ လာတိုက်ယူတဲ့အတွက် သုဝဏ္ဏဘူမိသထုံပြည် ကျဆုံးခဲ့ရတယ်လို့လည်းသိရပါတယ်။

ဒါကြောင့် ပအိုဝ်းတိုင်းရင်းသားတွေဟာ ရေကြည်ရာမြက်နုရာဆိုသလို တောင်ပေါ်ဒေသအပြင် တခြားသောနေရာအတောများများကိုလည်း တောင်ယာစိုက်ပျိုးလိုပ်ကိုင်စားသောက်ရင်း အသက်မွေးဝမ်းကြောင်းပြုခဲ့ ကြပါတယ်။ မြန်မာနိုင်ငံမှာ တိုင်းရင်းသားလူမျိုး၁၃၅ မျိုးရှိတယ်ဆိုတဲ့အထဲမှာ ပအိုဝ်းတိုင်းရင်းသားလူမျိုးလည်း ပါဝင်ပါတယ်။ တစ်နိုင်ငံလုံးလူဦးရေအရမှာလည်း ဆဌမမြောက်အဆင့်ရှိတယ်လို့လည်းသိရပါတယ်။

ပအိုဝ်းတိုင်းရင်းသားတွေဟာ တိုင်းပြည်ဆုံးရှုံးခဲ့ဖူးတဲ့အတွက် မြေပြန့်ဒေသသို့မဟုတ် လူစည်ကားရာ ဒေသတွေမှာ နေထိုင်လေ့မရှိခဲ့ဘူး။ ဘာကြောင့်လဲဆိုတော့ ကြောက်စိတ်ရှိသွားတဲ့ သဘောဖြစ်ပါတယ်။ တိုင်းပြည်ထိန်းသိမ်းခံရတယ်၊ ခွန်မနုဟာဘုရန်အထိန်းသိမ်းခံရတာသာမကဘဲ ပညာရှင်တွေအားလုံးအထိန်းသိမ်းခံလိုက်ရတဲ့အတွက် အသက်ရှင်နေထိုင်ဖို့ ရုန်းကန်ကျိုးစားအားထုတ်ရတဲ့ လူမျိုးတစ်မျိုးဆိုရင်လည်း မမှားပါဘူး။

ဒါတင်မက မြန်မာနိုင်ငံမှာ အိင်္ဂလိပ်နယ်ချဲ့စိုးမိုးတဲ့အချိန်၊ ဖက်ဆစ်ဂျပန်စိုးမိုးခဲ့တဲ့အချိန်မှာလည်း ပအိုဝ်းတိုင်းရင်းသားတွေဟာ တောင်ပေါ်မြေပြန့်ကနေပြီး တစ်စိုက်မတ်မတ် တွန်းလှန်ခဲ့တဲ့နေရာမှာ၊ လွတ်လပ်ရေးကြိုးပမ်းတဲ့နေရာမှာလည်း တက်ကြွစွာ ပူးပေါင်းပါဝင်ခဲ့ပါတယ်။ မြန်မာနိုင်ငံမှာ လွတ်လပ်ရေးအရယူခဲ့တဲ့ ဗိုလ်ချုပ်အောင်ဆန်းနဲ့အတူ ပင်လုံစာချုပ်မှာလည်း ပအိုဝ်းတိုင်းရင်းသားတွေ ပါဝင်ခဲ့တယ်ဆိုတာလည်း သမိုင်းအရ ဖြောက်ဖျက်လို့ မရတဲ့သက်သေရှိပါတယ်။

ပအိုဝ်းတိုင်းရင်းသားလူမျိုးဟာ လက်နက်စွဲကိုင် တော်လှန်ရေးဆင်နွဲခဲ့ရတာကိုလည်း တိုင်းပြည်နဲ့လူ မျိုးကို ကာကွယ်ဖို့ဆိုတာလည်းမမှားပါဘူး။ ယခုထိ ပအိုဝ်းတိုင်းရင်းသားတွေဟာ ပညာရေး၊ စီးပွားရေး၊ လူမှုရေးတွေ နိမ့်ကျနေသေးတာကို ပဒေသရာဇ်စနစ်ကျင့်သုံးခဲ့တဲ့ စော်ဘွားတွေကြောင့်ဖြစ်ရသလို၊ တန်းတူညီမျှမှု မရရှိတဲ့အတွက်လည်းဖြစ်ပါတယ်။

ယခုမြန်မာနိုင်ငံဟာ နိုင်ငံရေးပြောင်းလဲမှုတွေ ပြုလုပ်လာတဲ့အချိန်ိမှာ ပအိုဝ်းတိုင်းရင်းသားတွေလည်း ပူးပေါင်းပါဝင်လာခဲ့ပါတယ်။ ဒါပေမယ့် စိတ်မကောင်းတာတစ်ခုကတော့ ပအိုဝ်းတိုင်းရင်းသားတွေဟာ မြန်မာနိုင်ငံမှာ မှီတင်းနေထိုင်တဲ့တိုင်းရင်းသားလူမျိုးစုဖြစ်တယ်ဆိုတာ ကျယ်ကျယ်ပြန့်ပြန့် သိရှိတယ်ဆိုတာမရှိသေးပါဘူး။ အရင်ထက်စာရင်တော့ အနေတော်လောက်သာ ရှိနေပြီဖြစ်သော်လည်း ပအိုဝ်းဝတ်စုံ ဝတ်ထားတာကိုကြည့်ပြီး ခွဲခြားလို့ရသော်လည်း စာနဲ့ရေးတဲ့အချိန်မှာ ပအိုဝ်း ဆိုတဲ့အသံကို ပအိုး လို့အသံမထွက်ဘဲ ပအိုင်း လို့အသံထွက်တာရှိသလို ပအွိုင်း လို့အသံထွက်တာတွေလည်းရှိနေပါတယ်။

ပအိုဝ်းအမျိုးသားခေါင်းဆောင် ဖြားဗွာဦးလှဖေ မပေါ်ပေါက်ခင်မှာ ပအိုဝ်းတိုင်းရင်းသားကို တောင်သူ လို့သာ လူသိများပေမယ့် မြန်မာသက္ကရာဇ် ၁၃၄၈ ခုနှစ်မှာ ဖြားဗွာဦးလှဖေ၊ ဖြားတန်စံရွှေတို့ ဦးဆောင်ပြီး လူအင်အားနှစ်သောင်းကျော်ဖြင့် သထုံပြည်ဆန္ဒပြပွဲမှာ ဒီလိုတောင်းဆိုထားတာ ရှိပါတယ်။

- ပအိုဝ်းကို ပအိုဝ်းဟုခေါ်ဆိုပေးဖို့(တောင်သူလို့ မခေါ်ဆိုဖို့)
- ပအိုဝ်းစစ်တပ် နှစ်တပ်ထားရှိပေးဖို့
- ပအိုဝ်းစကားဟာ တို့စကား
- ပအိုဝ်းစာဟာ တို့စာ
- ပအိုဝ်းအဝတ်အစားဟာ တို့အဝတ်အစားလို့ ကြွေးကြော်သံနဲ့ တောင်းဆိုခဲ့ပါတယ်။

အမျိုးသားစာပေဆုရ ပအိုဝ်းစာရေးဆရာ မောင်ခွန်နွယ် (အင်းလေး) ရေးသားဖော်ပြခဲ့တဲ့ ပအိုဝ်းအကြောင်းမှာလည်း ပအိုဝ့် ပအိုဝ် ပအိုဝ်း - ပအိုဝ်းကိုသာ တို့ကြိုက်ပါသည် လို့ ရေးသားမှုတွေကိုလည်း ရှိခဲ့ပါတယ်။ အဘယ်ကြောင့် မပြန့်ပွားဘဲ ကျယ်ကျယ်ပြန့်ပြန့် မရှိတာလဲဆိုတာကို ပအိုဝ်းအမျိုးသားများစဉ်းစားစရာဖြစ်နေပြီဖြစ်တယ်။

ယခု ပျင်းမနား၊ နေပြည်တော်သို့ ပြေးဆွဲနေတဲ့ ပအိုဝ်းရတာနာကားလိုင်းဟာ ပျင်းမနားနေပြည်တော် ကလူတွေဟာ ပအိုဝ်း(ပအိုး) ရတနာလို့အသံမထွက်ဘဲ ပအိုင်းရတနာလို့သာအသံထွက်ရှိနေတာကို တွေ့ရပါတယ်။ နောက်တစ်ခုက မြန်မာနိုင်ငံမြို့ကြီးတွေမှာ ရောက်ရှိနေတဲ့ လူငယ်တွေအနေနဲ့ ပအိုဝ်းတိုင်းရင်းသား ဝတ်စုံဝတ်ပြီး လမ်းလျောက်ကြည့်ပါ လူတွေကအသစ်ဆန်းဆိုပြီး ဝိုင်းကြည့်ကြသလို ပအိုဝ်းလူမျိုးဆိုတာကို သူတို့မသိကြတာတွေ အများကြီးရှိနေပါတယ်။

ဒီမိုကရေစီစနစ် အပြောင်းအလဲကာလမှာ တိုင်းပြည်တွေလည်း ပွင့်လင်းလာနေသလို တိုင်းရင်းသားလူမျိုးတွေလည်း ဖွံ့ဖြိုးလာခဲ့ပြီဖြစ်ပါတယ်။ တိုင်းရင်းသားအချင်းချင်းကြား၊ ကူးလူးဆက်ဆံလာတာနဲ့အမျှ ထင်သာ မြင်သာတဲ့ အတိုင်းအတာတစ်ခု ရှိလာပြီဖြစ်ပါတယ်။ ဒီထဲမှာ ပအိုဝ်းတိုင်းရင်းသားတွေလည်း အတော်များများ ပါဝင်လာကြတာကိုတွေ့ရပါတယ်။

ရုပ်သံထဲ့မှာ သတင်းထဲမှာတွေ ပေါ်ပေါ်ထင်ထင် ပါဝင်လာတာကိုတွေ့ရပါတယ်။ ပအိုဝ်းတိုင်းရင်းသား လူဦးရေဟာ တစ်နိုင်ငံလုံးအတိုင်းအတာနဲ့ တစ်ခြားတိုင်းရင်းသားတွေနဲ့ယှဉ်လာရင် ဆဌမနေရာမှာရှိတယ်လို့ ပြောပေမယ့် ပအိုဝ်းတိုင်းရင်းသားဟာ ပြည်နယ်မရှိ၊ တိုင်းပြည်မရှိသာမက တိုင်းရင်းသားလို့ ပြောရင် ကချင်၊ ကယား၊ ကရင်၊ ချင်း၊ မွန်၊ ဗမာ၊ ရခိုင်နဲ့ရှမ်းတို့ဘဲပါတာဖြစ်ပြီး လူဦးရေဆဌမနေရာရှိတဲ့ ပအိုဝ်းတိုင်းရင်းသားဟာ ပြောက်နေတာကိုတွေ့ရပါတယ်။ ဒါကြောင့် ပအိုဝ်းတိုင်းရင်းသားတွေ လူသိနည်းတယ်ဆိုတာကိုလည်း မပြောလိုပါဘူး။

အောက်တိုဘာလ ၂ ရက်နေ့မှာ Concord Insitute အဖွဲ့က ဦးဆောင်ပြီး ရှမ်းပြည်နယ်ရှိ အမျိုးသမီး လွတ်တော်ကိုယ်စားလှယ်လောင်းတွေနဲ့ မီဒီယာတွေ့ဆုံပွဲကို တောင်ကြီးမြို့ တောင်ကြီးဟိုတယ်မှာ ကျင်းပခဲ့ပါတယ်။ အဲဒီတွေ့ဆုံပွဲမှာ ရှမ်းပြည်နယ်ရှိ တိုင်းရင်းသားပါတီအပါအဝင် ပါတီ ၁၀ ခု ဖိတ်ထားတာကို မလာနိုင်ဘဲ သုံးပါတီသာ လာရောက်မိတ်ဆက်နိုင်ခဲ့ပါတယ်။ ဖိတ်ထားတဲ့ ပါတီတွေကို ဦးဆောင်ကျင်းပသူ အရာရှိတစ်ဦးက ဖတ်ပြပေးပြီး တစ်ခြားတိုင်းရင်းသားပါတီတွေရဲ့ အမည်ကို အသံထွက်မှန်ကန်မှုရှိခဲ့ပေမယ့် ပအမဖ ပါတီကို ပြည်ထောင်စု ပအွိုင်း အမျိုးသားအဖွဲ့ချုပ်လို့ အသံထွက်ခဲ့တာတွေ့ခဲ့ရပါတယ်။

ဆိုတော့ ပအိုဝ်းတိုင်းရင်းသားလူမျိုးကဘဲ လိုနေသလား၊ ဒါမှမဟုတ် သူတို့ကဘဲ မှားနေသလားဆိုတာ မပြောတတ်တော့ပါ။ ဒါတင်မကသေးပါဘူး။ အောက်တိုဘာ ၃ ရက်နေ့က ရှမ်းပြည်နယ်မှာ ပထမဦးဆုံး ဆေးတက္ကသိုလ် စတင်ဖွင့်လှစ်နိုင်ခဲ့ပါတယ်။ အဲဒီဆေးတက္ကသိုလ်ဖွင့်ပွဲမှာ နိုင်ငံတော်အကြီးအကဲဖြစ်တဲ့ နိုင်ငံတော်သမ္မတ ဦးသိန်းစိန်နဲ့တကွ ရှမ်းပြည်နယ်အစိုးရအဖွဲ့၊ ပြည်ထောင်စုဝန်ကြီးတွေက လာရောက်ဖွင့်လှစ်ပေးခဲ့ပါတယ်။

အဲဒီဖွင့်ပွဲအခမ်းနားမှာ ဆေးတက္ကသိုလ်နဲ့ပတ်သက်တဲ့အကြောင်းနဲ့ ရှမ်းပြည်နယ်မှာနေထိုင်တဲ့ တိုင်း ရင်းသားလူမျိုးအကြောင်းကို ရှင်းလင်းခဲ့ပါတယ်။ ကျန်းမာရေးဝန်ကြီးဌာန ပြည်ထောင်စုဝန်ကြီးကိုယ်တိုင် ရှင်းလင်းတာဖြစ်ပြီး ရှမ်းပြည်နယ်မှာ နေထိုင်တဲ့တိုင်းရင်းသားတွေက ဆေးပညာနဲ့ပတ်သက်ရင် အဝေးကြီးသွားတက်စရာမလိုဘဲ အနီးနားသာတက်ရောက်နိုင်ပြီလို့ ဆိုပါတယ်။ ဒါပေမယ့် ပြောပြသွားတဲ့တိုင်းရင်းသားလူမျိုး အမည်တွေဟာ မှန်ကန်မှုရှိခဲ့ပေမယ့် ပအိုဝ်းတိုင်းရင်းသားလူမျိုးကျတော့ ပအိုင်း လို့ အသံဖတ်ထွက်တဲ့အတွက် မီဒီယာလောကအတွင်းကော အခြားတိုင်းရင်းသားတွေရဲ့အကြားမှာပင် ပြောစရာတစ်ခု ဖြစ်လာခဲ့ရပါတယ်။

စာရေးသားတဲ့အခါမှာ ပအိုဝ်း လို့ရေးသားထားသော်လည်း ဖတ်တဲ့အခါမှာ ပအိုင်း လို့ အသံထွက်ဖတ်ကြတာကိုတွေ့ရပါတယ်။ ဒါက နာမူနာလေးပါ တစ်ခြားတစ်ခြားသောနေရာမှာလည်း ကြုံတွေ့နေရတာတွေက အများကြီး ရှိပါလိမ့်မယ်။ လက်လှမ်းမမီတဲ့နေရာမှာလည်း ရှိနေနိုင်ပါတယ်။ ပအိုဝ်းတိုင်းရင်းသားနဲ့ ပတ်သက်ပြီး မီဒီယာတွေ့ဆုံပွဲတွေ လုပ်တဲ့အခါမှာလည်း အောက်ပြည်က သတင်းသမားတွေဟာ ပအိုဝ်းကို ပအိုး လို့အသံ မထွက်ဘဲ ပအိုင်း လို့အသံထွက်တာ များပါတယ်။

အဘယ်ကြောင့်ဆိုသော် ပအိုဝ်း ဆိုတဲ့ ဝသတ်ဟာ မြန်မာစကားလုံးထဲမှာ မရှိဘဲ သုံးလေ့မရှိခဲ့လို့ပါ။ ပအိုဝ်းစာပေနဲ့ အသုံးပြုထားတဲ့ ပအိုဝ်းကို မြန်မာလိုက အသံမထွက်နိုင်ဘဲ ပအိုင်းလို့သာ အသံထွက်ကြတာပါ။ အဓိကတရားခံကတော့ ပအိုဝ်းတိုင်းရင်းသားတွေဟာ စာပေနဲ့ပတ်သက်ရင် ငြိနိုင်းမှု မရရှိသေးတာတစ်ခုလည်း ပါပါတယ်။ ဥပမာ စာမူနှစ်ခု ဖြစ်နေတဲ့ပြဿနာပါ။ တောင်ပေါ်စာမူကို ခမ်းကောင်မူလို့ခေါ်ပြီး မြေပြန့်မူကို ခမ်းဒွမ်မူလို့ သတ်မှတ်ထားတာရှိပြီး ယခုထိ ရဟန်းသံဃာအပါအဝင် တာဝန်ရှိလူကြီးတွေကလည်း ညှိနှိုင်းမှု မရရှိသေးပါဘူ။

ခမ်းကောင်မူမှာ ထီသိမ်စာမူကို အသုံးပြုသလို၊ ခမ်းဒွမ်မှာလည်း အလံတရာစာမူဆိုတာ အသုံးပြုနေကြပါတယ်။ စာမူနှစ်မူကိစ္စကို ဒီတိုင်းဖြေရှင်းမရတဲ့အတွက် ပအိုဝ်းတစ်မျိုးသားလုံးညီလာခံကျင်းပဖို့လိုအပ်နေပြီ လို့ထင်မြင်ယူဆရပါတယ်။ ပအိုဝ်းတစ်မျိုးသားလုံးညီလာခံမှာ ပြဿနာကိုတည်ပြီး ဝိုင်းဝန်းအဖြေရှာကြရမှာ ဖြစ်ပြီး အဲဒီကထွက်လာတဲ့ ထုတ်ပြန်ချက်ကို အတည်ပြုပြဌာန်းဖို့လိုအပ်ပါတယ်။ ဒါမှဖြေရှင်းနိုင်ပါလိမ့်မယ်။

အရင်က တောင်သူဘဝကနေ ပအိုဝ်းလို့ ခေါ်ဆိုနိုင်ခဲ့ပြီဖြစ်သော်လည်း ပအိုဝ်းကို (ပအိုင်း၊ ပအွိုင်း) လို့အသံထွက်နေခြင်း၊ စာမူနှစ်မူကို တစ်မူဖြစ်ခြင်းအတွက် ညှိနိုင်းမှုတွေ၊ တောင်းဆိုမှုတွေ လုပ်ရအုံးမှာဖြစ်ပါတယ်။ အဲလိုတောင်းဆိုနိုင်ဖို့ အတည်ပြုပြဌာန်းနိုင်ဖို့ကိုလည်း ပအိုဝ်းပြည်သူလူထုတစ်ရပ်လုံးက တွန်းအားပေးဖို့ လိုအပ်ပါတယ်။ ပအိုဝ်းပြည်သူလူထုတွေ အသိပညာအတတ်ပညာတွေ တတ်မြောက်ဖို့၊ ပအိုဝ်းပညာရှင်တွေ များများရှိဖို့ လိုအပ်ပါတယ်။

ပအိုဝ်းတစ်မျိုးသားလုံးညီလာခံကျင်းပဖို့ အချိန်တန်ပြီဖြစ်သလို ပအိုဝ်းတစ်မျိုးသားလုံးအတွက် မူဝါဒ တစ်ရပ်ရေးဆွဲဖို့ကိုလည်း လိုအပ်နေပြီဖြစ်ပါတယ်။ ဒါမှသာ ပအိုဝ်းတိုင်းရင်းသားတွေ ကြုံတွေ့နေရတဲ့ပြဿနာကို ဖြေရှင်းပေးနိုင်မှာဖြစ်ပါတယ်။ ဒီလိုအပ်ချက်တွေကို စာဖတ်ပရိတ်သတ်တွေ သိရှိနိုင်ဖို့ ရေးသားတင်ပြလိုက်ရပါတယ်။

ခွန်ရာဇာ

No comments: