ပအိုဝ်းလွတ်တော်အမတ်၊ ဒီမိုကရေစီပြုပြင်ပြောင်းလဲရေးနှင့် တာဝန်အသိစိတ်

By ခမ်းလွယ်မော် | ဇူလိုင်လ ၂၇၊ ၂၀၁၂ | တောင်ကြီးတိုင်းမ်

မြန်မာနိုင်ငံရဲ့ဒီမိုကရေစီစနစ်ကို ကူးပြောင်းရေးမှာ အထစ်အငေါ့တွေရှိပေမယ့် ရှေ့ကိုတော့ သွားနေတာဟာ တနှစ်တောင်ကျော်ခဲ့ပါပြီ။ ပွင့်လင်းမြင်သာမှုတွေ၊ ထင်သာမြင်သာမှုတွေကိုလဲ တွေ့မြင်လာရပါပြီ။ နိုင်ငံရေးအကျဉ်းသား (ယုံကြည်ချက်ကြောင့်အကျဉ်းကျနေသူ) များကို ပြန်လွတ်ပေးနေတာတွေ၊ စာပေစီစစ်ရေးမူဝါဒကို လျှော့ပေးနေတာတွေ၊ လက်နက်ကိုင်တိုင်းရင်းသားအင်အားစုတွေနဲ့ ငြိမ်းချမ်းရေးစကားပြောနေတာတွေ (တချို့ဆိုလက်မှတ်တောင်ထိုးပြီးကုန်ပြီ) စတာတွေဟာ တိုင်းပြည်ရဲ့ဒီမိုကရေစီပြုပြင်ပြောင်းလဲရေးရဲ့ ထင်သာမြင်သာတဲ့ အချက်တွေပါပဲ။

ဒီမိုကရေစီနှင့်အတူ လွတ်တော်တို့ ကိုယ်ပိုင်အုပ်ချုပ်ခွင့်ရဒေသတို့ ပါလာတာကိုလဲတွေ့မြင်နေရပါတယ်။ နိုင်ငံးပါတီတွေလဲ ကိုယ်စားပြုမှုတွေနဲ့အတူ ပေါ်ပေါက်တာကိုလဲ မြင်တွေ့ကြရမှာပါ။ ဥပမာ ကျနော်တို့ ပအိုဝ်းလူမျိုးအတွက်ဆိုရင်တော့ဖြင့် PNO (ပအိုဝ်းအမျိုးသားအဖွဲ့ချုပ်ပါတီ) ပေါ့။ ၂၀၁၀ ရဲ့ထွေထွေရွေးကောက်ပွဲမှာရော ၂၀၁၂ ကြားဖြတ်ရွေးကောက်ပွဲမှာပါ PNO ဟာ ပအိုဝ်းကိုယ်စားပြု ၀င်ရောက်ယှဉ်ပြိုင်ခဲ့တယ်လို့ သိရပါတယ်။ ဘယ်လိုမျိုး ပေတံနဲ့တိုင်းတာပြီး ဘယ်လိုမျိုးစီစစ်မှုတွေနဲ့ အမတ်လောင်းတွေကို ရွေးချယ်ဝင်ရောက်ယှဉ်ပြိုင်စေသလဲဆိုတာကို မသိရပေမယ့်၊ Of the People ပြည်သူလူထုရဲ့ မဲဆန္ဒအရ လွတ်တော်ထဲကိုတော့ ရောက်လာကြတာပါပဲ။

အဲဒီရောက်လာတဲ့ လွတ်တော်ကိုယ်စားလှယ်တွေဟာလဲ လွတ်တော်ထိုင်ခုံမှာ ထိုင်ရလို့ တာဝန်ကျေပြီလို့မယူဆစေချင်ပါဘူး။ မိမိတို့ကိုယ်စားပြုနေတဲ့လူမျိုး၊ မိမိတို့ကိုယ်စားပြုနေတဲ့နေရာဒေသက ပြည်သူတွေရဲ့လိုအပ်ချက်၊ ပြည်သူတွေရဲ့အခက်အခဲတွေကို ကွင်းဆင်းလေ့လာ၊ သတင်းအချက်အလက်တွေယူ၊ တွေ့ရှိတဲ့ပြည်သူတွေရဲ့အခက်အခဲတွေကို ဘယ်လိုမျိုးဖြေရှင်းသင့်တာဆိုတာကို ပြည်သူတွေနဲ့တိုင်ပင်၊ ရရှိလာတဲ့အချက်အလက်တွေကို လွတ်တော်မှာ တင်ပြသင့်တာတွေတင်ပြ၊ ဒါမှမဟုတ် ပြည်နယ်လွတ်တော်တို့၊ တိုင်းဒေသကြီးလွတ်တော်တို့မှာ တင်ပြသင့်တာတွေတင်ပြမှသာလျှင်၊ အဲလိုမျိုးလုပ်မှသာလျှင် ပြည်သူလူထုကို တကယ်ကိုယ်စားပြုတဲ့၊ ပြည်သူကိုတကယ်အလုပ်အကျွေးပြုတဲ့ လွတ်တော်အမတ်ဖြစ်မှာပါ။ ဒါမှမဟုတ်ရင် လွတ်တော်ထဲမှာ လက်ညိုးထောင် ခေါင်းညိတ်ပဲလုပ်နေရင်တော့ မိမိကိုယ်စားပြုနေတဲ့လူမျိုးနဲ့ မိမိကိုယ်စားပြုတဲ့နေရာဒေသတွေ ဖွံ့ဖြိုးတိုးတက်ဖို့နေနေသာသာ၊ ပိုပြီးတော့ဆုတ်ယုတ်ဖွယ်ပဲ ရှိပါတော့တယ်။

ယနေ့ ၂၁ ရာစု ကလိုဘယ်လိုင်ဇေးရှင်းခေတ်ကြီးမှာ မိမိတို့တစုထဲ မိမိတို့တဖွဲ့ထဲနေလို့မရတော့ပါဘူး။ အခြားသောအစု၊ အခြားသောအဖွဲ့များနဲ့ ပူးပေါင်း ပါဝင်ပတ်သက် လုပ်ဆောင်ရမှာဖြစ်ပါတယ်။ နိုင်ငံရေး၊ လူမှုရေး၊ စီးပွားရေး၊ ပညာရေး၊ ကျန်းမာရေး စတာတွေဟာ လူမျိုးတမျိုးနဲ့တမျိုး၊ တပြည်နယ်နဲ့ တပြည်နယ်၊ တပါတီနဲ့ တပါတီတို့ဟာ ပူးပေါင်းဆောင်ရွက်မှသာလျှင် အရှိန်အဟုန်နဲ့ တိုးတက်မြှင့်မားလာမှာ ဖြစ်ပါတယ်။

ကျနော်တို့ရဲ့ ပအိုဝ်းလူမျိုးကို ကိုယ်စားပြုတဲ့ PNO ဆိုရင်ဟာဖြင့် အခြားသောအဖွဲ့အစည်းများနဲ့ ပူးပေါင်းဆောင်ရွက်တာတွေ မတွေ့ရသေးပါဘူး။ ကျနော်ဘဲ မသိတာလားတော့ မပြောတတ်ပါဘူး။ ကျနော်လေ့လာ ဖတ်ရှုရတဲ့ သတင်းစာ၊ စာနယ်ဇင်းအားလုံးတိုင်းမှာလဲ သူတို့ရဲ့လုပ်ကိုင်ဆောင်ရွက်မှုတွေ မတွေ့ရသလောက်ပါဘဲ။ အဲ့ .. တခုတော့ တွေ့လိုက်တယ်၊ ဂျာနယ်တစ်စောင်မှာ ဂျာနယ်ရဲ့နာမည်ကိုတော့ မဖေါ်ပြတော့ပါဘူး။ ၂၀၁၁ ခုနှစ်မှာ တောင်ကြီးမြို့ရဲ့ တန်ဆောင်တိုင်ပွဲတော်မှာထင်တယ်။ PNO က ဦးနေ၀င်းထွန်း (အဆက်အသွယ်ပြတ်နေတာကြာလို့ ဘာတာဝန်ယူထားမှန်းမသိ) က အမျိုးသားလွတ်တော်က အမတ်တွေနဲ့ ပြည်သူ့လွတ်တော်က အမတ်တွေကို ဖိတ်ကြားပြီးတော့ သူပိုင်တဲ့ ၀ိုင်ချက်စက်ရုံတို့၊ ဘိလပ်မြေစက်ရုံတို့၊ ကျောက်မီးသွေးစက်ရုံတို့ကို လိုက်ပြတယ်တဲ့။ အမတ်တွေနဲ့ စီးပွားရေးလုပ်ငန်းရှင်နဲ့ မှားနေပြီလို့ထင်တယ်။ ကျနော့်ဆန္ဒနဲ့ အမြင်ကတော့ မိမိတို့ရဲ့ကိုယ်ပိုင်အုပ်ချုပ်ခွင့်ရဒေသမှာ ဖွံ့ဖြိုးတိုးတက်မှုအတွက် ဘာတွေလုပ်နေလဲ၊ ကျန်းမာရေး၊ ပညာရေး၊ စီးပွားရေး စသဖြင့်ပေါ့။ အဲဒါတွေကို လိုက်ပြရမှာ။ ပြစရာမရှိလို့ ကိုယ်ပိုင်စီးပွားရေးလုပ်ငန်းတွေကိုပဲ လိုက်ပြရတာနေမှာပေါ့။

နောက်တစ်ခုက ဂျာနယ်တွေမှာ တွေ့ရမှာပါ။ သမ္မတကြီးရဲ့မြစ်ဆုံရေကာတာစီကိန်း ရပ်ဆိုင်းလိုက်တဲ့ကိစ္စ၊ အဖွဲ့အစည်းတော်တော်များများကြိုဆိုတယ်၊ ထောက်ခံတယ်။ သဘောထားတွေထုတ်ပြန်တယ်။ ဒါပေမယ့် PNO တော့ မပါဘူး။ ပြည်ထောင်စုနေ့မှာ ညီနောင်တိုင်းရင်းသားပါတီတွေ စုပြီးတော့ အခမ်းအနားလုပ်ကြတယ်။ ညစာစားပွဲတွေ လုပ်ကြတယ်။ ဒါလဲပဲ PNO က မပါဘူး။ နောက်တစ်ခုက နိုင်ငံရေးပါတီက အမတ်တွေ၊ ပါတီဝင်တွေ၊ အမျိုးသမီးတွေ၊ လူငယ်တွေက နိုင်ငံခြားလေ့လာရေး ခရီးစဉ်တွေ ဖြစ်ကြတဲ့ ဂျာမနီ၊ နော်ဝေး၊ ဂျပန်၊ သြစတြေးလျ စတဲ့နိုင်ငံတွေကို သွားတဲ့အခါကြပြန်တော့လဲ PNO ပါတာကို မတွေ့ရပါဘူး။ ကြည့်ရတာ ရေအိုင်သေးသေးလေးထဲမှာပဲ ပျော်နေတာလားမသိဘူး။ ဒီနေရာမှာ သမ္မတကြီးရဲ့စကားကို ငှါးပြီးတော့ ပြောရရင်တော့ အပြောင်းအလဲလုပ်နေတဲ့ နေရာမှာ ရှေးရိုးစွဲတွေရှိနေရင် ချန်ခဲ့မှာပဲ။ ဟုတ်ပါတယ်။ တကယ်လဲကျန်ခဲ့မှာပါ။ PNO တခုထဲကျန်ခဲ့မှာမဟုတ်ပါဘူး။ ပအိုဝ်းပြည်သူ တရပ်လုံးပါ ကျန်ခဲ့မှာ ဖြစ်ပါတယ်။ အခုချိန်မှာတော့ PNO အတွက် အရေးကြီးဆုံးက ပူးပေါင်းဆောင်ရွက်မှုပါပဲ။

ပအိုဝ်းအမျိုးသားအဖွဲ့ချုပ် PNO အနေဖြင့် ပါတီဝင်တွေကို အရည်အချင်းတွေ မြှင့်မားလာအောင် လုပ်ဆောင်ပေးရမယ်။ နောက်ပြီး အရည်အချင်းရှိတဲ့ လူငယ်တွေကို ပါတီဝင်ဖြစ်လာအောင်စည်းရုံးရမယ်။ အမျိုးသမီး၊ လူငယ်အဖွဲ့တွေ ဖွဲ့စည်းပေးရမယ်။ အလုပ်ရုံဆွေးနွေးပွဲတွေ၊ ဟောပြောပွဲတွေ၊ နိုင်ငံရေးသင်တန်းတွေ ဖန်တီးပေးရမယ်။ ဒါမှ တဦးချင်းစီ အရည်အချင်းတွေ ရှိလာမယ်။ တဦးချင်း အရည်အချင်းရှိလာရင် ပါတီတိုးတက်လာမယ်။ ပါတီတိုးတက်ရင် ပြည်သူတွေရဲ့ဘ၀တိုးတက်အောင် မြှင့်မားလားအောင် လုပ်ဆောင်လာနိုင်မယ်။ အသေချာဆုံး တခုကတော့ လာမယ့် ၂၀၁၅ ခု အတွက် PNO ဟာ ပါတီကို ခိုင်မာအောင် တည်ဆောက်ဖို့ပါပဲ။

PNO ရဲ့ တော်လှန်ရေးကာလ တလျှောက်လုံးမှာ၊ ပအိုဝ်းပြည်သူတွေက တလျှောက်လုံး ပူးပေါင်းဆောင်ပါဝင်ခဲ့ဒါပါ။ မဟာမိတ်ထဲမှာဆိုရင် PNO ဟာ တော်လှန်ရေး မင်းသားလို့အခေါ်ခံရတဲ့အထိ ပြည်သူက အလုပ်အကျွေးပြုခဲ့တာကို ပြန်ပြီး အမှတ်ရစေချင်ပါတယ်။ ထမင်းထုပ်ဆိုရင်လဲ ရောက်ရာဒေသမရွေး။ ၆ လစာ ဆိုရင်လဲ (၆ လတကြိမ်ကျေးရွာများမှ ထမ်းဆောင်ရတဲ့အခွန်) ပြတ်လပ်တယ်ဆိုတာ မရှိစေရပါဘူး။ အဲဒါတွေကိုလဲ အခုချိန်မှာ PNO ကပြန်ပြီး အောက်မေ့စေချင်တယ်။ ပြန်ပြီးကျေးဇူးစပ်စေချင်ပါတယ်။ ပြည်သူကို အလုပ်အကျွေးပြုတဲ့ နိုင်ငံရေးပါတီ ဖြစ်စေချင်ပါတယ်။ အဲဒီ အသိစိတ်ကလေးတွေကို ထားစေချင်ပါတယ်။

အခုတလော ကြားနေရတာက အစိုးရနဲ့ တိုင်းရင်းသားလက်နက်ကိုင်တွေ ငြိမ်းချမ်းရေးဆွေးနွေးနေတာတွေပါပဲ။ အဲဒီအထဲမှာလဲ ပအိုဝ်းအမျိုးသားလွတ်မြောက်ရေးအဖွဲ့ချုပ်(PNLO) လဲ အပါအ၀င်ပေါ့။ တကယ်လို့ ထာဝရငြိမ်းချမ်းရေးအတွက် ဆွေးနွေးအဖြေရှာပြီးသဘောတူ လက်မှတ်ထိုးပြီးရင် ပအိုဝ်းအဖွဲ့အစည်းအားလုံး ပေါင်းစည်းပြီးတော့ တစုတဖွဲ့တည်းဖြစ်အောင် လုပ်လို့မရဘူးလားပေါ့။ ဒါက ကျနော်တဦးတယောက်ရဲ့ စဉ်းစားချက်ပါ။ ပူးပေါင်းမယ်ဆိုရင် ပူးပေါင်းလို့ရပါတယ်။ ဘာကြောင့်လဲဆိုတော့ PNO လဲ ပအိုဝ်းပြည်သူတွေ အတွက်လုပ်တာပဲလေ။ PNLO လဲ ပအိုဝ်းပြည်သူအတွက် လုပ်တာပါပဲ။ လုပ်တာချင်းအတူတူ ပေါင်းစည်းပြီးတော့ လုပ်ရင် ပိုပြီးထိရောက် ကျယ်ပြန့်တာပေါ့။ နောက်တဖွဲ့ကျန်ပါသေးတယ်။ အဲဒါကတော့ သမိုင်းစဉ်တလျှောက်လုံး ဂုဏ်သိက္ခာရှိရှိနဲ့ ရပ်တည်ခဲ့တဲ့ ပါတီတစ်ခုဖြစ်တဲ့ ပြည်ထောင်စုပအိုဝ်းအမျိုးသားအဖွဲ့ချုပ်(ပအမဖ) နဲ့လဲ ပေါင်းစည်းစေချင်ပါတယ်။ အခုချိန်မှာ စည်းလုံးညီညွတ်မှုဟာ တကယ်ကိုလိုအပ်နေတဲ့ အချိန်ပါပဲ။

နိဂုံးအနေနဲ့ ပြောချင်တာကတော့ ဒီမိုကရေစီ ပြုပြင်ပြောင်းလဲရေးမှာ အရွေးကောက်တင်မြောက်ခံလွတ်တော်အမတ်မှာလဲ လွတ်တော်အမတ်တွေရဲ့ လုပ်ငန်းတာဝန် ၀တ္တရား စတဲ့အသိစိတ်၊ ပြည်သူမှာလဲ ပြည်သူအသိစိတ်၊ အဖွဲ့အစည်းမှာလဲ အဖွဲ့အစည်းအသိစိတ်၊ ပါတီမှာလဲ ပါတီအသိစိတ်၊ ခေါင်းဆောင်မှာလဲ ခေါင်းဆောင်အသိစိတ် စတဲ့ ဘက်ပေါင်းစုံ ဒေါင့်ပေါင်းစုံက မိမိတို့ရဲ့တာဝန်နဲ့ အသိစိတ်ကလေးတွေ နိုးကြားရှင်သန် အမှတ်ပြန်ရစေဖို့အတွက် ဆန္ဒမွန်ဖြင့်။

ခမ်းလွယ်မော်
khamloimow@gmail.com

No comments: