ကြည်ဝေ | သြဂုတ် ၈၊ ၂၀၀၇
ရှမ်းပြည်နယ်တောင်ပိုင်း တောင်ကြီးခရိုင်တွင်းရှိ အင်းလေးဒေသတွင် သစ်နှင့် ၀ါးဈေးများ အဆမတန်မြင့်တက်လာသည့် အတွက် ဒေသခံများ အခက်အခဲဖြစ်နေကြကြောင်း သိရသည်။
အင်းလေးကန်တွင်းရှိကျေးရွာ ၆၄ ရွာသည် ကျွန်းမျောများပေါ်တွင် စိုက်ခင်းများပြုလုပ်လျက်ရှိကြပြီး ကန်ရေပြင်တွင် ထိုကျွန်းမျောများ ရွေ့လျားသွားခြင်းမရှိရန် ၀ါးလုံးများကို ကန်အောက်ခြေထိ ထိုးစိုက်ထားရခြင်း၊ စိုက်ခင်းများတွင်လည်း
ဝါးတိုင်များကို အသုံးပြုရခြင်းအပြင် အင်းသားအများစုသည် ၀ါးဖြင့်ဆောက်သော အိမ်များတွင် နေထိုင်ကြရသူများဖြစ် သည့်အတွက် မရှိမဖြစ် အရေးကြီးသည့် ၀ါးဈေး ယခုကဲ့သို့ တက်လာသောကြောင့် အခက်အခဲဖြစ်ကြရသည်ဟု ဒေသခံ များက ပြောသည်။
ဝါးအိမ်တအိမ်၏ သက်တမ်းမှာ ယင်းဒေသတွင် အနည်းဆုံး ၂ နှစ်မှ အများဆုံး ၄ နှစ်ထိသာခံသည်ဟု သိရသည်။
၂၀၀၆ ခုနှစ်အတွင်းက ၀ါးတလုံးလျှင် ကျပ် ၈၀၀ ဈေးမှ အများဆုံး ၁၀၀၀ ကျပ်ဈေးထိ ပေါက်ဈေးရှိခဲ့ပြီး ၂၀၀၇ နှစ်ဆန်း ပိုင်းတွင် ၀ါးဈေး ကျပ် ၁၅၀၀ ခန့်မှ စတင်တက်လာခဲ့ရာ ၂၀၀၇ ဇူလိုင်လတွင် ၀ါးဈေးမှာ တလုံးလျှင် ၂၅၀၀ ကျပ် ဈေးအထိရှိနေသည်ဟု ညောင်ရွှေမြို့နယ် အင်းလေးကန်အတွင်းရှိ နမ့်ပန်ဈေးတွင် ၀ါးရောင်းသူတဦးက ဆိုသည်။
“မနှစ်ကကတည်းက အိမ်ပြင်ဆောက်ရတော့မှာ မနှစ်ကဆောက်မယ်ဆိုရင်ကျပ် ၂ သိန်းလောက်ကုန်မယ်ဆိုလို့ ငွေမနိုင်လို့ စောင့်နေတာ၊ ဒီနှစ်တော့ ပိုဆိုးသွားပြီ ခုနစ်သိန်းလောက်ကုန်မယ်ဆိုတော့ မဆောက်နိုင်တော့ဘူး”ဟု အင်းလေးကန်ထဲရှိ ရွာမကျေးရွာနေ တံငါသည်တဦးက ဆိုသည်။
ဝါးအိမ် တအိမ်ဆောက်လျှင် ၀ါးအလုံးရေ အလုံး ၂၀၀ နှင့် အထက် အသုံးပြုရပြီး အမိုးအတွက်လည်း သစ်အနည်းငယ်နှင့် သက်ငယ်ဖိုးကုန်ကျသည်ဟု သိရသည်။
အင်းလေးဒေသတွင် ခေါင်တိုင်ရွာမှထွက်သည့်ဝါးများကို အားထား၍သုံးနေကြရာ ယင်းခေါင်တိုင်ရွာမှ ၀ါးအထွက်နည်းလာ သောကြောင့် ၀ါးရှားပါးလာပြီး ဈေးနှုန်းမြင့်တက်လာရခြင်းဖြစ်သည်ဟု နမ့်ပန်ဈေးမှ ၀ါးကုန်သည်က ပြောပြသည်။
“အခုဆိုရင် ဈေးတက်လို့ စိုက်ခင်းတွေမှာ ၀ါးကို လျှော့သုံးလာကြတယ်၊ အဲဒါ ရေရှည်အတွက်တော့ မကောင်းဘူး”ဟုလည်း ၎င်းက ပြောသည်။
ခေါင်တိုင်ရွာမှ ၀ါးထွက်နှုန်းသည်ကျဆင်းလျက်ရှိပြီး မနှစ်ကထက် ယခုနှစ်တွင် သုံးပုံ ၁ ပုံခန့် ကျဆင်းခဲ့သည်ဟု အထက်ပါ ကုန်သည်က ဆိုသည်။
ထို့အပြင် အင်းလေးဒေသတွင် လှေဆောက်လုပ်ရာ၌ အသုံးပြုရသော ကျွန်းသစ်ဈေးမှာလည်း ယခုနှစ်တွင် တတန်လျှင် ကျပ် ၇သိန်း ၀န်းကျင်ဈေး ရှိပြီး မနှစ်က ပေါက်ဈေးမှာ ကျပ် ၄ သိန်းဝန်းကျင်ရှိကြောင်း သိရသည်။
ကျွန်းကို ကချင်ပြည်နယ်နှင့် ကယားပြည်နယ်တို့မှ ၀ယ်ယူရခြင်းဖြစ်သောကြောင့် နှစ်စဉ် လိုသလောက် မရဟုလည်း ဒေသခံများက ပြောသည်။
No comments:
Post a Comment