တောင်ကြီးတိုင်း(မ်)
သြဂုတ်လ ၂ ရက်၊ ၂၀၀၇ ခုနှစ်။
မြန်မာစစ်အစိုးရထံ ဇူလိုင်လ ၂၆ရက်နေ့တွင် လက်နက်အပြီးအပိုင် ချလိုက်လိုက်သော ဗိုလ်မှူး ချစ်မောင် ဦးဆောင်သည့် ရှမ်းပြည်လူမျိုးပေါင်းစုံ ပြည်သူ့လွတ်မြောက်ရေးအဖွဲ့ (ရလလဖ) ဒေသဖွံ့ဖြိုးအတွက်သာ အဓိက လုပ်ဆောင်သွားမည်ဟု ပြောသည်။
မြန်မာစစ်အုပ်စုကို နှစ်လေးဆယ်ကျော်ကြာ လက်နက်ကိုင်တော်လှန်ပြီး နိုင်ငံရေးအရ တွေ့ဆုံဆွေးနွေးရန် ၁၃ နှစ်ကြာ ကျိုးပမ်းလာခဲ့သည့် ရလလဖ အဖွဲ့သည် ဇူလိုင်လ၂၆ ရက် နေ့တွင် ရှမ်းပြည်တောင်ပိုင်း ဆီဆိုင်မြို့နယ် ဘန်းယဉ်စံပြကျေးရွာရှိ အားကစားကွင်းတွင် မြန်မာစစ်အစိုးရထံ လက်နက်များ အပြီးပိုင်စွန့်လွှတ်၍ အပ်နှံလိုက်သည်။
ရလလဖ ဥက္ကဌ ဦးချစ်မောင်ဦးဆောင်သည့် အဖွဲ့က အင်အား ၁၃၇ ဦး၊ လက်နက်ခဲယမ်းမျိုးစုံ ၁၂၀ကျော်ကို ရှမ်းပြည်နယ် အရှေ့ပိုင်းတိုင်းစစ်ဌာချုပ် တိုင်းမှူး ဗိုလ်ချုပ်သောင်းအေးထံ အပ်နှံလိုက်သည်။
လက်နက်အပ်နှံပွဲအခမ်းအနားကို တိုင်းမှူး ဗိုလ်ချုပ်သောင်းအေးက ဂုဏ်ပြုစကား ပြောကြား ခဲ့သည်။
ဥက္ကဌ ခွန်ချစ်မောင်က လက်နက်အပ်နှံပွဲ အခမ်းအနားတွင် “ကျနော်တို့ ရှမ်းပြည်နယ်မှာ ပညာရေး၊ ကျန်းမာရေး၊ လူမှုရေး၊ လမ်းပန်းဆက်သွယ်ရေးတွေ ဖွံ့ဖြိုးတိုးတက်အောင် နေ့ချင်းညချင်း အရှိန်အဟုန်နဲ့ ဆောင်ရွက်ပေးနေတာ တွေကို တွေ့နေရတဲ့အတွက် ကျနော်အနေနဲ့ လက်နက်ကိုင်ထားတဲ့ လမ်းစဉ်အပေါ် ပြန်လည် သုံးသပ်မိတော ကြာပြီဖြစ်ပါတယ်။ ဒီကနေ့ နိုင်ငံတော်က ကျင်းပနေတဲ့ အမျိုးသားညီလာခံက ရေးဆွဲနေတဲ့ အခြေခံမူများဟာလဲ တချိန်က ကျနော်တို့ လိုချင်တောင့်ခဲ့တဲ့ လူမျိုး၊ ဘာသာ မခွဲခြားဘဲ ကွာဟမှုအနည်းဆုံး အခွင့်အရေးရရှိကြမှာ ဖြစ်တဲ့ အတွက် နိုင်ငံတော်အစိုးရဲ့ လုပ်ရပ်တွေ၊ စေတနာတွေအပေါ် ကျနော့်အနေနဲ့ သံသယမရှိ အကြွင်းမဲ့ ယုံကြည် လာခဲ့ပြီဖြစ်ပါတယ်။” ဟု ပြောသည်၊
လက်နက်ကိုင်စွဲခြင်းအားဖြင့် ပြည်သူတွေရဲ့ အကျိုးကို အမှန်တကယ်မသယ်ပိုးနိုင်တာမဟုတ် ဟု ရလလဖ အမှတ် (၉၄၃) တပ်ရင်း တပ်ရင်းမှူး ဦးချစ်အောင်က အခမ်းအနားတွင် ပြောသည်။
“ဒီလက်နက်တွေနဲ့ ပြည်သူတွေကို စိုးရွံ့ကြောက်လန့်စိတ်တွေ ဖြစ်ပေါ်စေပြီး ပြည်သူတွေထဲက ကောက်ခံရရှိတဲ့ ဆက်ကြေး၊ အခွန်အခတွေနဲ့ ကျနော်တို့ ရပ်တည်နေကြတာကြောင့် ပြည်သူလူထုအပေါ် ၀န်ထုပ်ဝန်ပိုး ဒုက္ခတွေ မဖြစ်အောင် သာမန်လူသားဘ၀အဖြစ် ရိုးရိုးသားသား ဖြူဖြူစင်စင် စိတ်ထားနှင့် ပြည်သူများနှင့်အတူ လက်တွဲပြီး ကိုယ့်ရပ်၊ ကိုယ့်ရွာ၊ ကိုယ့်ဒေသ ဖွံ့ဖြိုးတိုးတက်အောင် လုပ်ဆောင်မယ်လို့ ဆုံးဖြတ်လိုက်ပါပြီ။” ဟု တပ်ရင်းမှူး ဦးချစ်အောင်က ပြောသည်။
မြန်မာစစ်အစိုးရက အကြပ်ကိုင်ဖိအားပေးမှု တစုံတရာမရှိပဲ ယုံကြည်စွာဖြင့် လက်နက်အပ်နှံပြီး ဒေသဖွံ့ဖြိုးရေး အတွက် ရလလဖ အမည်ဖြင့်သာ ဆက်လက်လုပ်ဆောင်သွားမည်ဟု စစ်ဦးစီးဌာနမှ တာဝန်ရှိသူ ဦးမောင်မောင်ညွန့်က ပြောသည်၊
“ကျနော်တို့ကတော့ နိုင်ငံတော်အပေါ်မှာပဲ ယုံယုံကြည်ကြည်နဲ့ကို လုပ်လိုက်တာပါခင်ဗျား။ ဒါက နိုင်ငံတော်က ကျနော်တို့ကို အကြပ်ကိုင်ပြီးတော့ လုပ်တာလည်း မဟုတ်ပါဘူးခင်ဗျား။ အခုကတော့ ဒီ ရလလဖ ဒေသမှာပဲ ပြန်ပြီးတော့ ဒေသဖွံ့ဖြိုးရေးတွေ၊ လမ်းပန်းဆက်သွယ်ရေး၊ ပညာရေးအားလုံးပေါ့ဗျာ ကျနော်တို့ ဒေသဖွံ့ဖြိုးရေး အတွက်ကို ကျနော်တို့ဒေသကို ပြန်လုပ်ဖို့အတွက် နိုင်ငံတော်ကလည်း ကျနော်တို့ကို အကူအညီတွေ ပေးမှာပါ ခင်ဗျား၊ ကျနော်တို့ ရလလဖ ဒေသမှာပဲ ပြန်ပြီး အခြေစိုက်မှာပါ ခင်ဗျား။ ကျနော်တို့အဖွဲ့က ရလလဖ ပါပဲခင်ဗျား။ ကျနော်တို့ ရလလဖ ဆိုတာ ဦးချစ်မောင်ကလည်း ရလလဖ ဥက္ကဌ လက်ရှိအခြေအနေကလည်း ရလလဖ ဥက္ကဖြစ်နေပါတယ်ခင်ဗျား။ ”
ယခုလ ၄ ရက်နေဏ္ဍတွင် ရလလဖ ဌာနချုပ်ဖြစ်သည့် နောင်ထောဝ်စခမ်းတွင် နာယကအဖွဲ့က အစည်းအဝေးခေါ်ပြီး ခွန်ချစ်မောင်အား ဥက္ကဌ ရာထူးကို ပြန်လည်လွဲအပ်ပေးရန် တောင်းဆိုခဲ့ရာ ယင်းညမှာပင် ခွန်ချစ်မောင်နှင့် နောက်လိုက်အဖွဲ့က ဌာနချုပ်စခန်းမှ တိတ်တဆိတ်ထွက်ခွါလာရာ နာယကအဖွဲ့၏ ရဲဘော်များနှင့် တိုက်ပွဲငယ်ဖြစ်ပွားခဲ့သေးသည်။
ဇူလိုင်လ ၈ ရက်နေ့တွင် ဦးအောင်ခမ်းထီ ဦးဆောင်သည့် ပအိုဝ်းအမျိုးသားအဖွဲ့၏ အောင်ဆုဗွေစခန်းတွင် ဦးချစ်မောင်တို့အဖွဲ့အား ရပခ ကာကွယ်ရေးဝန်ြကီးဌာန ဒုတိယ ဗိုလ်ချုပ်ကျော်ဝင်းက လက်ခံကြိုခဲ့သည်။
ဦးချစ်မောင်တို့ လက်နက်အပ်နှံလိုက်သည့်အပေါ် နှင့် ဗဟိုဌာနချုပ်တွင် ကျန်နေသော အဖွဲ့များအပေါ် ဗိုလ်မှူးကြီးခွန်သူရိန်က ယခုလို သုံးသပ်သည်။
“ကျန်ရှိနေတဲ့ အဖွဲ့ကတော့ သူ့ရဲ့အစဉ်အလာကို သူကနေပြီးတော့မှ ဥပဒေဘောင်အရ ထိန်းထိန်းသိမ်းသိမ်းရှိဦးမယ်လို့ပဲ ကျနော်တို့ ဒီလိုပဲ ယုံကြည်ပါတယ်။ ဟိုးမှာ လက်နက်အပ်သွားတဲ့ အဖွဲ့ကတော့ သူ့ရဲ့ဇာတ်လမ်းဟာ ပြီးသလောက်ဖြစ်သွားပြီလို့ပဲ ကျနော်တို့ ယုံကြည်ပါတယ်ဗျ။ နောက် ကျနော်တို့ကျတော့ ကျနော်တို့ လုပ်စရာရှိတဲ့ အလုပ်ကို ကျနော်တို့ ဆက်လုပ်သွားမယ်လို့ပဲ ကျနော်တို့ ဒီလိုပဲ ဆုံးဖြတ်ထားတယ်။ အဲတော့ ကျန်ရှိနေတဲ့ ဟိုးအဖွဲ့ကျတော့ တဖြည်းဖြည်းချင်းနဲ့ ကျနော်တို့ နားလည်မှုတွေ ရှိလာလိမ့်မယ်လို့ပဲ ကျနော်တို့ ယုံကြည်ထားပါတယ်ခင်ဗျား။”
လွန်ခဲ့သည့် လက တောပြန်ခိုလာသည့် ရလလဖ ဒုက္ကဌ ဗိုလ်မှူးကြီး ခွန်ထိဆောင်၊ အတွင်းရေးမှူး ဗိုလ်မှူးကြီး ခွန်သူရိန်တို့ ဦးဆောင်သည့်အဖွဲ့ကမူ စစ်ရေး၊ နိုင်ငံရေးနှင့် လူမျိုးဖွံ့ဖြိုးတိုးတက်ရေး အခန်းကဏ္ဍများကို တိုးချဲ့လုပ်ဆောင်သွားမည်ဟု စစ်အစိုးရကို ဆန့်ကျင်တော်လှန်နေသည့် ပအိုဝ်းပြည်သူ့ လွတ်မြောက်ရေးအဖွဲ့ နှင့်အတူ ယခုရက်ပိုင်းအတွင်းတွင် ကြေညာခဲ့သည်။
No comments:
Post a Comment